ການຜະລິດຮູບເງົາສັ້ນ ຜ່ານສືຕ່າງໆໄດ້ຂະຫຍາຍຕົວໄວຂຶ້ນ ເມື່ອທຽບໃສ່ຫຼາຍປີຜ່ານມາ ເຊິ່ງທ່ານ ວິທູນ ສູນດາຣາ, ຫົວໜ້າກົມຮູບເງົາ ກໍສະແດງຄວາມຍິນດີກັບຄວາມສາມາດຂອງຄົນລຸ້ນໃໝ່ ແຕ່ກໍຝາກເຕືອນໃຫ້ມີສະຕິໃນການ ຜະລິດ ທີ່ອາດຈະສ້າງຄວາມເສື່ອມເສຍດ້ານວັດທະນະທໍາຂອງຊາດ ແລະ ແຕະຕ້ອງການພົວພັນສັງຄົມ ຈາກການຜະລິດທີ່ບໍ່ໄດ້ຜ່ານຂະບວນການອະນຸຍາດຈາກພາກສ່ວນທີ່ກ່ຽວຂ້ອງ.
ທ່ານ ວິທູນ ສູນດາຣາ, ຫົວໜ້າກົມຮູບເງົາ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ໃຫ້ສໍາພາດວ່າ: ການຜະລິດຮູບເງົາໃນລາວຍຸກປັດຈຸບັນ ແມ່ນມີຄວາມກ້າວໜ້າກວ່າສະໄໝກ່ອນ ແລະ ແຕກຕ່າງກັນຫຼາຍ ເປັນຕົ້ນແມ່ນອຸປະກອນຮັບໃຊ້ການຜະລິດ ມີຄວາມທັນສະໄໝ ແລະ ຫຼາກຫຼາຍ ພວກເຮົາຈະເຫັນໄດ້ຢ່າງຈະແຈ້ງວ່າ ທັງພາກສ່ວນຂອງລັດ ແລະ ເອກະຊົນສາມາດຜະລິດຮູບເງົາ, ສາລະຄະດີ, ພາບປະກອບອື່ນໆໄດ້ເພີ່ມຂຶ້ນ. ແນວໃດກໍຕາມ ຕະຫຼາດຄວາມຕ້ອງການໃນລາວຍັງບໍ່ສູງ ຜູ້ທີ່ຜະລິດຈິ່ງມີຄວາມກັງວົນທີ່ຈະຫຼຸບທຶນ ສະນັ້ນ,ການຜະລິດ ກໍຫັນສູ່ຮູບແບບການເອົາໃຈໄວໜຸ່ມ ເຊິ່ງມັນມີຄວາມສ່ຽງຕໍ່ຜົນກະທົບກັບພາບພົດຂອງ ວັດທະນະທໍາແຫ່ງຊາດ.
ພ້ອມດຽວກັນນີ້ ທ່ານຫົວໜ້າກົມຮູບເງົາ ກໍ່ກ່າວຊົມເຊີຍໃນຄວາມສາມາດຂອງຄົນຍຸກໃໝ່ ແຕ່ຢາກໃຫ້ເປັນເລື່ອງທີ່ສ້າງສັນຫຼາຍກວ່າປະເພດອື່ນ ເຊິ່ງຄວນຈະເນັ້ນຮູບເງົາສາລະຄະດີທີ່ເຮັດຂຶ້ນ ເພື່ອໂນ້ມນ້າວປະຊາຊົນໃຫ້ຮັກຊາດ, ປຸກລະດົມຈິດໃຈຫ້າວຫັນພັດທະນາ ເພີ່ມພູນຜະລິດຜົນ ແລະ ສ້າງຄວາມອົບອຸ່ນໃນ ຄອບຄົວ, ວຽກງານ ແລະ ຄວາມສະຫງົບສຸກຂອງສັງຄົມ.
ແຕ່ທີ່ໜ້າເປັນຫ່ວງ ແມ່ນກຸ່ມໄວຫນຸ່ມທີ່ສ້າງຮູບເງົາດ້ວຍຕົນເອງ ໂດຍບໍ່ໄດ້ຜ່ານ ພາກສ່ວນກ່ຽວ ຂ້ອງ ແລ້ວເຜີຍແຜ່ທາງອອນລາຍ ອັນນີ້ກໍຕ້ອງໄດ້ຕິດຕາມນໍາກັນ ແລະ ຝາກເຕືອນໃຫ້ມີສະຕິຮັບຜິດ ຊອບຕໍ່ລະບຽບກົດໝາຍຫຼາຍຂຶ້ນ

Editor: ຕະວັນ ແສງສະຫວັນ