ແຂວງຫົວພັນ ທີ່ຕັ້ງທາງພາກເຫນືອຂອງ ສປປ ລາວ, ເປັນເຂດທີ່ມີພູມມີປະເທດສ່ວນໃຫຍ່ເປັນພູດອຍ,   ທີ່ເຕັມໄປດ້ວຍພູຜາປ່າໄມ້ຂຽວສະອຸ່ມຊຸ່ມງາມ, ມີຫ້ວຍນ້ຳລຳເຊທີ່ອຸດົມສົມບູນລໍ່ລ້ຽງຊີວິດຂອງປະຊາຊົນ, ມີອາກາດເຢັນສົດຊຶ່ນຢູ່ຕະຫລອດປີ. ມີຄວາມອຸດົມສົມບູນຊັບພະຍາກອນທຳມະຊາດ ແລະ ບັນດາແຫລ່ງທ່ອງທ່ຽວທາງດ້ານປະຫວັດສາດຢ່າງຫລວງຫລາຍ. ປະຊາຊົນມີວິຖິຊີວິດທີ່ດີ, ມີວັດທະນະທຳ ແລະ ຮິດຄອງປະເພນີ ທີ່ເປັນມູນເຊື້ອເອກະລັກສະເພາະຕົນ, ແຂວງຫົວພັນ ມີເນື້ອທີ່ທັງໝົດ 16 ພັນ 500 ກິໂລແມັດ, ປະກອບດ້ວຍ 10 ຕົວເມືອງ ແລະ ມີບ້ານທັງໝົດ 719 ບ້ານ, ໃນ 10 ເມືອງ ປະກອບດ້ວຍ: ເມືອງຊຳເຫນືອ, ເມືອງຊຳໃຕ້, ເມືອງວຽງໄຊ, ເມືອງສົບເບົາ, ເມືອງຊຽງຄໍ້, ເມືອງ ແອດ, ເມືອງ ຫົວເມືອງ  ເມືອງກວັນ, ເມືອງຮ້ຽມ ເມືອງຊ້ອນ.    ເມື່ອກ່າວເຖິງຄວາມເປັນມາ ແຂວງຫົວພັນແມ່ນມີປະຫວັດຄວາມເປັນມາອັນຍາວນານ, ທີ່ຕິດພັນກັບປະຫວັດສາດຂອງຊາດລາວເຮົາ, ແຫລງ່ກຳເນີດກອງຮ້ອຍລາດຊະວົງ ແລະ ເປັນຖານທີ່ຫນັ້ນຂອງການປະຕິວັດລາວໃນສະໄຫມຕໍ່ສູ້ກູ້ຊາດ ຂອງບັນດາການນຳພັກ-ລັດ ລາວເຮົາໃນສະໄຫມສົງຄາມ ທາງດ້ານແນວຄີດຈິດໃຈ ປະຊາຊົນມີຄວາມຮັກແພງສາມັກຄີ ປອງດວງ, ຮັກແພງຫນຽວແຫນ້ນ, ມີມູນເຊື້ອວັດທະນະທຳອັນດີງາມ, ມີຮິດຄອງປະເພນີ ທີ່ເປັນເອກະລັກຂອງປະຊາຊົນລາວບັນດາເຜົ່າ.    ແຂວງຫົວພັນ  ນອກຈາກຈະມີປະຫວັດສາດອັນເກົ່າແກ່ແລ້ວ ແຫ່ງການຕໍ່ສູ້ກູ້ຊາດ, ປະຊາຊົນພາຍໃນແຂວງຫົວພັນ ຍັງມີນ້ຳໃຈອັນດີງາມ, ມີຄວາມຮັກແພງສາມັກຄີອັນຫນຽວແຫນ້ນ, ມີນ້ຳໃຈຮັກຊາດ ຮັກບ້ານເກີດເມືອງນອນຂອງຕົນ, ຄຽງຄູ່ໄປພ້ອມໆກັນນັ້ນ ແຂວງຫົວພັນ ຍັງປະກອບດ້ວຍແຫລ່ງທ່ອງທ່ຽວທີ່ສຳຄັນໂດດເດັ່ນ ຕິດພັນກັບປະຫວັດສາດ ອັນເກົ່າແກ່ ມູນເຊື້ອແຫ່ງການຕໍ່ສູ້ປະຕິວັດຊາດ ເຊັ່ນ: ຖ້ຳບັນດາການນຳຂອງລາວ  ຢູ່ທີ່ເມືອງວຽງໄຊ,  ທີ່ອ້ອມຮອບໄປດ້ວຍພູຜາ ແລະ ທຳມະຊາດທີ່ສວຍງາມ.  