ກົມເຕັກໂນໂລຊີ ດິຈິຕ໋ອນ, ກະຊວງວິທະຍາສາດ ແລະ ເຕັກໂນໂລຊີ ແລະ ບໍລິສັດ ເຈແອວເອສ ໄອທີ ໂຊລູເຊີ້ນ ຈຳກັດ. ຈຶ່ງໄດ້ເຊັນສັນຍາຮ່ວມມືສ້າງສູນບໍລິການ ໃຫ້ຄຳປຶກສາດ້ານຄວາມປອດໄພ ຂອງລະບົບເຕັກໂນໂລຊີຂໍ້ມູນຂ່າວສານ ຂຶ້ນວັນທີ 25 ກໍລະກົດ 2019 ຜ່ານມາ ໂດຍການລົງນາມຂອງ ທ່ານ ແກ້ວນະຄອນ ໄຊສຸລຽນ, ຫົວໜ້າກົມເຕັກໂນໂລຊີດິຈິຕ໋ອນ ແລະ ທ່ານ ວົງພູທອນ ສີຈັນທະລາດ, ປະທານ ບໍລິສັດ ເຈແອວເອສ ໄອທີ ໂຊລູເຊີ້ນ ຈຳກັດ.
ພິທີລົງນາມດັ່ງກ່າວ ໄດ້ຮັບກຽດການເຂົ້າຮ່ວມເປັນປະທານຂອງ ທ່ານ ສຈ. ດຣ. ບໍ່ວຽງຄໍາ ວົງດາລາ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ໂດຍມີ ບັນດາທ່ານ ຮອງ ລັດຖະມົນຕີ, ຫົວໜ້າຫ້ອງການ, ກົມ, ສະຖາບັນ, ແຂກທີ່ຖຶກເຊີນຈາກພາກສ່ວນຕ່າງໆອ້ອມຂ້າງກະຊວງ ແລະ ພະນັກງານວິຊາການສອງຝ່າຍ ເຂົ້າຮ່ວມເປັນສັກຂີພິຍານການລົງນາມຄັ້ງນີ້.
ທ່ານ ສຸລິຍາ ແສງດາລາວົງ, ຮອງຫົວໜ້າກົມເຕັກໂນໂລຊີດິຈິຕ໋ອນ ໄດ້ກ່າວວ່າ: ລະບົບ ໄອທີ ທັນສະໄໝ ເຖິງວ່າຈະມີຄຸນປະໂຫຍດຫລາຍດ້ານ (ມີດ້ານບວກ) ແຕ່ກໍຍັງມີບາງດ້ານທີ່ເປັນ ອັບປະໂຫຍດ (ດ້ານລົບ) ຄຽງຄູ່ກັນໄປ ເຊັ່ນ: ຄວາມປອດໄພ, ການໂຈນລະກໍາຂໍ້ມູນ ແລະ ການກໍ່ອາສະຍາກໍາ ທາງລະບົບຄອມພິວເຕີ ທີ່ເອີ້ນກັນວ່າ “(Cyber Crime / Cyber Security)”
ເປັນຕົ້ນ. ດ້ານລົບໄດ້ສ້າງຄວາມເສຍຫາຍໃຫ້ແກ່ ເສດຖະກິດ-ສັງຄົມ ແລະ ຄວາມໝັ້ນຄົງ ຂອງຊາດ ຊຶ່ງເກີດຂື້ນຢູ່ໃນຫລາຍປະເທດຜ່ານມາແລ້ວ. ໃນເມື່ອວຽກງານຄວາມປອດໄພດ້ານໄອທີ ໄດ້ມີຄວາມສຳຄັນຄືແນວນັ້ນ, ກົມເຕັກໂນໂລຊີດິຈິຕ໋ອນ ຊຶ່ງມີພາລະບົດບາດ ໃນການຄຸ້ມຄອງມະຫາພາກ, ເຮັດການຄົ້ນຄວ້າ-ພັດທະນາ ແລະ ສົ່ງເສີມໃຫ້ມີການນຳໃຊ້ ລະບົບໄອທີ-ດິຈິຕ໋ອນ ຢ່າງ ກ້ວາງຂວາງ, ຖືກຕ້ອງ ແລະ ມີຄວາມປອດໄພສູງ. ສະນັ້ນ, ກົມຈຶ່ງໄດ້ສຶກສາ ແລະ ສ້າງເງື່ອນໄຂ ໃນການຄົ້ນຄວ້າສ້າງລະບຽບການ ແລະ ພັດທະນາລະບົບຄວາມປອດໄພດ້ານໄອທີ (IT Security) ຕິດພັນກັບການທົດສອບລະບົບໄອທີ ທີ່ມີການນຳໃຊ້ຢູ່ໃນອົງກອນຕ່າງໆ ທັງພາກລັດ ແລະ ເອກະຊົນ ເພື່ອນຳໄປສູ່ ຂະບວນການຂໍການຢັ້ງຢືນ-ຮັບຮອງ ມາດຕະຖານຄວາມປອດໄພດ້ານ ໄອທີຂອງ ສປປ ລາວ ຫລື ສາກົນ ທີ່ເອີ້ນວ່າ: (ISO:27001) ຊຶ່ງເປັນມາດຕະຖານສາກົນ ປະກອບດ້ວຍ 114 ມາດຕະການ ເພື່ອຮັບປະກັນໃຫ້ແກ່ການນຳໃຊ້ລະບົບໄອທີ-ດິຈິຕ໋ອນ ທີ່ມີຄວາມປອດໄພສູງ.
