ໂດຍມີເປົ້າໝາຍເພື່ອນຳໃຊ້ເຂົ້າໃນການສ້າງລະບົບການເກັບກຳ, ລວບລວມ ແລະ ວິເຄາະຂໍ້ມູນ ດ້ານວຽກງານອາຫານທ່ຽງໃນໂຮງຮຽນໃນ ສປປ ລາວ. ການສະໜັບສະໜູນວຽກງານອາຫານທ່ຽງ ໃນໂຮງຮຽນຂອງລັດຖະບານ, ອົງການອາຫານໂລກ ໄດ້ສະ ໜອງອາຫານທ່ຽງ ທີ່ມີໂພຊະນາການໃຫ້ແກ່ເດັກນັກຮຽນໃນຂອບເຂດທົ່ວປະເທດນັບແຕ່ປີ 2002 ເປັນຕົ້ນມາ. ແຕ່ລະມື້ນັກຮຽນກວ່າ 145,000 ຄົນ, ທີ່ມາຈາກໂຮງຮຽນ 1,450 ກວ່າແຫ່ງທົ່ວປະເທດ ໄດ້ຮັບອາຫານທ່ຽງ ທີ່ເປັນຫຼາຍກວ່າອາຫານທ່ຽງ ເພາະນອກຈາກອາຫານແລ້ວ ອົງການຍັງສະໜອງຊຸດເຄື່ອງມືການຊ່ວຍເຫຼືອແກ່ໂຮງຮຽນກໍ່ຄືຊຸມຊົນ ເຊັ່ນ: ການຕິດຕັ້ງລະບົບນ້ຳ, ຕິດຕັ້ງລະບົບ ການຮັກສາສຸຂະອານະໄມ, ສວນຄົວໃນໂຮງຮຽນ ແລະ ຕິດຕັ້ງເຮືອນຮົ່ມ ແລະ ໜອງປາໃຫ້ກັບໂຮງຮຽນເພື່ອໃຫ້ແນ່ໃຈວ່ານັກຮຽນໄດ້ຮັບອາຫານທີ່ສົດ ແລະ ປອດໄພໃນທຸກໆມື້ ນອກຈາກນີ້, ຍັງໄດ້ສະໜອງກິດຈະກຳການເສີມສ້າງທັກສະດ້ານການອ່ານ ແລະ ຂຽນ, ພ້ອມດຽວກັນນັ້ນ, ຍັງໄດ້ປູກຈິດສຳນຶກດ້ານໂພຊະນາການ ໃຫ້ກັບພວກເຂົານຳອີກ.
ອາຫານທ່ຽງໃນໂຮງຮຽນປະກອບສ່ວນເຂົ້າໃນການຮັກສາສຸຂະພາບ, ທັກສະໃນການຮຽນຮູ້ ແລະ ການປູກຈິດ ສຳນຶກດ້ານໂພຊະນາການໃຫ້ບັນດາເດັກນ້ອຍ ແລະ ຊຸມຊົນ. ປະຈຸບັນ ອົງການອາຫານໂລກ- ໄດ້ເລີ່ມມີການມອບໂອນວຽກງານອາຫານທ່ຽງ ຂອງໂຮງຮຽນໃຫ້ລັດຖະບານ ແລະ ຊຸມຊົນເປັນຜູ້ສືບ ຕໍ່ໃນການຈັດຕັ້ງປະຕິບັດ ເທື່ອລະບາດກ້າວ. ຮອດປີ 2021, ອົງການອາຫານໂລກ ຈະປ່ຽນຮູບແບບການຊ່ວຍເຫຼືອໂດຍການຫັນໄປສູ່ການຊ່ວຍເຫລືອທາງດ້ານເຕັກນິກ ແທນການສະໜອງອາຫານ ແລະ ເປັນການມອບວຽກງານອາຫານທ່ຽງ ໃຫ້ເປັນໜ້າທີ່ຮັບຜິດຊອບຂອງລັດຖະບານລາວ. ເພື່ອໃຫ້ແນ່ໃຈວ່າການຈັດສົ່ງອາຫານປະຈຳວັນໃຫ້ແກ່ເດັກນ້ອຍໃນໂຮງຮຽນປະສົບຜົນສຳເລັດຕາມໄລຍະທີ່ກຳນົດໄວ້ອົງການອາຫານໂລກ ປະຈຳ ສປປ ລາວ ໄດ້ມອບຄອມພິວເຕີແທັບເລັດໃຫ້ແກ່ຜູ້ອຳນວຍການ ຂອງແຕ່ລະໂຮງຮຽນ ຄົນລະ 1 ໜ່ວຍ, ເຊິ່ງບັນດາຜູ້ອຳນວຍການໂຮງຮຽນແມ່ນຈະໄດ້ຮັບການຝຶກອົບຮົມວິຊາການກ່ຽວກັບການລາຍງານ, ການຕິດຕາມກວດກາ ແລະ ການໃສ່ຂໍ້ມູນ. ຂໍ້ມູນດັ່ງກ່າວຈະຖືກກວດສອບໂດຍພະນັກງານກະຊວງໃນຂັ້ນແຂວງ ແລະ ຂັ້ນສູນກາງ, ເຊິ່ງຂໍ້ມູນເຫຼົ່ານັ້ນແມ່ນຈະໄດ້ນຳໄປເຂົ້າໃນລະບົບຂໍ້ມູນຂ່າວສານດ້ານການຄຸ້ມຄອງການສຶກສາ ເພື່ອລວມເຂົ້າໃນການລາຍງານສະຖິຕິແຫ່ງຊາດຂອງລັດຖະບານແຫ່ງ ສປປ ລາວ.
