ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ໃຫ້ສຳພາດໃນວັນທີ 8 ກໍລະກົດ 2019 ນີ້ ທີ່ກະຊວງສາທາລະນະສຸກ ວ່າ: ປີ 2019 ໄຂ້ຍຸງລາຍໄດ້ລະບາດຢູ່ຫຼາຍປະເທດອາຊຽນ ຄື: ປະເທດຟີລິບປິນ, ຫວຽດນາມ, ກຳປູເຈຍ, ໄທ, ສະເພາະ ສປປ ລາວ ປັດຈຸບັນ ມີ 12.212 ກໍລະນີ ແລະ ເສຍຊີວິດແລ້ວ 28 ຄົນ.
ກະຊວງສາທາລະນະສຸກ ໄດ້ເອົາໃຈໃສ່ຕິດຕາມເຝົ້າລະວັງຢ່າງໃກ້ຊິດ ແຕ່ຫົວທີ ແລະ ໄດ້ຊີ້ນຳ ອອກມາດຕະການເຖິງບັນດາແຂວງທົ່ວປະເທດ ເພື່ອກັນ ແລະ ໂຕ້ຕອບການລະບາດບໍ່ໃຫ້ມີການແຜ່ລາມເປັນວົງກວ້າງ ເຊິ່ງມາດຕະການທີ່ພົ້ນເດັ່ນແມ່ນໄດ້ອອກຄຳສັ່ງແນະນຳເຖິງບັນດາເຈົ້າແຂວງທົ່ວປະເທດ ເອົາໃຈໃສ່ທຳລາຍແຫຼ່ງເພາະພັນໜອນນ້ຳຍຸງລາຍ ແລະ ເອົາໃຈໃສ່ຕິດຕາມປິ່ນປົວຄົນເຈັບຢ່າງໃກ້ຊິດ ເພື່ອຫຼຸດຜ່ອນອັດຕາການເຈັບ ແລະ ເສຍຊີວິດ ທັງໄດ້ຂໍການສະໜັບສະໜູນຈາກບັນດາກະຊວງທີ່ກ່ຽວຂ້ອງ ແລະ 3 ອົງການຈັດຕັ້ງໃນການສະໜັບສະໜູນຕ້ານການລະບາດຂອງພະຍາດໄຂ້ຍຸງລາຍ ແລະ ໄດ້ສົ່ງທີມງານຊ່ຽວຊານ (ຄວບຄຸມພາຫະນຳເຊື້ອ ແລະ ປິ່ນປົວ) ລົງຊ່ວຍແຂວງສະຫວັນນະເຂດ ແລະ ແຂວງຈຳປາສັກ ອອກຄຳສັ່ງເອົາພະນັກງານສູນກາງໄປປະຈຳຢູ່ສຸກສາລາ ແລະ ເມືອງ ໃນ 5 ແຂວງ ຄື: ຈຳປາສັກ ສະຫວັນນະເຂດ, ສາລະວັນ, ຄຳມ່ວນ, ນະຄອນຫຼວງວຽງຈັນ ເປີດຫ້ອງປະຕິບັດງານເຫດການສຸກເສີນດ້ານສາທາລະນະສຸກທຸກໆວັນ ເພື່ອຕິດຕາມສະພາບການວາງແຜນ ແລະ ປະເມີນບັນດາມາດຕະການທີ່ໄດ້ຈັດຕັ້ງປະຕິບັດ ອອກແຈ້ງການເຖິງຫ້ອງກວດພະຍາດເອກະຊົນ ກ່ຽວກັບການນຳສົ່ງຄົນເຈັບທີ່ເປັນໄຂ້ຍຸງລາຍໄປຫາໂຮງໝໍທີ່ມີເງື່ອນໄຂ ແລະ ບໍ່ໃຫ້ແກ່ຍາວໃນການປິ່ນປົວ ອອກແຈ້ງການເຖິງຮ້ານຂາຍຢາເອກະຊົນທົ່ວປະເທດ ກ່ຽວກັບການຮ່ວມມືແນະນຳຄົນເຈັບບໍ່ໃຫ້ປິ່ນປົວດ້ວຍຕົນເອງ ແລະ ໃຫ້ໄປຫາແພດໝໍທີ່ໂຮງໝໍ ພ້ອມນີ້ ຍັງໄດ້ຕິດຕາມເຝົ້າລະວັງຢ່າງໃກ້ຊິດ ທ່າອ່ຽງການລະບາດຂອງພະຍາດໄຂ້ຍຸງລາຍ ທີມງານຂັ້ນແຂວງ ເມືອງ ໄດ້ລົງໄປສອບສວນ ແລະ ນຳພາປະຊາຊົນຮ່ວມອຳນາດການປົກຄອງທ້ອງຖິ່ນ ໃນການຕ້ານການລະບາດ ສົ່ງນັກສຶກສາລະບາດວິທະຍາພາກສະໜາມ ລົງຊ່ວຍແຂວງທີ່ມີລາຍງານການລະບາດ.
ສ່ວນການຄວບຄຸມພາຫະນຳເຊື້ອແຕ່ລະແຂວງ ແລະ ເມືອງ ໄດ້ນຳພາປະຊາຊົນສ້າງຂະບວນການທຳລາຍແຫຼ່ງເພາະພັນໜອນນ້ຳຍຸງທຸກໆອາທິດ ແຕ່ລະແຂວງມີເຄື່ອງຈັກພົ່ນນ້ຳຢາຂ້າຍຸງແກ່ ແລະ ຢາໜອນນ້ຳຢ່າງພຽງພໍ ໄດ້ແຈກຢາຍປື້ມຄູ່ມືແນະນຳວຽກງານຄວບຄຸມພະຍາດໄຂ້ຍຸງລາຍ ສົ່ງວິຊາການຄວບຄຸມພາຫະນຳເຊື້ອລົງປະຈຳຊ່ວຍຂັ້ນແຂວງ ເມືອງ ແລະ ບ້ານ
