ພັກ-ລັດຖະບານ ເອົາໃຈໃສ່ໃນການຕິດຕາມກວດກາຂະແໜງ ກະສິກຳ ແລະ ປ່າໄມ້ ໃນນີ້ ການຄຸ້ມຄອງປ່າໄມ້ ແລະ ຊັບພະຍາກອນປ່າໄມ້ ເປັນວຽກງານໜຶ່ງທີ່ສຳຄັນ ໂດຍໄດ້ອອກຄຳສັ່ງຄຳແນະນຳ ມະຕິຂໍ້ຕົກລົງຕ່າງໆ ທີ່ກຳນົດກົດລະບຽບມາດຕະການຕ່າງໆໃນການຄຸ້ມຄອງປ່າໄມ້ ແລະ ຊັບພະຍາກອນປ່າໄມ້ ໃຫ້ມີຄວາມຍືນຍົງ ນຳໃຊ້ໄດ້ຍາວນານ ແລະ ອື່ນໆ.ຕາມບົດລາຍງານການຈັດຕັ້ງປະຕິບັດແຜນພັດທະນາ ເສດຖະກິດ - ສັງຄົມປີ 2015-2016 ໃຫ້ຮູ້ວ່າ: ການຈັດຕັ້ງປະຕິບັດວຽກງານປ່າໄມ້ ພົ້ນເດັ່ນແມ່ນອອກຄຳສັ່ງເລກທີ 15/ນຍ ແນໃສ່ຫັນການຄຸ້ມຄອງປ່າໄມ້ໄປສູ່ລະບຽບກົດໝາຍເທື່ອລະກ້າວ ເຫັນວ່າປາກົດການຫຍໍ້ທໍ້ກ່ຽວກັບວຽກງານປ່າໄມ້ຫຼຸດລົງຢ່າງຈະແຈ້ງ ຄຽງຄູ່ກັບການປັບປຸງນິຕິກຳແມ່ນການຄຸ້ມຄອງປ່າໄມ້ 3 ປະເພດໃຫ້ມີຄວາມຍືນຍົງ ພ້ອມນັ້ນ ການຄຸ້ມຄອງປ່າສະຫງວນ ແມ່ນສຳເລັດການປັກຫຼັກໝາຍເຂດ ແລະ ຕິດປ້າຍຊີ້ບອກ ຕິດປ້າຍຂອບເຂດຊາຍແດນປ່າສະຫງວນແຫ່ງຊາດ ປະຕິບັດໄດ້ 738 ຫຼັກ ແລະ ຕິດປ້າຍປະຕິບັດໄດ້ 376 ປ້າຍ ທຽບໃສ່ສົກປີຜ່ານມາປະຕິບັດໄດ້ 100% ການຄຸ້ມຄອງປ່າປ້ອງກັນ ໄດ້ສຳເລັດການກະກຽມການສ້າງແຜນຈັດສັນປ່າປ້ອງກັນແຫ່ງຊາດ 4 ແຫ່ງ ພ້ອມທັງສຳເລັດການເກັບກຳຂໍ້ມູນເສດຖະກິດ-ສັງຄົມ ເຂດປ່າປ້ອງກັນພູມຸກ-ໜອງແດງ-ຍອດນ້ຳມີ້ ແຂວງວຽງຈັນ ແລະ ແຂວງໄຊຍະບູລີ ໃນເນື້ອທີ່ 96.700 ເຮັກຕາ ປ່າປ້ອງກັນເຊນ້ອຍ-ເຊບາຍ ແຂວງສະຫວັນນະເຂດ ໃນເນື້ອທີ່ 38.700 ເຮັກຕາ ນອກນັ້ນ ໄດ້ລົງຕິດຕາມວຽກງານສະກັດກັ້ນໄຟໄໝ້ລາມປ່າ ໃນເຂດປ່າປ້ອງກັນ ແລະ ປ່າສະຫງວນແຫ່ງຊາດຢູ່ແຂວງສາລະວັນ, ແຂວງອັດຕະປື ສ່ວນການຄຸ້ມຄອງປ່າຜະລິດ ໄດ້ສຳເລັດການສ້າງແຜນຈັດສັນປ່າຜະລິດ ທັງໝົດ 51 ເຂດ ໃນເນື້ອທີ່ 3,1 ລ້ານເຮັກຕາ ແບ່ງອອກເປັນ 112 ເຂດຄຸ້ມຄອງຕາມຂອບເຂດຄວາມຮັບຜິດຊອບຂອງເມືອງ ສຳເລັດການສ້າງລະບຽບການຄຸ້ມຄອງ ແລະ ວາງແຜນຈັດສັນປ່າໄມ້ບ້ານທີ່ຢູ່ນອກ 3 ປະເພດ ປ່າປະຕິບັດໄດ້ 156 ບ້ານ ກຳນົດຈັດສັນເຂດຟື້ນຟູປ່າໃຫ້ບ້ານໃນເຂດປ່າຜະລິດໄດ້ 1.013 ບ້ານ ຟື້ນຟູປ່າໄດ້ 108.200 ເຮັກຕາ ແລະ ປູກໄມ້ໄດ້ 21 ພັນເຮັກຕາ ນອກຈາກນີ້ ຍັງຫັນໄປສູ່ການຄຸ້ມຄອງ ແລະ ນຳໃຊ້ປ່າໄມ້ໃຫ້ຖືກຕ້ອງ ເພື່ອຮັບປະກັນຄວາມຍືນຍົງ ແລະ ເກີດປະສິດທິຜົນທາງດ້ານເສດຖະກິດດ້ວຍຫຼາຍຮູບແບບ ຄຽງຄູ່ກັບການທ່ອງທ່ຽວທີ່ຕິດພັນກັບການປົກປັກຮັກສາປ່າໄມ້. ຂ່າວ: ຕະວັນ
Editor: ຕະວັນ ແສງສະຫວັນ
