ກອງປະຊຸມດຳເນີນຊີວິດການເມືອງ ປັບປຸງປົວແປງພັກ ພາຍໃນສູນກາງແນວລາວສ້າງຊາດ ໄດ້ຈັດຂື້ນ ໃນວັນທີ 26 ພຶດສະພາ 2017 ນີ້, ທີ່ສຳນັກງານສູນກາງແນວລາວສ້າງຊາດ, ນະຄອນຫລວງວຽງຈັນ.  ໂດຍການເປັນປະທານໂອລົມ ຂອງ ທ່ານ ປະລິນຍາເອກ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ. ເຂົ້າຮ່ວມກອງປະຊຸມ ມີຄະນະປະທານ, ຄະນະບໍລິຫານງານ, ສະມາຊີກພັກ,ພະນັກງານອ້ອມຂ້າງພາຍໃນສູນກາງແນວລາວສ້າງຊາດ ເຂົ້າຮ່ວມ ຢ່າງພ້ອມພຽງ.

ໃນກອງປະຊຸມ ທ່ານປະທານສູນກາງແນວລາວສ້າງຊາດ ໄດ້ຍົກໃຫ້ເຫັນບັນຫາສຳຄັນທາງດ້ານຊີວິດການເມືອງ ຂອງສູນການແນວລາວສ້າງຊາດ ເຊິ່ງໄດ້ດຳເນີນມາເປັນເວລາ 6 ວັນ, ການເສີມຂະຫຍາຍສິດປະຊາທິປະໄຕໃນການຜ່ານບົດສຳຫລອດຕົນເອງ,  ແລະ ການປະກອບຄຳຄິດເຫັນຂອງບັນດາສະມາຊິກພັກ, ອາດິດພະນັກງານອາວຸໂສ, ສະມາຊິກພັກ ສູນກາງແນວລາວສ້າງຊາດ, ຕໍ່ການນຳພາລວມຂອງຄະນະພັກ, ການຈັດຕັງ ແລະ ສະມາຊິກພັກ ເປັນ 1 ໃນ 5 ຫລັກການກໍ່ສ້າງ ແລະ ປັບປຸງຕົນເອງຂອງພັກ, ນຳໄປສູ່ການປັບປຸງໃນການຈັດຕັ້ງປະຕິບັດວຽກງານພາຍໃນສູນກາງແນວລາວສ້າງຊາດ. ທ່ານ ປະທານ ຍັງກ່າວວ່າ: ຍາມໃດພັກ ກໍ່ໄດ້ເອົາໃຈໃສ່ຕໍ່ການສ້າງທັດສະນະທີ່ຖືກຕ້ອງ ແລະ ເບີ່ງບັນຫາຢ່າງພາວະວິໄສ, ການຕີລາຄາຜົນສຳເລັດ, ສິ່ງຄົງຄ້າງ, ຂໍບົກຜ່ອງ, ສາເຫດຕົ້ນຕໍ ທາງພາຍໃນ ແລະ ພາຍນອກ, ບັນດາບົດຮຽນໃນການຈັດຕັງປະຕິບັດຕົວຈິງ ເພື່ອເສີມຂະຫຍາຍຢ່າງຕັ້ງຫນ້າ ຊອກເຫັນບັນດາຫນໍ່ແຫນງປັດໄຈໃຫມ່ ບົນພື້ນຖານກຳແຫນ້ນທັດສະນະໃຫມ່ຂອງພັກ.  

ພັກ ໄດ້ກຳນົດທິດທາງ ແລະ ວິທີການຈັດຕັ້ງປະຕິບັດແນວທາງການເມືອງ ຂອງພັກໃຫ້ສອດຄ່ອງກັບສະພາບຕົວຈິງ ນັບແຕ່ຂັ້ນສູນກາງລົງຮອດທ້ອງຖິ່ນ ໂດຍສະເພາະການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ 10 ຂອງພັກ, ເຊິ່ງເປັນໄລຍະສ້າງບາດລ້ຽວແຫ່ງການພັດທະນາປະເທດຊາດ. ຕໍ່ກັບສະພາບດັ່ງກ່າວ, ເພື່ອເປັນທິດທາງແກ່ການເຄື່ອນໄຫວລວມ ຂອງສຳນັກງານສຸູນກາງແນວລາວສ້າງຊາດ ກໍ່ຄືສະມາຊິກພັກພາຍໃນສູນກາງແນວລາວສ້າງຊາດ ແມ່ນຕ້ອງໄດ້ເອົໄາໃຈໃສ່ບາງຈຸດ ຄື:1, ເອົາໃຈໃສ່ ແລະ  ຖືສຳຄັນວຽກງານການສຶກສາອົບຮົມການເມືອງແນວຄິດ ໃຫ້ກັບສະມາຊິກພັກ, ພະນັກງານ, ເພີ່ມທະວີຄວາມສາມັກຄີ ເປັນຫນຶ່ງດຽວພາຍໃນພັກ.2, ເອົາໃຈໃສ່ໃນການຂະຫຍາຍພັກ ແລະ ຕ້ອງອິງໃສ່ກົດລະບຽບການຂະຫຍາຍພັກ ສະໄຫມທີ 10 ຢ່າງເຂັ້ມງວດ ເພື່ອໃຫ້ມີຄວາມສອດຄ່ອງກັບເງື່ອນໄຂຕົວຈີງ ເປັນຜູ້ທີ່ມີຄຸນສົມບັດສິນທຳປະຕິວັດ, ມີການຝຶກຜົນຫລໍ່ຫລອມຕົນເອງ ແລະ ເປັນຜູ້ທີ່ເຂົ້າໃຈແນວທາງຂອງພັກ ຢ່າງເລີກເຊີ່ງ.3, ການກໍ່ສ້າງພັກ-ພະນັກງານແມ່ນຍຶດຫມັ້ນ ແລະ ເປັນເອກະພາບປະຕິບັດຕາມ 5 ຫລັກການ, 3  ທິດນຳ., ການກໍ່ສ້າງຫນ່ວຍພັກແຂງ-ຮູ້ນຳພາຮອບດ້ານ, ໃຫ້ເປັນຂະບວນຢ່າງຕໍ່ເນື່ອງ, ມີການກວດກາ, ມີການປະເມີນ ແລະ ປັບປຸງປົວແປງໄປພ້ອມໆກັນ.5,  ການນຳພາ ແລະ ແບບແຜນວິທີການເຮັດວຽກ ຄວນປະຕິບັດຕາມຫລັກການລວມສູນປະຊາທິປະໄຕ, ເຮັດວຽກເປັນຫມູ່ຄະນະ, ການແບ່ງຄວາມຮັບຜິດຊອບຕໍ່ບຸກຄົນ, ມີການກວດກາຕິດຕາມ ແລະ ຊຸກຍູ້ປະຕິບັດແຜນການເຄືຶ່ອນໄຫວຂອງຫນ່ວຍພັກ.6, ຄົ້ນຄວ້າເຊື່ອມຊືມແນວທາງນະໂຍບາຍ, ກົດລະບຽບພັກ, ກົດຫມາຍ ແລະ ລະບຽບການຕ່າງໆຂອງລັດ, ການຫັນມະຕິຄຳສັ່ງ ເປັນແຜນການ ໂຄງການລະອຽດ ເພື່ອນຳພາການຈັດຕັ້ງປະຕິບັດວຽກງານ ໃຫ້ໄດ້ຮັບຜົນດີ.