ໃນວັນທີ 12 ພຶດສະພາ 2016 ທີຜ່ານມາ ຢູ່ທີ່ສໍານັກງານຫ້ອງວ່າການປົກຄອງ ນະຄອນຫຼວງວຽງຈັນ ທ່ານ ສີຫູນ ສິດທິລືໄຊ ຮອງເລຂາຄະນະພັກ, ຮອງປະທານຄະນະກຳມະການເລືອກຕັ້ງ ຂັ້ນນະຄອນຫຼວງວຽງຈັນ ໄດ້ຖະແຫຼງຂ່າວຕໍ່ສື່ມວນຊົນ ເພື່ອແຈ້ງມາຍັງບັນດາທ່ານ ພະນັກງານລັດຖະກອນ, ທະຫານ-ຕ່ຳຫຼວດ, ຕະຫຼອດຮອດພໍ່ແມ່ປະຊາຊົນບັນດາເຜົ່າໃນທົ່ວນະຄອນຫຼວງວຽງຈັນ ຮັບຊາບກ່ຽວກັບຄວາມພ້ອມໃນການກະກຽມດຳເນີນກອງປະຊຸມຄັ້ງປະຖົມມະລຶກ ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ 1 ຕໍ່ບັນດາທ່ານຄື: ປະຕິບັດຕາມກົດ ໝາຍວ່າດ້ວຍ ສະພາປະຊາຊົນຂັ້ນແຂວງ ໄດ້ກຳນົດໃນມາດຕາ 57 ວ່າ ກອງປະຊຸມຄັ້ງປະຖົມມະລຶກ ຂອງສະພາປະຊາຊົນຂັ້ນແຂວງ ແມ່ນເປີດຂຶ້ນຢ່າງຊ້າ 30 ວັນ, ພາຍຫຼັງສຳເລັດກອງປະຊຸມຄັ້ງປະຖົມມະລຶກ ຂອງສະພາແຫ່ງຊາດ ໂດຍແມ່ນ ຄະນະກຳມະການເລືອກຕັ້ງຂັ້ນແຂວງ ເປັນປະທານ ແລະ ຊີ້ນຳກອງປະຊຸມໄປຈົນກວ່າຈະເລືອກຕັ້ງປະທານປະຊາຊົນຂັ້ນແຂວງຊຸດໃໝ່.
