ພິທີສະເຫລີມສະຫລອງວັນປະຊາກອນໂລກ ປະຈຳປີ 2019 ໄດ້ຈັດຂື້ນທີ່ນະຄອນຫລວງວຽງຈັນ ໃນວັນທີ 11 ກໍລະກົດ 2019 ທີ່ຜ່ານມາ ພາຍໃຕ້ຫົວຂໍ້: ສົ່ງເສີມສິດທິ ແລະ ທາງເລືອກໃນການດຳລົງຊີວິດ ທີ່ດີສຳລັບທຸກຄົນ. ໂດຍການເຂົ້າຮ່ວມ ຂອງ ທ່ານນາງ ຄຳຈັນ ວົງແສນບູນ ຮອງລັດຖະມົນຕີ ກະຊວງແຜນການ ແລະ ການລົງທຶນ, ມີ ທ່ານນາງ Mariam A.Khan ຜູ້ຕາງຫນ້າອົງການສະຫະປະຊາຊາດ ກອງທຶນສຳລັບປະຊາກອນ UNFPA ປະຈຳ ສປປ ລາວ, ພ້ອມນີ້ຍັງມີບັນດາຜູ້ຕາງຫນ້າ ຈາກອົງການຈັດຕັ້ງມະຫາຊົນ, ອົງການຈັດຕັ້ງສາກົນ, ກະຊວງ, ພະແນກການ, ຫນ່ວຍງານ, ສະຖາບັນ, ໂຮງຮຽນ ທີ່ກ່ຽວຂ້ອງເຂົ້າຮ່ວມ ຢ່າງພ້ອມພຽງ.
ການສະເຫລີມສະຫລອງຄັ້ງນີ້, ໂດຍການຊີ້ນຳ-ນຳພາ ຂອງກະຊວງແຜນການ ແລະ ການລົງທຶນ, ຮ່ວມກັບ ອົງການສະຫະປະຊາຊາດ ກອງທຶນສຳລັບປະຊາກອນ ຫລື UNFPA ປະຈຳ ສປປ ລາວ, ເຊີ່ງເປັນການສະເຫລີມສະຫລອງ ຄົບຮອບ 25 ປີ, ຂອງກອງປະຊຸມສາກົນກ່ຽວກັບວັນປະຊາກອນ ແລະ ການພັດທະນາ ICPD ການສະເຫລີມສະຫລອງ ທີ່ ສປປ ລາວ ຄັ້ງນີ້ ໂດຍເນັ້ນໃສ່ກ່ຽວກັບເນື້ອໃນຄວາມຄຶບຫນ້າ ໃນໄລຍະ 25 ປີຜ່ານມາ ແລະ ມີການສົນທະນາ ກ່ຽວກັບເນື້ອໃນວຽກງານ ທີ່ຍັງຈັດຕັ້ງບໍ່ສຳເລັດ. ຂອງ ICPD ເພື່ອເພີ່ມການຮ່ວມມື ໃນການຈັດຕັ້ງປະຕິບັດ. ສປປ ລາວ ແມ່ນ 1 ໃນ 3 ປະເທດ ທີ່ມີການຫລຸດລົງ ອັດຕາການຕາຍຂອງແມ່ ຢ່າງໄວວາ, ໃນປີ 1990 ມີແມ່ 1,100 ຄົນ ເສຍຊີວິດ ໃນເວລາເກີດລູກ ຫລື ຄອດລູກ, ແຕ່ມາໃນປີ 2015 ອັດຕາດັ່ງກ່າວ ໄດ້ຫລຸດລົງ ເຫລືອ 206 ຄົນ ການຕາຍຕໍ່ເນື່ອງ ໃນ 100,000 ການເກີດລູກ. ອັດຕາການຕາຍຂອງແມ່ ໃນ ສປປ ລາວ ຍັງເປັນສິ່ງທ້າທາຍ ໃນຂົງເຂດອາຊຽນ, ບັນດາຊຸມຊົນທີ່ບໍ່ສາມາດເຂົ້າເຖິງໄດ້ງ່າຍ, ບໍ່ມີເສັ້ນທາງເຂົ້າເຖິງ ກາຍເປັນບັນຫາທ້າທາຍໃນການເຂົ້າເຖິງການບໍລິການທາງສັງຄົມ ທີ່ມີຄຸນນະພາບ, ດ້ານການສຶກສາ, ສາທາ ແລະ ສຸຂະພາບ. ເດັກຍິງ ຍັງຕ້ອງຮັບພາລະເຮັດວຽກເຮືອນ, ມີອັດຕາການອອກໂຮງຮຽນສູງ ແລະ ມີທ່າອ່ຽງທີ່ຈະແຕ່ງງານໄວ ແລະ ຖືພາໃນເວລາທີ່ຍັງນ້ອຍ, ເກືອບ 83 ຄົນ ຕໍ່ເດັກຍິງ 1,000 ຄົນ ໄດ້ໃຫ້ກຳເນີດລູກຄົນທຳອີດ ກ່ອນອາຍຸ 18 ປີ. ການຄົ້ນຄວ້າ ໄດ້ສະແດງໃຫ້ເຫັນວ່າ 75 ສ່ວນຮ້ອຍ ຂອງໄວຫນຸ່ມຍີງ 15-19 ປີ ທີ່ຍັງບໍ່ທັນແຕ່ງງານ ບໍ່ສາມາດເຂົ້າເຖິງ ວີທີຄຸມກຳເນີດແບບທັນສະໄຫມ ແລະ ອີກ 30 ສ່ວນຮ້ອຍ ຂອງແມ່ຍິງ ເຄີຍຖືກຄວາມຮຸນແຮງ. ບັນຫາດັ່ງກ່າວ ສຳລັບພວກເຂົາແມ່ນຕ້ອງໄດ້ຮັບການປັບປຸງ.
ການລົງທຶນດ້ານງົບປະມານ ແລະ ວິຊາການ ມາດຕະການປ້ອງກັນ ເພື່ອແກ້ໄຂບັນຫາທີ່ກ່າວມາ ແມ່ນຄວາມຕ້ອງການອັນຮີບດ່ວນ ສຳລັບ ສປປ ລາວ, ເພື່ອໃຫ້ເທດເຫມາະກັບຕ້ອງການດ້ານເສດຖະກິດ-ສັງຄົມ. ໃນຄະນະດຽວກັນ ຕ້ອງປັບປຸງຄວາມເທົ່າທຽມ ແລະ ການເປັນຢູ່ຂອງແມ່ຍິງ, ຜູ້ຊາຍ ແລະ ໄວຫນຸ່ມ. ການບັນລຸວາລະ ICPD ແມ່ນກຸນແຈອັນສຳຄັນເພື່ອບັນລຸເປົ້າຫມາຍການພັດທະນາແບບຍືນຍົງ, ແຜນດຳເນີນງານ ປະກອບໂດຍກົງໃສ່ເປົ້າຫມາຍ ເຊັ່ນ: SDG ເປົ້າຫມາຍທີ 3 ( ສຸຂະພາບ ແລະ ການເປັນຢູ່ທີ່ດີ ), ເປົ້າຫມາຍທີ 4 ( ການສຶກສາທີ່ມີຄຸນນະພາບ ), ເປົ້າຫມາຍທີ 5 ( ຄວາມສະເມີພາບ ລະຫວ່າງ ຍີງ-ຊາຍ ) ແລະ ເປົ້າຫມາຍທີ 8 ( ວຽກເຮັດງານທຳທີ່ດີ ແລະ ການເຕີບໂຕຂອງເສດຖະກິດ )
ບກ: ກຳປານາດ ລັດຖະເຮົ້າ Kampanath Latthahao