ຜ່ານການສຶກສາຂໍ້ມູນເບື້ອງຕົ້ນເຫັນວ່າ: ມີບໍລິສັດ/ຜູ້ປະກອບການ ທີ່ເປັນຜູ້ໃຫ້ບໍລິການດ້ານລະບົບໄອທີ, ອິນເຕີເນັດ, ໂທລະຄົມ ແລະ ສະຖາບັນການເງິນ ໃນ ສປປ ລາວ ຍັງກວມອັດສ່ວນຫລາຍ ທີ່ຍັງບໍ່ທັນໃຫ້ຄວາມສໍາຄັນດ້ານຄວາມປອດໄພລະບົບ ໄອທີ ຂອງຕົນ ເທົ່າທີ່ຄວນ ແລະ ມີຫລາຍອົງກອນແມ່ນຍັງບໍ່ທັນໄດ້ຮັບການຢັ້ງຢືນມາດຕະຖານຄວາມປອດໄພຂອງລະບົບໄອທີ
ISO:27001 ຫລື ISO ອື່ນໆ ທີ່ກ່ຽວຂ້ອງຊຶ່ງເປັນຊ່ອງວ່າງໃຫ້ແກ່ກຸ່ມຄົນທີ່ບໍ່ຫວັງດີ (Hacker) ສາມາດເຈະລະບົບເພື່ອໂຈນລະກໍາຂໍ້ມູນສໍາຄັນຂອງອົງກອນ ລວມທັງການເຈະເຂົ້າໃນລະບົບຄອມພິວເຕີ ຂອງ ສະຖາບັນການເງິນ, ທະນາຄານ ແລະ ອື່ນໆ ຊຶ່ງຈະສ້າງຄວາມເສຍຫາຍ ຕໍ່ຊັບສິນຂອງອົງກອນ ຂອງລັດ ແລະ ເອກະຊົນ ກໍຄື ຊັບສິນຂອງປະຊາຊົນ ເປັນຈໍານວນບໍ່ໜ້ອຍ.
ທ່ານ ວົງພູທອນ ສີຈັນທະລາດ ປະທານ ບໍລິສັດ ເຈແອວເອສ ໄອທີ ໂຊລູເຊີ້ນ ຈຳກັດ ໄດ້ກ່າວວ່າ: ຍຸກແຫ່ງສັງຄົມຂໍ້ມູນຂ່າວສານ, ຍຸກແຫ່ງການເຊື່ອມໂຍງດ້ວຍລະບົບ ໄອທີ/ໄອຊີທີ, ດ້ວຍເຫດນີ້ຫຼາຍປະເທດໃນທົ່ວໂລກ ໄດ້ຖຶສຳຄັນຕໍ່ກັບບັນຫາຄວາມປອດໄພ ແລະ ມາດຕະຖານລະບົບ ໄອທີ ເນື່ອງຈາກມີກຸ່ມຄົນທີ່ບໍ່ຫວັງດີ ໄດ້ສວຍໃຊ້ເຕັກໂນໂລຊີທີ່ທັນສະໄໝ ເພື່ອເຈາະເຂົ້າໃນລະບົບຂໍ້ມູນຂ່າວສານຂອງບັນດາອົງກອນທີ່ສຳຄັນ ທັງພາກລັດ ແລະ ເອກະຊົນ ຊຶ່ງຕິດພັນກັບຄວາມໜັ້ນຄົງດ້ານຂໍ້ມູນຂ່າວສານ ແລະ ສປປ ລາວ ກໍເປັນໜຶ່ງໃນບັນດາປະເທດທີ່ພົບບັນຫາດັ່ງກ່າວ. ສະນັ້ນ, ບໍລິສັດ ຂອງພວກເຮົາຈຶ່ງເຫັນວ່າບັນຫາ Cyber Security ເປັນວຽກທີ່ມີຄວາມສຳຄັນທີ່ສຸດ ແລະ ພວກເຮົາກໍມີບົດຮຽນຜ່ານການສຶກສາຄົ້ນຄວ້າ ແລະ ຮ່ວມມືກັບຫຼາຍບໍລິສັດທີ່ມືຊື່ສຽງທາງດ້ານການຮັກສາຄວາມປອດໄພໃນລະບົບໄອທີ.