ນອກນັ້ນ ກໍ່ຍັງມີທຳມະຊາດທີ່ສວຍງາມ, ມີນ້ຳຕົກ, ນ້ຳຕົກຕາດສະເຫລີຍ, ຜາຫີນຕັ້ງ, ແກ້ວຫລັກເມືອງ, ວັດສີບຸນເຮືອງໄຊມຸງຄຸນ, ຫັດຖະກຳແຜ່ນແພຜ້າໄຫມໝີ່, ໄຫມມ້ອນ ເມືອງຊຳເຫນືອ ແລະ ເມືອງຊຳໃຕ້, ພ້ອມດ້ວຍວັດທະນະທຳອັນດີງາມ, ຮິດຄອງຂອງເຜົ່າຕ່າງໆ ທີ່ຍັງຮັກສາ ແລະ ສຶບທອດກັນມາ ຈົນເທົ້າປະຈຸບັນ.   ແຂວງຫົວພັນ ເມື່ອຫລາຍປີກ່ອນ ໄດ້ຮັບການຍ້ອງຍໍໃຫ້ເປັນຕົວເມືອງສີຂຽວ-ບໍລິສຸດ ຂອງອາຊຽນ, ເຊິ່ງມີຄວາມຫມາຍວ່າ: ເປັນເມືອງທີ່ມີຄວາມສວຍງາມທາງດ້ານທິວທັດທຳມະຊາດ ແລະ ມີອາກາດບໍລິສຸດເຢັນສະບາຍ. ເປັນເມືອງທີ່ຫນ້າຢູ່ ສຶກສາຮຽນຮູ້ເພາະເຕັ້ມໄປດ້ວຍຄວາມຫລາກຫລາຍທາງວັດທະນະທຳຂອງເຜົ່າພັນວິທະຍາ ທີ່ເປັນເອກະລັກຂອງຕົນເອງ, ກໍ່ຄືປະຊາຊົນໃນທ້ອງຖີ່ນ, ມີວິຖີຊີວິດ, ການທຳມາຫາກິນ ຕິດພັນກັບທຳມະຊາດ ແລະ ອາຫານການກິນ ກໍ່ມີຄວາມອຸດົມສົມບູນ ແລະ ດີຕໍ່ສຸຂະພາບ. ຄືກັບຄຳຂວັນແຂວງຫົວພັນ ທີ່ວ່າ: ( ຫົວພັນງົດງາມພູຜາ,   ນ້ຳມ້າສ່ອງໃສ,   ວຽງໄຊປະຫວັດສາດ,    ຜ້າໄຫມຊຳເຫນືອ ຫີນຕັ້ງຫົວພັນ,   ຖິ່ນພູ 3 ເສົາ,     ຄົກເຂົ້ານ້ຳລິນ,    ແຜນດິນວິລະຊົນ )ຕາມສະຖິຕີ ໃນປີ 2015 ທົ່ວແຂວງມີສະຖານທີ່ທ່ອງທ່ຽວທັງໝົດ 147 ແຫ່ງ, ໃນນັ້ນ, ສະຖານທີ່ທ່ອງທ່ຽວທາງດ້ານທຳມະຊາດ ຈຳນວນ 48 ແຫ່ງ, ສະຖານທີ່ທ່ອງທ່ຽວທາງດ້ານວັດທະນະທຳ ຈຳນວນ 34 ແຫ່ງ ແລະ ສະຖານທີ່ທ່ອງທ່ຽວທາງດ້ານປະຫວັດສາດ ຈຳນວນ 65 ແຫ່ງ. ພ້ອມກັນນັ້ນ ຊຳເຫນືອ-ຫົວພັນ ຍັງມີສິ່ງເອື້ອອຳນວຍຫລາຍຢ່າງ ທີ່ໄດ້ຮັບການພັດທະນາຢ່າງຕໍ່ເນື່ອງ, ໂດຍສະເພາະ ພື້ນຖານໂຄງລ່າງ, ຖະຫນົນຫົນທາງໄດ້ຮັບການພັດທະນາ, ເຮືອນຊານບ້ານຊ່ອງ, ໂຮງແຮມ, ເຮືອນພັກ ແລະ ຮ້ານອາຫານ ເພື່ອຮອງຮັບແກ່ແຂກບ້ານແຂກເມືອງ ທີ່ເດີນທາງມາຢ້ຽມຢາມ ແລະ ທ່ອງທ່ຽວ ທີ່ແຂວງຫົວພັນ.  ແລະ ແຕ່ລະປີ ມີນັກທ່ອງທ່ຽວ ເດີນທາງມາ ທັງພາຍໃນ ແລະ ຕ່າງປະເທດ  ເກືອບ 6 ເທື່ອຄົນ.