ເນື່ອງໃນໂອກາດ ວັນປ່ອຍປາ, ວັນອະນຸລັກສັດນໍ້າ ແລະ ສັດປ່າ ແຫ່ງຊາດ 13 ກໍລະກົດ ປະຈຳປີ 2019 ກະຊວງກະສິກຳ ແລະ ປ່າໄມ້, ຮ່ວມກັບ ພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ ແລະ ອຳນາດການປົກຄອງເມືອງນາຊາຍທອງ ຈັດພິທີປ່ອຍປາ ຂື້ນທີ່ອ່າງນ້ຳຊວງ ທັງນີ້ ຍ້ອນ​​ເຫັນ​ໄດ້ ເຖິງຄວາມ​ສຳຄັນ ຂອງ ປາ, ສັດນໍ້າ ແລະ ສັດປ່າ ຕໍ່ການພັດທະນາ ເສດຖະກິດ-ສັງຄົມ ແຫ່ງຊາດ ແລະ ຕໍ່ການປັບປຸງຊີວິດການເປັນຢູ່ ແລະ ຫຼຸດຜ່ອນຄວາມທຸກຍາກ ຂອງປະຊາຊົນລາວ ບັນດາເຜົ່າ ​ແລະ ເພື່ອເປັນການອະນຸລັກ ແລະ ປັກປັກຮັກສາຊີວະນາໆພັນໃຫ້ມີຄວາມຍືນຍົງ  ນັ້ນ,  ພັກ ​ແລະ ລັດຖະບານ ກໍ່​ຄື​ສະພາ​ແຫ່ງ​ຊາດ ໄດ້ກໍານົດເອົາ ວັນທີ 13 ກໍລະກົດ ຂອງແຕ່ລະປີ ເປັນວັນປ່ອຍປາ, ວັນອະນຸລັກສັດນໍ້າ ແລະ ສັດປ່າ   ແຫ່ງຊາດ ຂອງ ສປປ ລາວ, ຊຶ່ງ​ໄດ້​ບັນຍັດ​ໄວ້ ​ໃນກົດໝາຍ​ວ່າ​ດ້ວຍ​ສັດ​ນໍ້າ ​ແລະ ສັດປ່າ ​ກໍ່​ຄືກົດໝາຍ​  ວ່າ​ດ້ວຍ​ການ​ປະມົງ.

ໃນພິທີ ໂດຍໃຫ້ກຽດເຂົ້າຮ່ວມ ມີ ທ່ານ ສອນໄຊ ສີພັນດອນ  ຮອງນາຍົກລັດຖະມົນຕີ, ທ່ານ ປອ ລຽນ ທີແກ້ວ  ລັດຖະມົນຕີ ກະຊວງ ກະສິກຳ ແລະ ປ່າໄມ້, ມີ ບັນດາຮອງລັດຖະມົນຕີ, ຮອງເຈົ້າຄອງ, ເຈົ້າເມືອງ, ຫົວຫນ້າພະແນກ ການທີ່ກ່ຽວຂ້ອງ, ບັນດາກົມ ຕ່າງໆ ອ້ອມຂ້າງກະຊວງ, ພະແນກການທີ່ກ່ຽວຂ້ອງ ລວມທັງພາກສ່ວນອຳນາດການປົກຄອງເມືອງ, ບ້ານ ເຂົ້າຮ່ວມ ຢ່າງພ້ອມພຽງ.

ການກຳນົດເອົາ ວັນທີ 13 ກໍລະກົດ ຂອງທຸກປີ ເປັນວັນປ່ອຍປາ, ວັນອະນຸລັກ ສັດນໍ້າ ແລະ ສັດປ່າ ແຫ່ງຊາດ ກໍ່ເພື່ອເປັນການລະນຶກເຖິງ ວັນຄ້າຍວັນເກີດຂອງ ທ່ານ ປະທານ ສຸພານຸວົງ, ປະທານປະເທດ ຄົນທຳອິດ ຂອງ ສປປ ລາວ, ທີ່ມີຄຸນງານຄວາມດີ ແລະ ຜົນງານອັນໃຫຍ່ຫຼວງທີ່ໄດ້ອຸທິດໃຫ້ແກ່ພາລະກິດແຫ່ງການຕໍ່ສູ້ກູ້ຊາດ ກໍ່ຄືການປົກປັກຮັກສາ ແລະ ສ້າງສາພັດທະນາ ປະເທດຊາດ ອີກປະການທີສອງ ແມ່ນເພື່ອເປັນການປູກຈິດສຳນຶກ ໃຫ້ແກ່ອະນຸຊົນ, ເຍົາວະຊົນຂອງຊາດ ກໍ່ຄືລູກຫຼານຜູ້ເກີດໃໝ່ໃຫຍ່ລຸນ ໃຫ້ມີສະຕິຮັກຫວງແຫນ ສັດນໍ້າ ແລະ ສັດປ່າ ທັງເປັນການປຸກລະດົມທົ່ວປວງຊົນເຂົ້າຮ່ວມການຄຸ້ມຄອງ, ປົກປັກຮັກສາ, ພັດທະນາ ແລະ ນຳໃຊ້ ສັດນໍ້າ ແລະ ສັດປ່າ ແນໃສ່ເພື່ອເຮັດໃຫ້ປະຊາກອນສັດນໍ້າ ແລະ ສັດປ່າ ໃຫ້ນັບມື້ມີຄວາມອຸດົມສົມບູນ ແລະ ກາຍເປັນທ່າແຮງໃນການຄໍ້າປະກັນ ດ້ານສະບຽງອາຫານ, ໂພສະນາການ ກໍ່ຄືການປັບປຸງຊີວິດການເປັນຢູ່ ຂອງປະຊາຊົນລາວ ໃຫ້ນັບມື້ດີຂຶ້ນ ແລະ ປະການທີສາມ ແມ່ນເພື່ອເປັນການສືບສານຮີດຄອງປະເພນີ ໃນຊ່ວງເຂົ້າພັນສາ ຫ້າມບໍ່ໃຫ້ຂ້າສັດຕັດຊີວິດ ໃຫ້ມີຄວາມໝາຍຄວາມສຳຄັນຍິ່ງຂຶ້ນ.

