ບັນດານັກຈັດລາຍການວິທະຍຸຈາກ 5 ແຂວງພາກໃຕ້ຄື: ແຂວງເຊກອງ, ສະຫວັນ ນະເຂດ, ອັດຕະປື ແລະ ຈໍາປາສັກ ລວມທັງ 8 ເມືອງຂອງແຂວງສາລະວັນ ໄດ້ຮັບການຍົກລະດັບຄວາມຮູ້ດ້ານການສົ່ງເສີມວຽກງານໂພສະນາການຜ່ານວິທະຍຸ ແລະ ສື່ສັງຄົມອອນລາຍເພື່ອຮຽນຮູ້ການຜະລິດລາຍການ ແລະ ຄວາມຮູ້ພື້ນຖານດ້ານວຽກງານໂພສະນາການ ເພື່ອນໍາໄປຜະລິດລາຍການວິທະຍຸ ໂດຍການກໍານົດກຸ່ມເປົ້າໝາຍໄວ ໜຸ່ມ ແລະ ແມ່ຍິງ ເພື່ອສໍາພາດ, ການຕັ້ງຄໍາຖາມສໍາລັບກຸ່ມເປົ້າໝາຍ, ການລົງເກັບກໍາຂໍ້ມູນຂ່າວຕົວຈິງ ການສໍາພາດຢູ່ບ້ານ ແລະ ຊຸມຊົນ, ການຂຽນຂ່າວສໍາລັບວິທະຍຸ ແລະ ສື່ສັງຄົມອອນລາຍ ພ້ອມນິ້ ຍັງຈະໄດ້ຮຽນຮູ້ການຜະລິດສະປອດວິທະຍຸ ແລະ ວິທີການສ້າງບັນຊີ ແລະ ອື່ນໆ.
ຊຸດຝຶກອົບຮົມດັ່ງກ່າວໄດ້ຈັດຂຶ້ນໃນວັນທີ 20 ມິຖຸນານີ້, ທີ່ສະໂມສອນແຂວງສາລະວັນ, ໂດຍພາຍໃຕ້ການເປັນປະທານຮ່ວມຂອງ ທ່ານ ສົມໃຈ ອຸ່ນຈິດ ຫົວໜ້າພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ແຂວງສາລະວັນ, ທ່ານ ໂພສີ ແກ້ວມະນີວົງ ຜູ້ອໍານວຍການວິທະຍຸກະຈາຍສຽງແຫ່ງຊາດ ແລະ ທ່ານ ຕະບອງເພັດ ພຸດທະວົງ ຊ່ຽວຊານວຽກງານໂພສະນາການ ແລະ ສື່ສານມວນຊົນ ອົງການຢູນີເຊບປະຈໍາ ສປປ ລາວ, ມີບັນດາສໍາມະກອນ ແລະ ວິທະຍາກອນທີ່ກ່ຽວຂ້ອງເຂົ້າຮ່ວມ.
ທ່ານ ສົມໃຈ ອຸ່ນຈິດ ໄດ້ກ່າວມີຄໍາເຫັນວ່າ: ການຈັດຊຸດຝຶກອົບຮົມຄັ້ງນີ້ເພື່ອແນ ໃສ່ຍົກລະດັບຄວາມຮູ້ດ້ານວິຊາການໃຫ້ແກ່ການຈັດລາຍການວິທະຍຸກະຈາຍສຽງເພື່ອແນໃສ່ ໃຫ້ຜູ້ເຂົ້າຮ່ວມສາມາດສ້າງຄວາມຮັບຮູ້-ເຂົ້າໃຈດ້ານວິຊາການຢ່າງຖືກຕ້ອງ ແລະ ເປັນລະບົບ ເຊີ່ງສື່ມວນຊົນມີຄວາມສໍາຄັນຫລາຍໃນເວທີຖະແຫລງຂ່າວ, ມີພາລະບົດບາດເປັນກະບອກ ສຽງຂອງອົງການຈັດຕັ້ງຂອງພັກ-ລັດ ແລະ ສັງຄົມໃນການໂຄສະນາ, ສຶກສາອົບຮົມແນວທາງຂອງພັກ, ລະບຽບກົດໝາຍຂອງລັດ, ປຸກລະດົມນໍ້າໃຈຮັກຊາດ, ສະໜອງຂໍ້ມູນ, ຂ່າວສານທາງດ້ານການເມືອງ, ເສດຖະກິດ-ສັງຄົມ, ວິທະຍາສາດ ແລະ ເຕັກໂນໂລຊີ, ສ້າງຄວາມສາມາດດ້ານການລາຍງານຂ່າວຜ່ານວິທະຍຸ ແລະ ສື່ສັງຄົມອອນລາຍໃຫ້ແກ່ທິມງານ ວິທະຍຸໄວໜຸ່ມ ແລະ ນັກຂ່າວຈາກບັນດາແຂວງພາກໃຕ້ ເພື່ອຊຸກຍູ້ການມີສ່ວນຮ່ວມຂອງ ໄວໜຸ່ມໃນການສົ່ງເສີມວຽກງານໂພສະນາການ ແລະ ບັນຫາທີ່ມີຜົນກະທົບຕໍ່ຊຸມຊົນຂອງ ເຂົາເຈົ້າ, ເສີມຂະຫຍາຍຄວາມຮູ້ດ້ານວຽກງານໂພສະນາການໃຫ້ແກ່ຊຸມຊົນຜ່ານວິທະຍຸ ສູນກາງ ແລະ ແຂວງຕ່າງໆ ລວມທັງວິທະຍຸຊຸມຊົນພ້ອມທັງສ້າງເຄື່ອຄ່າຍປະສານງານດ້ານໂຄສະນາວຽກງານໂພສະນາການລະຫວ່າງ 8 ເມືອງຂອງແຂວງສາລາວັນ, ບັນດາແຂວງພາກ ໃຕ້ ແລະ ວິທະຍຸກະຈາຍສຽງແຫ່ງຊາດ.
ຂອບໃຈຂໍ້ມູນຈາກ: ວິທະຍຸກະຈາຍສຽງແຫ່ງຊາດ
Editor:ຕະວັນ ແສງສະຫວັນ
