ນັບວ່າເປັນບັນຍາກາດຄຶກຄື້ນກັບງານສະແດງຮ້ອງເພງຮ່ວມສະໄໝໄວໜຸ່ມອາຊຽນ ທີ່ໄດ້ຈັດໃນທ້າຍອາທິດຜ່ານມາ ຢູ່ນະຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມຂອງທ່ານ ບົວເງິນ ຊາພູວົງ, ສິລະປິນແຫ່ງຊາດ,ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ມີບັນດາທ່ານທູດ-ທຸຕະນຸທູດຂອງບັນດາປະເທດສະມາຊິກ ອາຊຽນ ແລະ ປະເທດເພື່ອນມິດ ປະຈຳ ສປປ ລາວ, ພ້ອມດ້ວຍພາກສວນທີ່ກ່ຽວຂ້ອງຮ່ວມພາຍໃນງານ.
ທ່ານ ບົວເງິນ ຊາພູວົງ, ກ່າວວ່າ: ຈຸດປະສົງການຈັດງານຄັ້ງນີ້ ກໍ່ເພື່ອເປັນການປະກອບສ່ວນສຳຄັນໃຫ້ແກ່ການສະເຫຼີມສະຫຼອງວັນສ້າງຕັ້ງສະມາຄົມອາຊຽນ ຄົບຮອບ 50 ປີ ແລະ ວັນຄົບຮອບ 20 ປີ ທີ່ ສປປ ລາວ ເຂົ້າເປັນສະມາຊິກອາຊຽນ, ທັງເປັນການສົ່ງເສີມ ແລະ ແລກປ່ຽນວັດທະນະທຳ, ຮັດແໜ້ນຄວາມສາມັກຄີ ແລະ ການຮ່ວມມືທາງດ້ານວິຊາການສິລະປະການສະແດງພາຍໃນອາຊຽນ ໃຫ້ນັບມື້ນັບກວ້າງຂວາງ.
ສຳລັບ, ງານສະແດງຮ້ອງເພງຮ່ວມສະໄໝໄວໜຸ່ມອາຊຽນຄັ້ງນີ້ ແມ່ນເຕັມໄປດ້ວຍບັນຍາກາດຄຶກຄື້ນ ມີລາຍການສະແດງບົດເພງທີ່ດີເດັ່ນ ແລະ ມີຄວາມຫຼາກຫຼາຍທາງດ້ານວັດທະນະທຳຈາກນັກສິລະປິນ ຂອງບັນດາປະເທດອາຊຽນ. ເພງທີ່ໄດ້ຮັບຄວາມນີຍົມຊົມຊອບຢູ່ໃນແຕ່ລະປະເທດ ພິເສດໄປກວ່ານັ້ນງານສະແດງຮ້ອງເພງ ຄັ້ງນີ້ ຍັງເປັນການພົບປະແລກປ່ຽນບົດຮຽນຄວາມຮູ້ປະສົບການຂອງບັນດານັກຮ້ອງໄວໜຸ່ມ ທີ່ມີຊື່ສຽງຂອງແຕ່ລະປະເທດອາຊຽນ ເພື່ອການໂຄສະນາເຜີຍແຜ່ ສິລະປະວັດທະນະທຳ ໂດຍສະເພາະແມ່ນດົນຕີສຽງຮ້ອງເພງ ແລະ ການສະແດງຕ່າງໆເທິງເວທີ. ນອກຈາກນີ້, ບັນດາສິລະປິນ ຍັງໄດ້ນຳເອົາໄມຕີຈິດມິດຕະພາບອັນດູດດຶ່ມ ແລະ ຄວາມເບີກບານມ່ວນຊື່ນມາສູ່ບັນດາຜູ້ຊົມນຳອີກ.
Editor: ຕະວັນ ແສງສະຫວັນ
