ເຊັນບົດບັນທຶກ ເອັມໂອເອ (MOA) ຂໍ້ຕົກລົງເພື່ອຮັບເຫມົາກໍ່ສ້າງ ອາຄານ-ອາພັດເມັນ ໃນເຂດໂຊນ (ເອ)  ຂອງເຂດເສດຖະກິດສະເພາະ ທ່າແຂກ, ເມືອງທ່າແຂກ, ແຂວງຄຳມ່ວນ.  ພິທີເຊັນບົດບັນທຶກ ເອັມໂອເອ ດັ່ງກ່າວ ໄດ້ຈັດຂື້ນໃນຕອນບ່າຍວັນທີ 23 ພຶດສະພາ 2017 ທີ່ໂຮງແຮມເມືອງແທງ, ນະຄອນຫລວງວຽງຈັນ.  ໂດຍການເຂົ້າຮ່ວມ ຂອງທ່ານ ດາວໄຫລ ແກ້ວດວງດີ  ຫົວຫນ້າພະແນກແຜນການ ແລະ ການລົງທຶນ ແຂວງຄຳມ່ວນ, ທັງເປັນປະທານສະພາບໍລິຫານເສດຖະກິດ ເຂດເສດຖະກິດສະເພາະ ທ່າແຂກ, ພ້ອມດ້ວຍຄະນະປະທານ, ບໍລິສັດ ອາຄະເນ ພັດທະນາລາວ ເອັສອີແຊັດ ຈຳກັດ, ປະທານບໍລິສັດ ຫຸ້ນສ່ວນ ກົງຈີ້ໂຄພັນ ດໍຕູໄຊ ດຸງກົງເຍ່ ໂມດູນລາບອກ ຄອນເທນເນີ້, ບໍລິສັດ ເອບີທີ ເຊີວິດ-ດີຊາຍ ຄອນເຕັກຊັນ ແອນ ໂປຣໂມດ ແອຄຣີຄັນເຈີ້ ຈຳກັດ ແລະ ບໍລິສັດ ຟຸກຫັງຕິນ ຈຳກັດ. ນອກຈາກນັ້ນ ຍັງມີບັນດາແຂກທີ່ກ່ຽວຂ້ອງເຂົ້າຮ່ວມ ຢ່າງພ້ອມພຽງ. ໃນພິທີ ໄດ້ຮັບຟັງການລາຍງານກ່ຽວກັບໂຄງການພັດທະນາເຂດເສດຖະກິດພິເສດ ທ່າແຂກ ແມ່ນເປັນອີກຫນຶ່ງໂຄງການບູລິມະສິດຂອງແຂວງຄຳມ່ວນ ທີ່ມີເປົ້າຫມາຍເລັງໃສ່ພັດທະນາທີ່ດິນ ໃນຂອບເຂດຂົວມິດຕະພາບ ລາວ-ໄທ ແຫ່ງທີ 3 ຄຳມ່ວນ-ນະຄອນພະນົມ, ມີເນື້ອທີ່ພັດທະນາ ທັງໝົດ 1,035 ເຮັກຕາ, ໃຫ້ກາຍເປັນເຂດເສດຖະກິດພິເສດ ຕາມທີ່ໄດ້ກຳນົດໄວ້ໃນກົດຫມາຍ ວ່າດ້ວຍການສົ່ງເສີມການລົງທຶນ(ສະບັບປັບປຸງ) ເລກທີ 14/ສພຊ, ລົງວັນທີ 17 ພະຈິກ 2016. ເພື່ອພັດທະນາໃຫ້ເປັນຕົວເມືອງໃຫມ່ ທີ່ທັນສະໄຫມຮອບດ້ານ, ເປັນບ່ອນດຶງດູດການລົງທຶນພາຍໃນ ແລະ ຕ່າງປະເທດ ມີນະໂຍບາຍສົ່ງເສີມພິເສດ, ມີລະບົບເສດຖະກິດການເງິນ ແລະ ສິ່ງເອື້ອຍອຳນວຍດ້ານຕ່າງໆ.    