ໃນຕອນເຊົ້າຂອງວັນທີ 12 ກໍລະກົດ 2019 ຜ່ານມານີ້ ຢູ່ທີ່ຜາມໄຊ ບ້ານປົ່ງ ເມືອງໄຊຍະບູລີ ແຂວງໄຊຍະບູລີ, ໄດ້ຈັດພິທີປ່ອຍປາເນື່ອງໃນໂອກາດວັນປ່ອຍປາ ແລະ ອະນຸລັກສັດນໍ້າ - ສັດປ່າແຫ່ງຊາດ ຄົບຮອບ 14 ປີ, 13 ກໍລະກົດ ແລະ ເພື່ອຂໍ່ານັບຮັບຕ້ອນວັນຄ້າຍວັນເກີດ ຂອງທ່ານ ປະທານ ສຸພາ ນຸວົງ ອາດີດຜູ້ນໍາທີ່ແສນເຄົາລົບຮັກຂອງຊາວລາວ ທັງຊາດ ຄົບຮອບ 110 ປີ, ເປັນກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປ ລາວ, ມີທ່ານ ພົງສະຫວັນ ສິດທະວົງ ເລຂາພັກແຂວງ, ເຈົ້າແຂວງໄຊຍະບູລີ ມີບັນດາທ່ານ ຮອງລັດຖະມົນຕີ, ຫົວໜ້າກົມຈາກສູນກາງ, ມີຄະນະປະຈຳພັກແຂວງ, ກຳມະການພັກແຂວງ, ສະມາຊິກສາພາແຫ່ງຊາດ, ສະມາຊິກສະພາປະຊາຊົນແຂວງ, ຫົວໜ້າ, ຮອງຫົວໜ້າພະແນກການ, ກົມກອງຫ້ອງການອ້ອມຂ້າງແຂວງ, ແລະ ເມືອງ, ພະນັກງານອ້ອມຂ້າງແຂວງ, ເມືອງ, ນັກທຸລະກິດຜູ້ປະກອບການ, ນັກຮຽນນັກສຶກສາ, ພ້ອມດ້ວຍພໍ່ແມ່ປະຊາຊົນບັນດາເຜົ່າພາຍໃນເຂດເທດສະບານເມືອງເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ສົມຫວັງ ແກ້ວວິໄລສັກ, ຫົວໜ້າພະແນກກະສິກຳແລະປ່າໄມ້ແຂວງໄຊຍະບູລີກໍ່ໄດ້ຂື້ນລາຍງານການກະກຽມແລະແພນອານຸລັກ ສັດນໍ້າ - ສັດປ່າແຫ່ງຊາດຂອງແຂວງໄຊຍະບູລີ ທ່ານໄດກ່າວວ່າໃນໄລຍະທີ່ຜ່ານມາການນຳຂັ້ນຕ່າງໆ ໄດ້ເອົາໃຈໃສ່ຊີ້ນຳນຳພາຕໍ່ວຽນງານປົກປັກຮັກສາຊັບພະຍາກອນທຳມະຊາດເປັນຕົ້ນແມ່ນ: ສັດນໍ້າ - ສັດປ່າແລະຊີວະນາໆພັນ ເພຶ່ອເຮັດໃຫ້ຊັບພະຍາກອນປ່າໄມ້, ສັດນໍ້າແລະສັດປ່າມີຄວາມອຸດົມສົມບູນ, ມີການຄຸ້ມຄອງນຳໃຊ້ຕາມນະໂຍບາຍຂອງພັກ - ລັດວາງອອກ ເຊິ່ງໄລຍະຜ່ານມາເມືອງໄຊຍະບູລີໄດ້ມີການບວດຫວັງນໍ້າ ຫ້າມໃຫ້ຫາປາແລະສັດນໍ້າອື່ນໆໃນບໍ່ລິເວດດັ່ງກ່າວ ເຮັດໃຫ້ປາໄດ້ແຜ່ຂະຫຍາຍພັນແລະໃນການຫ້າງຫາກະກຽມແກ້ວັນປ່ອຍປາ ວັນທີ 13 ກໍລະກົດ 2019 ນີ້ ທົ່ວແຂວງໄຊຍະບູລີ ໄດ້ມີແຜນປ່ອຍປາທັງໝົດ 42 ລ້ານໂຕ, ໃນນັ້ນປ່ອຍປາລວມໜູ່ ມີ 55 ຈຸດ, ມີປາທັງໝົດ ແປດແສນກວ່າໂຕ ສະເພາະຢູ່ແຂວງໄຊຍະບູລີ ມີ 7 ຈຸດ, ຄຶ: ຝາຍຫ້ວຍແຂ່ນ, ອ່າງເກັບນໍ້າຊົນລະປະທານນໍ້າຕຽນ, ວັງບວດບ້ານວັງຊອຍ, ບ້ານປົ່ງ, ບ້ານນາໄຮ, ບ້ານໃຫ່ຍ ແລະ ວັງບວດບ້ານນາຕໍ່ນ້ອຍ ມີປາປ່ອຍທັງໝົດ ສາມແສນໂຕ, ມີປາປາກ, ປາເກັດແລບ, ປານິນ, ປາໄນຄຳ, ປາໄນ ປາກິນຫຍ້າ, ປາອິນດາຍ, ປາດຸກ, ເຊິ່ງປາດັ່ງກ່າວ ແມ່ນໄດ້ຮັບການປະກອນສ່ວນ ຈາກພະແນກການ, ອົງການ,ຫ້ອງການ, ພາກສ່ວນລັດ, ລວມໝູ່, ບໍ່ລິສັດເອກະຊົນຜູ້ປະກອບການພາຍໃນແຂວງໄຊຍະບູລີ
ແຫລ່ງຂ່າວ ທີມຂ່າວແຂວງໄຊຍະບູລີ
