ວັນທີ 13 ກໍລະກົດ 2019 ຜ່ານມາ ແຂວງອັດຕະປື ໄດ້ມີພິທີມອບ-ຮັບ ເປີດນຳໃຊ້ໂຮງຫມໍ ຫລັງໃໝ່ ຢູ່ເມືອງໄຊເສດຖາ, ເປັນກຽດເຂົ້າຮ່ວມໃນພິທີ ມີ ທ່ານ ຮສ. ດຣ. ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ມີ ທ່ານ ເລັດ ໄຊຍະພອນ ເລຂາພັກ ເຈົ້າແຂວງ ອັດຕະປື, ມີບັນດາການນຳຂອງແຂວງ, ແຂກທີ່ຖືກເຊີນ ແລະ ພະນັກງານຂັ້ນສູງຂອງກະຊວງ ສາທາລະນະສຸກ ແລະ ຄະນະນຳຂົງເຂດສາທາລະນະສຸກແຂວງເຂົ້າຮ່ວມ.
ໂຄງການກໍ່ສ້າງໂຮງໝໍ ເມືອງໄຊເສດຖາ ຫລັງໃໝ່ນີ້ ແມ່ນໄດ້ຖືກອອກແບບເພື່ອຍົກລະດັບ ການບໍລິການ ແລະ ເຮັດຫນ້າທີ່ເປັນສູນກາງປິ່ນປົວຕໍ່ຄົນເຈັບ, ເປັນອາຄານຊັ້ນດຽວ ປະກອບມີ 30 ຕຽງ, ມີອຸປະກອນການແພດທີ່ຈຳເປັນ, ເປັນໂຮງປະເພດ (ຂ) ທີ່ທັນສະໄໝ ຢູ່ໃແຂວງອັດຕະປື ສາມາດໃຊ້ບໍລິການປິ່ນປົວຄົນເຈັບນັບແຕ່ມື້ເປີດນຳໃຊ້ເປັນຕົ້ນໄປ, ລວມມູນຄ່າໃນການກໍ່ສ້າງທັງໝົດ 13 ຕື້ 689 ລ້ານກວ່າກີບ, ໂດຍສະຖານທີ່ຕັ້ງຢູ່ ບ້ານຊ້າຍ, ເມືອງໄຊເສດຖາ ແຂວງອັດຕະປື.
ທ່ານ ຮສ. ດຣ. ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ຍົກໃຫ້ເຫັນວ່າ: ການກໍ່ສ້າງໂຮງໝໍຫລັງໃໝ່ ແລະ ເປີດນຳໃຊ້ຢູ່ເມືອງ ໄຊເສດຖານີ້ ເຊິ່ງເປັນບັນຫາອັນສຳຄັນທີ່ ພັກ ແລະ ລັດຖະບານ ໄດ້ເອົາໃຈໃສ່ ເພື່ອສ້າງຄວາມເຂັ້ມແຂງດ້ານພື້ນຖານໂຄງລ່າງໃຫ້ແກ່ວຽກງານສາທາລະນະສຸກໃນແຂວງ ອັດຕະປື. ການບໍລິການທີ່ດີ, ມີອຸປະກອນທາງດ້ານການແພດທີ່ດີ ເປັນສິ່ງທີ່ປະຊາຊົນທຸກເຜົ່າ ແລະ ຊັ້ນຄົນຮຽກຮ້ອງຕ້ອງການ ເຊິ່ງໂຮງໝໍແຫ່ງນີ້ ຖືກສ້າງຂຶ້ນແນໃສ່ໃນການບົງມະຕິ, ການປິ່ນປົວ ປະຊາຊົນບັນດາເຜົ່າຢູ່ ເມືອງໄຊເສດຖາ...ໃຫ້ມີຄຸນນະພາບດີຂຶ້ນກວ່າເກົ່າ.