ໃນນັ້ນ, ບໍລິສັດ ອາຄະເນ ພັດທະນາລາວ ເອັສອີແຊັສ ຈຳກັດ ເປັນຫນຶ່ງໃນບັນດາ 22 ບໍລິສັດ ທີ່ເຂົ້າມາລົງທຶນ ແລະ  ສຳປະທານເນື້ອທີ່ດິນ ຈຳນວນ 7 ເຮັກຕາ  ມີອາຍຸສຳປະທານ 75 ປີ, ແລະ ສາມາດຕໍ່ອາຍຸໄດ້ຕື່ມອີກ 15 ປີ. ມີແຜນການລົງທຶນທັງໝົດ 5 ຕື້ ໂດລາສະຫາລັດ. ໂດຍມີຈຸດປະສົງລົງທຶນພັດທະນາ ໃຫ້ກາຍເປັນເຂດການຄ້າ ແລະ ການບໍລິການ ໃນນັ້ນປະກອບດ້ວຍຕຶກ 65 ຊັ້ນ 1 ຫລັງ, ໂຮງແຮມ 5 ດາວ ແລະ 4 ດາວ ສູງ 40 ຊັ້ນ ແລະ 35 ຊັ້ນ. ຕຶກອາພັດເມັນ 2 ຫລັງ ສູງ 45 ຊັ້ນ. ຕຶກຫ້າງສັບພະສິນຄ້າ 5 ຊັ້ນ 1 ຫລັງ, ແລະ ຕຶກກວດພະຍາດແບບຄົບວົງຈອນ 1 ຫລັງ ສູງ 5 ຊັ້ນ. ພ້ອມນັ້ນຍັງມີຊັ້ນໃຕ້ດິນ, ໂຄງລ່າງພື້ນຖານ, ສວນສາທາລະນະ ແລະ ສະຖານທີ່ອ້ອມຮອບອື່ນໆ. ໂດຍແບ່ງເຂດພັດທະນາອອກເປັນ 3 ໂຊນ ຄື ໂຊນເອ, ບີ ແລະ ຊີ.  ສຳລັບການເຊັນສັນຍາບົດບັນທຶກໃນຄັ້ງນີ້ ແມ່ນຢູ່ໃນເຂດໂຊນເອ ໂດຍບໍລິສັດ ອາຄະເນພັດທະນາລາວ ເອັສອີແຊັສ ໄດ້ຕົກລົງໃຫ້ 3 ບໍລິສັດ ເພື່ອເປັນຜູ້ສຶບຕໍ່ການກໍ່ສ້າງ ໃນໂຊນດັ່ງກ່າວ. ໃນນັ້ນປະກອບມີ - ຕຶກອາຄານ-ອາພັດເມັນ 2 ຫລັງ (ສູງ 45 ຊັ້ນ)- ຕຶກອາຄານກວດພະຍາດແບບຄົບວົງຈອນ 1 ຫລັງ ສູງ 5 ຊັ້ນ- ບັນດາຊັ້ນໃຕ້ດິນ- ພື້ນຖານໂຄງລ່າງ ແລະ ໂຄງການກໍ່ສ້າງເພີ່ມຕື່ມອື່ນໆ   ຕາມຄວາມຈຳເປັນ. ຕາມຂໍຕົກລົງຊື່ງກັນ ແລະ ກັນ ໃນມູນຄ່າສັນຍາ 200 ລ້ານໂດລ້າສະຫາລັດ. ມີໄລຍະການກໍ່ສ້າງໃຫ້ສຳເລັດ 4 ປີ.ລົງນາມ ທັງ 4 ຝ່າຍ ມີ ປະທານ, ບໍລິສັດ ອາຄະເນ ພັດທະນາລາວ ເອັສອີແຊັດ ຈຳກັດ, ປະທານບໍລິສັດ ຫຸ້ນສ່ວນ ກົງຈີ້ໂຄພັນ ດໍຕູໄຊ ດຸງກົງເຍ່ ໂມດູນລາບອກ ຄອນເທນເນີ້, ປະທານບໍລິສັດ ເອບີທີ ເຊີວິດ-ດີຊາຍ ຄອນເຕັກຊັນ ແອນ ໂປຣໂມດ ແອຄຣີຄັນເຈີ້ ຈຳກັດ ແລະ ປະທານບໍລິສັດ ຟຸກຫັງຕິນ ຈຳກັດ. ໂດຍການເປັນສັກຂີພິຍານຈາກພາກສ່ວນທີ່ກ່ຽວຂ້ອງ ທັງ 4 ຝ່າຍ.