ສະຖາບັນວິຈິດສິນແຫ່ງຊາດ ຮ່ວມກັບ ບໍລິສັດ ຜະລິດ-ໄຟຟ້າລາວ ມະຫາຊົນ, ໄດ້ຈັດພິທີມອບລາງວັນການແຂ່ງຂັນການແຕ້ມຮູບ ໃນຫົວຂໍ້: ພະລັັງງານທີ່ຍືນຍົງສຳລັບຊາດ, ໃນວັນທີ 20 ມິຖຸນາ ທີ່ຜ່ານມາ ທີ່ສະຖາບັນວິຈິດສິນແຫ່ງຊາດ ໂດຍໃຫ້ກຽດເຂົ້າຮ່ວມຂອງ ທ່ານ ປະລິຍາເອກ ໄມ່ສິງ ຈັນບຸດດີ, ຫົວໜ້າສະຖາບັນວິຈິດສິນແຫ່ງຊາດ, ມີນາງ ສຸກສັນ ພົງພິລາ, ຜູ້ຊ່ວຍຜູ້ອຳນວຍການໃຫຍ່ບໍລິສັດຜະລິດ-ໄຟຟ້າລາວ ມະຫາຊົນ, ມີບັນດາຫົວໜ້າກົມ, ຮອງກົມ, ຮອງຫົວໜ້າສະຖາບັນ, ສີລະປິນແຫ່ງຊາດ, ຄູ-ອາຈານ, ນັກສຶກສາ ແລະ ແຂກຖືກເຊີນເຂົ້າຮ່ວມ.
ການແຂ່ງຂັນໃນຄັ້ງນີ້ ແມ່ນເລີ່ມມາແຕ່ ວັນທີ 21 ເມສາ ຈົນເຖິງ ວັນທີ 20 ມິຖຸນາ 2017, ຊຶ່ງການແຂ່ງຂັນແມ່ນໄດ້ມີການຄັດເລືອກ 3 ຮອບ, ໃນຮອບທໍາອິດຄັດຈາກ 50 ກວ່ານ້ອງ ທີ່ສົ່ງຜົນງານທີ່ເຂົ້າຮ່ວມການແຂ່ງຂັນ ໃຫ້ເຫຼືອຈຳນວນ 12 ນ້ອງ ຜ່ານຮອບທີ 2 ຫຼັງຈາກນັ້ນທັງ 12 ນ້ອງທີ່ຜ່ານເຂົ້າຮອບແມ່ນໄດ້ເດີນທາງໄປບັນດາເຂື່ອນຜະລິດ-ໄຟຟ້າລາວ ທີ່ເປັນຜູ້ຄຸ້ມຄອງລວມມີ 11 ເຂື່ອນ ແຕ່ເໜືອຕະຫຼອດໃຕ້ ໃຊ້ເວລາ 3-4 ມື້ ເພື່ອແຕ້ມຮູບ ແລະ ສ້າງສັນຜົນງານໃນສະຖານທີ່ຕົວຈິງ ຄຽງຄູ່ກັບການທັດສະນະສຶກສາ, ຮຽນຮູ້ວຽກງານຜະລິດ-ພະລັງງານໄຟຟ້າ ຂອງບໍລິສັດ ຜະລິດ-ໄຟຟ້າລາວ ມະຫາຊົນ.
ກິດຈະກຳໃນຄັ້ງນີ້ ຖືວ່າເປັນຄັ້ງທຳອິດຂອງການແຂ່ງຂັນແຕ້ມຮູບຂອງສະຖາບັນວິຈິດສິນແຫ່ງຊາດ ຮ່ວມກັບ ບໍລິສັດ ຜະລິດ-ໄຟຟ້າລາວ ມາຫາຊົນ ຈັດຂື້ນກໍ່ເພື່ອເປັນການເປີດໂອກາດໃຫ້ກັບນັກຮຽນ, ນັກສຶກ ໄດ້ເຫັນຄວາມສຳຄັນຂອງການຜະລິດ-ພະລັງງານໄຟຟ້າ ຄຽງຄູ່ກັບການຮັກສາສິ່ງແວດລ້ອມ, ທຳມະຊາດ ແລະ ພັດທະນາ ສັງຄົມເພື່ອໃຫ້ມີພະລັງງານທີ່ຍືນຍົງສຳລັບຊາດຕະຫຼອດໄປ, ພ້ອມນີ້ຍັງເປັນການສະໜັບສະໜູນ ແລະ ຊຸກຍູ້ໃຫ້ນັກສຶກສາ ສະຖາບັນວິຈິດສິນແຫ່ງຊາດ ໄດ້ສະແດງຄວາມຮູ້, ຄວາມສາມາດ ສ້າງສັນຜົນງານ ຜ່ານຮູ້ແຕ້ມ ໃຫ້ອອກສູ້ສາຍຕາສັງຄົມ ໄດ້ເຂົ້າໃຈກ່ຽວກັບວຽກງານການຜະລິດ-ພະລັງງານໄຟຟ້າເພີ່ມຂື້ນຕື່ມ.
ສໍາລັບ ຜູ້ທີ່ໄດ້ຮັບລາງວັນຊະນະເລີດ: ອັນດັບ 1 ໄດ້ແກ່: ທ້າວ ກີ້ຄໍາ ວົງກົດ ນັກສຶກສາພາກວິຊາຈິດຕະກໍາ ປີທີ I ທຶນການສຶກສາ ຈໍານວນ 5.000.000 ກີບ, ອັນດັບ 2 ໄດ້ແກ່: ທ້າວ ບຸນທັນ ສຸດພັນ ນັກສຶກ ພາກວິຊາຈິດຕະກໍາ ປີທີ III, ຈຳນວນ 4.000.000 ກີບ, ອັນດັບ 3 ໄດ້ແກ່: ນາງ ມິນຕາ ອິນຊີຊຽງໃໜ່ ນັກສຶກສາພາກວິຊາອອກແບບນິເທດສິນ ປີທີ I, ຈໍານວນ 3.000.000 ກີບ, ອັນດັບ 4 ໄດ້ແກ່: ທ້າວ ອິນແປງ ຈັນມະນີ ນັກສຶກສາ ພາກວິຊາຈິດຕະກໍາ ປີທີ IV, ແລະ ເງີນສົດ ຈໍານວນ 2.000.000 ກີບ, ອັນດັບ 5 ໄດ້ແກ່: ທ້າວ ແຫຼ້ ດວງບັນດິດ ນັກສຶກສາ ພາກວິຊາຈິດຕະກໍາ ປີທີ IV, ຈໍານວນ 1.500.000 ກີບ, ອັນດັບ 6 ໄດ້ແກ່: ທ້າວ ສຸກສັນ ດວງໄຊ ນັກສຶກ ພາກວິຊາຈິດຕະກໍາ ປີທີ I, ຈຳນວນ 1.000.000 ກີບ ແລະ ລາງວັນຊົມເຊີຍ 6 ລາງວັນ, ລາງວັນລະ 500.000 ກີບ.
Editor: ດາວໄຊ ສີວິໄລ