ວັນປ່ອຍປາ, ອະນຸລັກສັດນໍ້າ ແລະ ສັດປ່າ ແຫ່ງຊາດ ໂດຍການໂຄສະນາ ເຜີຍແຜ່ ແລະ ສົ່ງເສີມຢ່າງກວ້າງຂວາງ ໃນຂອບເຂດທົ່ວປະເທດ ເຮັດໃຫ້ຂະບວນການ ໃນວັນປ່ອຍປາ, ວັນ​ອະນຸລັກສັດນໍ້າ ແລະ ສັດປ່າ ເປັນຂະບວນຟົດຟື້ນ ໂດຍມີການເຂົ້າຮ່ວມ ຂອງທຸກຊັ້ນຄົນໃນສັງຄົມ ເປັນຕົ້ນແມ່ນ ການນຳພັກລັດຂັ້ນຕ່າງໆ, ພະນັກງານ, ທະຫານ, ຕຳຫຼວດ, ນັກຮຽນ, ນັກສຶກສາ, ເຍົາວະຊົນ, ປະຊາຊົນ, ອົງການຈັດຕັ້ງສາກົນ ໃນຊຸມປີທີ່ຜ່ານມາ ກະຊວງກະສິກໍາ ແລະ ປ່າໄມ້ ກໍ່ຄືກົມວິຊາການທີ່ກ່ຽວຂ້ອງ ໄດ້ປະສານສົມທົບກັບ ອຳນາດການປົກຄອງທ້ອງຖິ່ນ ເຄື່ອນໄຫວວຽກງານປ່ອຍປາ, ອະນຸລັກ ສັດນໍ້າ ແລະ ສັດປ່າ ແລະ ມີການຂະຫຍານຕົວ ແລະ ຈຳນວນເພີ້ມຂື້ນໃນແຕ່ລະປີ ເປັນຕົ້ນໃນປີ 2015 ໄດ້ປ່ອຍລູກປາ ທັງໝົດປະມານ 35 ລ້ານໂຕ, ປີ 2016 ປະມານ 40 ລ້ານໂຕ ແລະ ປີ 2017 ປະມານ 43 ລ້ານໂຕ ແລະ ປີ 2018 ປ່ອຍໄດ້ຫຼາຍກວ່າ 45 ລ້ານໂຕ,   ມີວັງສະຫງວນ ຫຼາຍກວ່າ 1,000 ວັງ, ມີເນື້ອທີ່ຫຼາຍກວ່າ 60,800 ເຮັກຕາ, ໄດ້ມີລະບຽບການຄຸ້ມຄອງວັງ ທີ່ໄດ້ເຊັນຮັບຮອງຈາກການຈັດຕັ້ງຂອງພາກລັດ ທີ່ກ່ຽວຂ້ອງແລ້ວ 638 ວັງ, ເຮັດໃຫ້ປະຊາກອນປາ ແລະ ສັດນໍ້າຕ່າງໆ ມີຈຳນວນເພີມຂຶ້ນ.

ສຳລັບປີ 2019 ນີ້ ມີແຜນຈະປ່ອຍປາ ຄືນສູ່ທຳມະຊາດ ຈຳນວນ 50 ລ້ານໂຕ, ໃນຂອບເຂດທົ່ວປະເທດ, ສະເພາະ ນະຄອນຫຼວງວຽງຈັນ ມີ​ເປົ້າ​ໝາຍ​ປ່ອຍ​ປາ ຈຳນວນ 580.000 ໂຕ ແລະ ພິທີ ປ່ອຍປາ ທີ່ອ່າງນ້ຳຊວງ ຄັ້ງນີ້ ແມ່ນໄດ້ປ່ອຍປາ ທັງໝົດ ຈຳນວນ 250.000 ໂຕ, ຊຶ່ງປະກອບມີ ປາປາກ, ປາເຂັງ,    ປາເກັດແລບ, ປານິນ ແລະ ປາໄນ, ນອກຈາກນີ້ ຈະໄດ້ປ່ອຍພໍ່ພັນ ແລະ ແມ່ພັນປາ ສູ່ທໍາມະຊາດ ຈຳນວນ 550 ໂຕ,   ໃນນັ້ນມີ ປາກົດ 100 ໂຕ, ປາໝູ 100 ໂຕ, ປາເຂັງ 100 ໂຕ, ປາເພ້ຍ 100 ໂຕ, ປາຊວາຍ ໝາກໄມ້ 100 ໂຕ, ປາ    ເໝັ້ນ 50 ໂຕ ແລະ ພິເສດຍັງມີ ແນວພັນລູກປາຝາ ທີ່ປ່ອຍໃນມື້ນີ້  ຈຳນວນ 99 ໂຕ.

ບົດ: ກຳປານາດ ລັດຖະເຮົ້າ

ພາບ: ສິງຫາ ເລືອງວັນ