ໂດຍອີງຕາມກົດລະບຽບຂອງພັກປະຊາຊົນປະຕິວັດລາວ ສະໄໝທີ 10, ໝວດທີ 1, ມາດຕາ 2 ກ່ຽວກັບລະບຽບ ການຂະຫຍາຍພັກ, ອີງຕາມໃບສະເໜີຂອງໜ່ວຍພັກກົມມາດຕະຖານ ແລະ ວັດແທກ ແລະ ອີງຕາມການຕົກລົງເຫັນດີ ຂອງຄະນະພັກກະຊວງວິທະຍາສາດ ແລະ ເຕັກໂນໂລຊີ ວ່າດ້ວຍ ການອະນຸມັດຮັບເອົາມະຫາຊົນກ້າວໜ້າ ເຂົ້າເປັນ ສະມາຊິກພັກສຳຮອງ ຂອງພັກປະຊາຊົນ ປະຕິວັດລາວ.
ໜ່ວຍພັກກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດພິທີຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ໃນຕອນແລງວັນທີ 2 ກໍລະກົດ 2019, ທີ່ຫ້ອງປະຊຸມໃຫຍ່ ສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ ໂດຍການໃຫ້ກຽດເຂົ້າຮ່ວມ ເປັນປະທານຂອງ ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ.
ໃນພິທີດັ່ງກ່າວ, ທ່ານ ວຽງທອງ ວົງທະວິໄລ, ເລຂາໜ່ວຍພັກກົມມາດຕະຖານ ແລະ ວັດແທກ ໄດ້ຂຶ້ນຜ່ານມະຕິຕົກລົງຂອງຄະນະພັກກະຊວງ ວ່າດ້ວຍການຮັບເອົາມະຫາຊົນກ້າວໜ້າ ຜູ້ທີ່ມີຄວາມຫ້າວຫັນທາງດ້ານ ວຽກງານວິຊາສະເພາະ ກໍຄືຂະບວນການຕ່າງໆຂອງອົງການຈັດຕັ້ງມະຫາຊົນ ເຂົ້າເປັນສະມາຊິກພັກສຳຮອງ ທັງໝົດ 6 ສະຫາຍ, ຍິງ 1 ສະຫາຍ. ຫຼັງຈາກນັ້ນ ສະຫາຍປະທານ ພ້ອມດ້ວຍ ສະຫາຍເລຂາໜ່ວຍພັກກົມມາດຕະຖານ ແລະ ວັດແທກ ໄດ້ຂຶ້ນມອບປຶ້ມກົດລະບຽບ ແລະ ຈັບມືຮັບຮອງເອົາບັນດາສະຫາຍສະມາຊິກພັກໃໝ່.
ໂອກາດດຽວກັນນີ້, ທ່ານ ບັນດິດ ສຈ. ບໍ່ວຽງຄຳ ວົງດາລາ ລັດຖະມົນຕີ ກະຊວງ ໄດ້ກ່າວສະແດງຄວາມຍ້ອງຍໍ ຊົມເຊີຍ ຕໍ່ໜ່ວຍພັກກົມມາດຕະຖານ ແລະ ວັດແທກ ທີ່ໄດ້ສ້າງສະມາຊິກພັກສຳຮອງໃໝ່ ເຮັດໃຫ້ໜ່ວຍພັກມີການເຕີບໃຫຍ່ ຂະຫຍາຍຕົວ ພ້ອມນັ້ນ ກໍຍັງຊົມເຊີຍຕໍ່ມະຫາຊົນກ້າວໜ້າ ທີ່ໄດ້ກ້າວເຂົ້າເປັນສະມາຊິກພັກສຳຮອງໃນຄັ້ງນີ້. ທ່ານ ຍັງໃຫ້ກຽດໂອລົມຕໍ່ສະມາຊິກພັກໃໝ່ ເພື່ອເປັນເຂັມຊີ້ທິດເຍືອງທາງໃນການຈັດຕັ້ງປະຕິບັດໜ້າທີ່່ຕາມການມອບໝາຍ ໂດຍສະເພາະແມ່ນ ວຽກງານມາດຕະຖານ ແລະ ວັດແທກ ທີ່ເປັນວຽກງານທີ່ສຳຄັນຕໍ່ກັບສັງຄົມໃນປັດຈຸບັນ ຕອນທ້າຍ ທ່ານ ຍັງໄດ້ຮຽກຮ້ອງໃຫ້ບັນດາສະມາຊິພັກທຸກສະຫາຍ ສືບຕໍ່ຍົກລະດັບຄວາມຮູ້, ຄວາມສາມາດ ທາງດ້ານວິຊາການອັນໃໝ່ໆ ໂດຍສະເພາະແມ່ນໃນຍຸກອຸດສາຫະກໍາ 4.0 ນີ້ ເພື່ອກະກຽມການຮອງຮັບວຽກງານທີ່ ພັກ-ລັດ ມອບໝາຍໃຫ້ໄດ້ຮັບຜົນສຳເລັດ ແລະ ມີໝາກຜົນສູງສຸດ, ສືບຕໍ່ເສີມຂະຫຍາຍບັນດາຜົນງານ ແລະ ຈຸດດີທີ່ທາງໜ່ວຍພັກກໍຄືກົມມາດຕະຖານ ແລະ ວັດແທກ ຍາດໄດ້ໃນໄລຍະຜ່ານມາ ເພື່ອສ້າງເປັນຜົນງານໃຫ້ໂດດເດັ່ນ ແລະ ໄດ້ຮັບຜົນສຳເລັດຢ່າງສະຫງ່າງາມ ເພື່ອຕ້ອນຮັບກອງປະຊຸມໃຫຍ່ຄັ້ງທີ 2 ຂອງໜ່ວຍພັກກົມມາດຕະຖານ ແລະ ວັດແທກ ທີ່ໃກ້ຈະມາຮອດນີ້, ພ້ອມທັງເປັນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ 10 ຂອງພັກໃຫ້ປະກົດຜົນເປັນຈິງ.
Video Form Youtube
