ດ້ວຍຄວາມເປັນຫ່ວງເປັນໄຍ ຂອງການນຳຂັ້ນແຂວງ ພ້ອມຄະນະ ທີ່ມີຕໍ່ປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມ ຈຶ່ງໄດ້ມີການລະດົມວັດຖຸ,ປັດໃຈນຳສັງຄົມ ແລະ ພະແນກການຕ່າງໆອ້ອມຂ້າາງແຂວງ ເພື່ອນຳມາມອບຊ່ວຍເຫຼືອ ປະຊາຊົນຜູ້ທີ່ຖືກປະສົບໄພນໍ້າຖ້ວມ ດັ່ງນັ້ນ ມາໃນວັນຕອນບ່າຍວັນທີ 11 ກັນຍານີ້ ຢູ່ທີ່ບ້ານປ່າຜັກເນົ່າ ເມືອງວິລະບູລີ. ການນຳຂັ້ນແຂວງພ້ອມຄະນະນຳໂດຍ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ສະມາຄົມນັກທຸລະກິດຍິງແຂວງ, ຄອບຄົວເຈົ້າແຂວງ ບໍລິສັດຫ້າງຮ້ານ ພ້ອມມີບັນດາການນຳເມືອງວິລະບູລີ ໄດ້ລົງມອບເຄື່ອງຊ່ວຍເຫຼືອ ໃຫ້ປະຊາຊົນ ຈຳນວນ 5 ບ້ານຂອງເມືອງວິລະບູລີ ຄື: ບ້ານປ່າຜັກເນົ່າ, ນາສະເລາະ, ເລົ່າຫຼວງ, ຂີ່ຄັ່ງ ແລະ ບ້ານນາຊູ.
ສຳລັບເຄື່ອງທີ່ນຳມາມອບໃນຄັ້ງນີ້ ປະກອບມີເຂົ້າສານ, ນໍ້າດື່ມ ແລະ ເກືອຈຳນວນໜຶ່ງ ລວມມູນຄ່າເປັນເງິນ 44 ລ້ານ 2 ແສນກີບ ໃນນັ້ນກໍ່ໄດ້ມີໂຄງການຂຸດຄົ້ນ ບໍ່ທອງຄຳ ເຊໂປນ ມອບເຂົ້າສານ10 ໂຕນ ລວມມູນຄ່າເປັນເງິນ 90 ລ້ານກີບ ໃຫ້ການນໍາເມືອງວິລະບູລີ ເພື່ອຊ່ວຍເຫຼືອຜູ້ປະສົບໄພນໍ້າຖ້ວມ ຕ່າງໜ້າເປັນສັກຂີພະຍານຂອງທ່ານເຈົ້າແຂວງ, ມີບໍລິສັດ vsv ມອບຊ່ວຍເຫຼືອ 50 ລ້ານກີບ, ບໍລິສັດໂຊກໄຊການຄ້າ 30 ລ້ານກີບ, ສະມາຄົມຈີນ ປະກອບສ່ວນເຂົ້າສານ ແລະ ນໍ້າດື່ມ ມູນຄ່າ 5 ລ້ານ 5 ແສນກີບ, ຄອບຄົວການນໍາ + ສະມາຄົມນັກທຸລະກິດຍິງແຂວງ + ບໍລິສັດ ອິນທິຈັກ +ບໍລິສັດ ສະຫວັນວາລີການຄ້າ + ກຸ່ມເລດີ່ ຈາກວຽງຈັນ + ຄອບຄົວ ທ່ານ ສຽວສະຫວາດ ຈຸນລະມຸນຕີ ປະກອບອາຫານແຫ້ງ, ຢາແດງ 382 ຊຸດ, ເຂົ້າຈີ່ປາເຕ 300 ກ້ອນ, ເຂົ້າສຸກຊີ້ນແຫ້ງ 100 ຊຸດ ລວມມູນຄ່າ ທັງໝົດຈາກການລະດົມ ແລະ ການປະກອບສ່ວນ ຂອງບໍລິສັດຫ້າງຮ້ານ 162 ລ້ານ 960.000 ກີບ.
