ພິທີມອບ - ຮັບອາຄານ 2 ຫຼັງ ຢ່າງເປັນທາງການ ຄື: ອາຄານພະແນກວິທະຍາສາດ ແລະ ເຕັກໂນໂລຊີແຂວງ ແລະ ພະແນກໄປສະນີໂທລະຄົມມະນາຄົມ ແລະ ການສື່ສານແຂວງຄໍາມ່ວນ. ( ຢູ່ທີ່ບໍລິເວນປ່າສັກ ຕິດກັບເສັ້ນທາງເລກທີ 13 ໃຕ້ ) ພິທີດັ່ງກ່າວໄດ້ຈັດຂື້ນໃນທ້າຍອາທິດຜ່ານມາ, ໂດຍການເຂົ້າຮ່ວມຂອງ ທ່ານ ໂອໄດ ສຸດາພອນ ເຈົ້າແຂວງໆຄໍາມ່ວນ, ມີທ່ານ ທອງໃສ ຊານໄຊຍະ ຮອງລັດຖະມົນຕີກະຊວງ ໄປສະນີໂທລະຄົມມະນາຄົມ ແລະ ການສື່ສານ, ມີທ່ານຫົວໜ້າພະແນກວິທະຍາສາດ ແລະ ເຕັກໂນໂລຊີ ແລະ ພະແນກໄປສະນີໂທລະຄົມມະນາຄົມແລະ ການສື່ສານ ແຂວງຄໍາມ່ວນ., ພ້ອມດ້ວຍຫົວໜ້າພະແນກການອ້ອມຂ້າງແຂວງ, ແຂກຖືກເຊີນ, ບໍລິສັດ ແລະພະນັກງານ-ວິຊາການເຂົ້າຮ່ວມ
ທ່ານ ໄທຍະພອນ ສິງທອງ ພະແນກໄປສະນີ,ໂທລະຄົມມະນາຄົມ ແລະ ການສື່ສານ ແຂວງຄໍາມ່ວນ ໄດ້ລາຍງານຄວາມເປັນມາຂອງໂຄງການກໍ່ສ້າງອາຄານ ພະແນກວິທະຍາສາດ - ເຕັກໂນໂລຊີ ແລະ ພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງຄໍາມ່ວນ ເຊິ່ງມີບໍລິເວນຂອບເຂດຕອນດິນທີ່ຕິດຈອດກັນ ແຕ່ຢູ່ນອນຢູ່ໂຄງການດຽວກັນເລີ້ມລົງມືກໍ່ສ້າງໃນທີ 25 ສິງຫາ 2017 ຈົນມາເຖິງ ວັນທີ 11 ກໍລະກົດ 2019 ຈຶ່ງສໍາເລັດ 100 ສ່ວນຮ້ອຍ . ຫຼັງຈາກນັ້ນທ່ານ ສົມສະນິດ ລາບທະນົນລາດ ຮອງຫົວໜ້າລັດວິສາຫະກິດກໍ່ສ້າງ ແລະ ສໍາຫຼວດອອກແບບເຄຫາສະຖານແຂວງ ໃນນາມຕາງໜ້າບໍລິສັດທີ່ປຶກສາ ໄດ້ລາຍງານກ່ຽວກັບຜົນຂອງການຈັດຕັ້ງປະຕິບັດໂຄງການກໍ່ສ້າງອາຄານ ເຊິ່ງອາຄານພະແນກໄປສະນີ,ໂທລະຄົມມະນາຄົມແລະ ການສື່ສານເປັນອາຄານ 03 ຊັ້ນ, ຂະໜາດກວ້າງ 13 ແມັດ, ຍາວ 35 ແມັດ ແລະ ສໍາລັບອາຄານ ພະແນກ ພະແນກວິທະຍາສາດ ແລະ ເຕັກໂນໂລຊີ ເປັນອາຄານ 03 ຊັ້ນ ຂະໜາດກວ້າງ 13 ແມັດ, ຍາວ 29 ແມັດ, ທັງສອງອາຄານປະກອບມີຫ້ອງເຮັດວຽກ, ຫ້ອງປະຊຸມ, ຫ້ອງນໍ້າ, ມີເຮືອນຈອດລົດ, ຫຼັກທຸງ, ຮົ້ວອ້ອມ ແລະ ລະບົບຕົກແຕ່ງເດີ່ນຄົບຊຸດ ມູນຄ່າການກໍ່ສ້າງອາຄານທັງ 02 ພະແນກລວມທັງໝົດ 9.781 ລ້ານກວ່າກີບ ( 9 ຕື້ກວ່າກີບ ) ໃນນັ້ນອາຄານພະແນກ ພະແນກໄປສະນີ,ໂທລະຄົມມະນາຄົມແລະ ການສື່ສານ ແຂວງມີມູນຄ່າກໍ່ສ້າງ ( 5 ຕື້ກວ່າກີບ ) ສ່ວນວ່າອາຄານພະແນກວິທະຍາສາດ ແລະ ເຕັກໂນໂລຊີແຂວງມີມູນຄ່າກໍ່ສ້າງ ( 4 ຕື້ກວ່າກີບ )ໂຄງການກໍ່ສ້າງອາຄານພະແນກດັ່ງກ່າວແມ່ນ ບໍລິສັດ ເປັນຜູ້ຮັບເໝົາກໍ່ສ້າງ.
ໃນພິທີຍັງມີການຜ່ານບົດບັນທຶກມອບ-ຮັບອາຄານ ຫຼັງຈາກນັ້ນ ກໍ່ໄດ້ມີການມອບຂອງ ຂວັນທີ່ລະນຶກໃຫ້ແກ່ແຂກຜູ້ຊົງຄຸນວຸດທິ ທີ່ເຂົ້າຮ່ວມ ໃນພິທີພ້ອມທັງມີການຕັດແຖບຜ້າເພື່ອ ມອບ-ຮັບ ອາຄານທັງ 02 ຫຼັງຢ່າງເປັນທາງການ ແລະ ຄະນະປະທານເລາະຊົມເບິ່ງລະບົບການກໍ່ສ້າງອາຄານຕື່ມອີກ.
ແຫລ່ງຂ່າວ ຈາກແຂວງຄຳມ່ວນ
