ກອງປະຊຸມດັ່ງກ່າວ ຈັດຂື້ນໃນວັນທີ 26 ກໍລະກົດ 2019 ທີ່ຜ່ານມາ, ທີ່ໂຮງແຮມແລນ-ມາກ ນະຄອນຫລວງວຽງຈັນ, ໂດຍມີຄະນະປະທານກິຕິມະສັກ, ປະທານ ແລະ ຄະນະບໍລິຫານງານສະມາຄົມນັກທຸລະກິດແມ່ຍິງລາວ, ສະມາຊິກສະມາຄົມແມ່ຍິງ ທົ່ວປະເທດເຂົ້າຮ່ວມ ເກືອບ 200 ທ່ານ.
ກອງປະຊຸມພົບປະນັກທຸລະກິດແມ່ຍິງ ທົ່ວປະເທດ ພາຍໃຕ້ຫົວຂໍ້: ການສ້າງແຮງຈູງໃຈ ໃນການດຳເນີນທຸລະກິດ ເພື່ອໃຫ້ກ້າວທັນຍຸກດີຈິຕອນ ໂດຍບໍ່ປະຖີ້ມໃຜໄວ້ຂ້າງຫລັງ ແມ່ນມີຄວາມສຳຄັນຫລາຍ, ເຊີ່ງໃນນີ້ ທ່ານນາງ ຈັນທະຈອນ ວົງໄຊ ປະທານຄະນະບໍລິຫານງານສະມາຄົມນັກທຸລະກິດແມ່ຍິງລາວ ໄດ້ຍົກໃຫ້ເຫັນຜົນງານການຈັດຕັ້ງວຽກງານ ໃນໄລຍະ 6 ເດືອນຕົ້ນປີ 2019 ແລະ ແຜນງານ 6 ເດືອນທ້າຍປີ 2019, ໃນກອງປະຊຸມດັ່ງກ່າວ ຍັງໄດ້ຈັດການຮັບເອົາສະມາຊິກໃຫມ່ ຈຳນວນ 14 ທ່ານ ເຂົ້າເປັນສະມາຊິກສະມາຄົມນັກທຸລະກິດແມ່ຍິງລາວ ເພີ່ມຕື່ມ
ໃນພິທີ ທ່ານນາງ ຈັນທະຈອນ ວົງໄຊ ປະທານຄະນະບໍລິຫານງານສະມາຄົມນັກທຸລະກິດແມ່ຍິງລາວ ໄດ້ກ່າວສະແດງການຕ້ອນຮັບບັນດາສະມາຊິກໃຫມ່ ພ້ອມທັງລາຍງານການເຄື່ອນໄຫວ ແລະ ການຈັດຕັງວຽກງານ ໃນໄລຍະ 6 ເດືອນຕົ້ນປີ 2019 ແລະ ຜ່ານຮ່າງແຜນທິດທາງ 6 ເດືອນທ້າຍປີ 2019 ເພື່ອສຶບຕໍຈັດຕັ້ງປະຕິບັດວຽກງານໃນຕໍ່ຫນ້າ, ໃນການປະຊຸມຄັ້ງນີ້ ຍັງເປັນການພົບປະແລກປ່ຽນຄວາມຮູ້ ແລະ ປະສົບການທາງດ້ານການດຳເນີນທຸລະກິດ ໃນຫົວຂໍ້ຕ່າງໆ ກັບບັນດາສະມາຊິກນັກທຸລະກິດແມ່ຍິງດ້ວຍກັນ. ພ້ອມກັນນັ້ນ ທ່ານ ປະທານ ຄະນະບໍລິຫານງານສະມາຄົມນັກທຸລະກິດແມ່ຍິງລາວ ຍັງໄດ້ຍົກໃຫ້ເຫັນຕື່ມອີກເຸິງວັດຖຸປະສົງຫລັກ ໃນການສ້າງຕັ້ງສະມາຄົມຂຶເນມາ ເພື່ອຊຸກຍູ້ສົ່ງເສີມ ແລະ ເອື້ອອຳນວຍຄວາມສະດວກ ໃຫ້ແກ່ສະມາຊິກ ແລະ ຜູ້ປະກອບການແມ່ຍິງລາວ ໃນທົ່ວປະເທດ ໄດ້ດຳເນີນການເຄື່ອນໄຫວສະດວກ ແລະ ງ່າຍຂື້ນ, ບົນພື້ນຖານແນວທາງນະໂຍບາຍຂອງພັກ-ລັດ ແລະ ລະບຽບກົດຫມາຍຂອງລັດ. ພ້ອມກັນສ້າງແຮງຈູງໃຈ ເຊີ່ງກັນ ແລະ ກັນ ໃນການດຳເນີນທຸລະກິດຂອງຕົນ ກາຍເປັນກ້ອນກຳລັງແຮງອັນແຂງແກ່ນຂອງຊາດ ກ້າວເດີນໄປພ້ອມໆກັນ ໂດຍບໍ່ປະຖີ້ມໃຜໄວ້ຂ້າງຫລັງ. ໄປພ້ອມກັບຂະບວນຮັກຊາດ ແລະ ພັດທະນາ.
ກອງປະຊຸມພົບປະ ຄັ້ງນີ້, ບັນດາສະມາຊິກນັກທຸລະກິດແມ່ຍີງລາວ ຍັງໄດ້ຮັບຟັງການສຳມະນາໃນຫລາຍໆຫົວຂໍ້ ເປັນຕົ້ນ: ການສຳມະນາ ໃນຫົວຂໍ້ ການກະກຽມຮອງຮັບການປ່ຽນແປງໃນການດຳເນີນທຸລະກິດ ຕາມຍຸກ 4,0 ຈາກຄະນະວິທະຍາກອນລຸ້ນໃຫມ່, ນອກນັ້ນ ຍັງໄດ້ມີການສົນທະນາ ກ່ຽວກັບປະສົບການໃນການດຳເນີນທຸລະກິດ ຈາກຜູ້ທີ່ປະສົບຜົນສຳເລັດ ມາກ່ອນແລ້ວ.
ໃນໂອກາດອັນມີຄວາມຫມາຍສຳຄັນໃນການຈັດກອງປະຊຸມພົບປະ ຄັ້ງນີ້, ພາກບ່າຍຂອງວັນດຽວກັນ ກອງປະຊຸມ ຍັງໄດ້ຮັບກຽດ ຟັງຄຳໂອລົມຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ເຊີ່ງເປັນໂອກາດທີ່ມີຄວາມຫມາຍສຳຄັນ. ຕໍ່ກັບການໂອລົມ ຈໍ່ກອງປະຊຸມນັກທຸລະກິດແມ່ຍິງລາວ ທົ່ວປະເທດ ຄັ້ງນີ້, ທ່ານ ນາຍົກລັດຖະມົນຕີ ໄດ້ສະແດງຄວາມຊົມເຊີຍ ຕໍ່ຄະນະບໍລິຫານງານສະມາຄົມນັກທຸລະກິດແມ່ຍິງລາວ ຕໍ່ກັບຜົນງານ ໃນການຈັດຕັ້ງປະຕິບັດ ຕະຫລອດໄລຍະຜ່ານມາ ເຊີ່ງເຮັດໃຫ້ບັນດາສະມາຊິກແມ່ຍິງ, ນັກທຸລະກິດຍິງ ໄດ້ມີການປະສານສົມທົບສາມັກຄີ ເປັນກຸ່ມກ້ອນ ສ້າງຄວາມເຂັ້ມແຂງ ຕໍ່ການດຳເນີນທຸລະກິດ ປະກອບສ່ວນສຳຄັນໃນການເສີມສ້າງເສດຖະກິດ, ການພັດທະນາຕົນເອງ ກ້າວສູ່ລະດັບສາກົນ ສ້າງວິຊາຂີບ, ສ້າງວຽກເຮັດງານທຳ, ສ້າງຄວາມເຂັ້ມແຂງ ຂຶ້ນໄປເລື້ອຍໆ. ຄຽງຄູ່ກັນນັ້ນ ກໍ່ຕ້ອງໄດ້ມີການພັດທະນາຢ່າງຕໍ່ເນື່ອງ ມີການປັບປ່ຽນກົນລະຍຸດ-ວິທີການ ແລະ ການຕະຫລາດ, ການພົວພັນ ເຊີ່ງກັນ ແລະ ກັນ ແລະ ສາກົນ ເພື່ອນມິດໃກ້ຄຽງ ແລະ ພາກພື້ນ. ຕາມຍຸກດີຈີຕອນ.
ບກ: ກຳປານາດ ລັດຖະເຮົ້າ
ພາບ: ສິງຫາ ເລືອງວັນ
