ອົງການປົກຄອງນະຄອນຫຼວງວຽງຈັນ ຮ່ວມກັບ ສະພາປະຊາຊົນ ນະຄອນຫຼວງວຽງຈັນ ຈັດສຳມະນາ ບັນດາຮ່າງນິຕິກຳ ຂັ້ນນະຄອນຫຼວງວຽງຈັນ ຂຶ້ນວັນທີ 19-20 ມິຖຸນາ ທີ່ຜ່ານມາ ທີ່ຫ້ອງວ່າການປົກຄອງ ນະຄອນຫຼວງວຽງຈັນ ໂດຍການເປັນປະທານຂອງທ່ານ ສິນລະວົງ ຄຸດໄພທູນ, ເຈົ້າຄອງນະຄອນຫຼວງວຽງຈັນ ມີບັນດາຄະນະປະຈຳພັກ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ສະມາຊິກສະພາປະຊາຊົນ ນະຄອນຫຼວງວຽງຈັນ ຫົວໜ້າພະແນກການອ້ອມຂ້າງ ແລະ ພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມ ໄດ້ສະເໜີຮ່າງຂໍ້ຕົກລົງຫຼາຍສະບັບຂອງເຈົ້າຄອງ ນະຄອນຫຼວງວຽງຈັນ ເປັນຕົ້ນ ຂໍ້ຕົກລົງຂອງທ່ານເຈົ້າຄອງ ນະຄອນຫຼວງວຽງຈັນ ວ່າດ້ວຍ ການຄຸ້ມຄອງຄຸນະພາບຜະລິດຕະພັນສິນຄ້າ ກ່ຽວກັບສັດປ່າ ແລະ ສັດນ້ຳຢູ່ຕະຫຼາດ ຮ່າງຂໍ້ຕົກລົງວ່າດ້ວຍການຄຸ້ມຄອງຄຸນນະພາບ ພືດ ແລະ ຜະລິດຕະພັນພືດ ທີ່ຈຳໜ່າຍໃນຕະຫຼາດ ຮ່າງຂໍ້ຕົກລົງວ່າດ້ວຍ ການຄຸ້ມຄອງຢາປາບສັດຕູພືດ ຮ່າງຂໍ້ຕົກລົງວ່າດ້ວຍແຜນວຽກ ແລະ ມາດຕະການ ຈັດຕັ້ງປະຕິບັດໂຄງການສະຫງົບສຸກໄລຍະໃໝ່ ໂດຍສະເພາະ ໄລຍະຮອດປີ 2030 ຮ່າງຂໍ້ຕົກລົງ ວ່າດ້ວຍການສ້າງຕັ້ງກອງທຶນທາງປະຊາຊົນ ແລະ ຮ່າງຂໍ້ຕົກລົງວ່າດ້ວຍບາງເປົ້າໝາຍຮີບດ່ວນ ຂອງການຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງ ເພື່ອໃຫ້ບັນດາຜູ້ເຂົ້າຮ່ວມໄດ້ປະກອບຄຳຄິດຄຳເຫັນໃສ່ບາງເນື້ອໃນ ແລະ ບາງໝວດຂອງຂໍ້ຕົກລົງດັ່ງກ່າວໃຫ້ມີເນື້ອໃນຮັດກຸມ ຄົບຖ້ວນ ແລະ ສົມບູນ ທັງນີ້ ກໍ່ເພື່ອກະກຽມຄວາມພ້ອມໃຫ້ແກ່ການນຳບັນດາຮ່າງນິຕິກຳ ຂັ້ນນະຄອນຫຼວງວຽງຈັນ ເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນ ນະຄອນຫຼວງວຽງຈັນ ທີ່ຈະຈັດຂຶ້ນໃນມໍ່ໆນີ້.
ຂອບໃນຂໍ້ມູນຈາກ: ລາຍການວຽງຈັນວັນນີ້
Editor: ດາວໄຊ ສີວິໄລ
