ພິທີຖະແຫຼງຂ່າວ ງານແຂ່ງຂັນລາງວັນ ທຸລະກິດອາຊຽນ ດີເດັ່ນຂອງ ສປປ ລາວ 2017 ແລະ ລາງວັນທຸລະກິດອາຊຽນ ດີເດັ່ນ 2017 ເຊິ່ງຈັດຂຶ້ນໃນວັນທີ 22 ພຶດສະພາ 2017 ທີ່ສະມາຄົມ ນັກຂ່າວແຫ່ງຊາດລາວ ໂດຍການເປັນປະທານຂອງ ທ່ານ ທະນົງສິນ ກັນລະຍາ ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ທັງເປັນຜູ້ຮັບຜິດຊອບ ການແຂ່ງຂັນລາງວັນທຸລະກິດ ອາຊຽນດີເດັ່ນ, ມີທ່ານ ຄໍາເມືອງ ອຸດົມຮັກ ຫົວໜ້າຫ້ອງການ ສະມາຄົມນັກຂ່າວແຫ່ງສປປ ລາວ, ມີຜູ້ຕາງໜ້າໂຄງການຮ່ວມມື ລາວ-ເຢຍລະມັນ ແລະ ບັນດາບໍລິສັດ ພ້ອມດ້ວຍສື່ມວນຊົນເຂົ້າຮ່ວມ. ທ່ານ ທະນົງສີນ ກັນລະຍາ ກ່າວວ່າ: ງານປະກວດລາງວັນ ທຸລະກິດອາຊຽນດີເດັ່ນຂອງ ສປປ ລາວ 2017 ຫລື (ABA Laos 2017) ບັນດາຫົວໜ່ວຍທຸລະກິດ ທີ່ເຂົ້າຮ່ວມຈະໄດ້ຮັບ ຜົນປະໂຫຍດ ຢ່າງຫລວງຫລາຍ ຈາກໂຄງການດັ່ງກ່າວ, ເຊິ່ງເປັນການເປີດໂອກາດ ໃຫ້ບັນຫົວໜ່ວຍທຸລະກິດລາວ ໄດ້ພົບປະແລກປ່ຽນ ແລະ ສ້າງຄູ່ຮ່ວມທຸລະກິດໃໝ່ໆດ້ວຍກັນ ໂດຍສະເພາະ ການຂະຫຍາຍຕະຫລາດ ໃນອາຊຽນ ເຊິ່ງການແຂ່ງຂັນດັ່ງກ່າວ ໄດ້ແບ່ງອອກເປັນ 3 ປະເພດ ຄື: ລາງວັນດີເດັ່ນ ຂະແໜງເຊື່ອມໂຍງບູລິມະສິດຂອງລາວ ມີ: E - ASEAN / ICT, ຜ້າແພເຄື່ອງນຸ່ງຮົ່ມ, ການຂົນສົ່ງ, ຜະລິດຕະພັນໄມ້, ໂຄງລ່າງພື້ນຖານ, ອາຫານກະສິກຳ, ພະລັງງານ, ການທ່ອງທ່ຽວ, ຫັດຖະກຳ ແລະ ຄ້າຂາຍຍ່ອຍ. ສຳລັບລາງວັນທຸລະກິດ ຂະໜາດນ້ອຍ ແລະ ຂະໜາດກາງດີເດັ່ນມີ: ລາງວັນໃນດ້ານການຂະຫຍາຍໂຕທຸລະກິດ, ການຈ້າງງານ, ການມີແນວຄິດປະດິດສ້າງ ແລະ ການມີຄວາມຮັບຜິດຮັບຕໍ່ສັງຄົມ. ສຳລັບປີນີ້ແມ່ນໄດ້ເພີ່ມລາງວັນພິເສດຄື: ລາງວັນທຸລະກິດສົ່ງເສີມ ການພັດທະນາຊຸມຊົນ, ເພື່ອນຂອງປະເທດລາວ, ຜູ້ປະກອບການໜຸ່ມດີເດັ່ນ ແລະ ຜູ້ປະກອບການຍິງດີເດັ່ນ. ປິດຮັບສະໝັກ ໃນວັນທີ 15 ສິງຫາ 2017 ແລະ ຈະປະກາດຜົນຊະນະເລີດ ແລະ ຮອງຊະນະເລີດ ໃນວັນທີ 28 ສິງຫາ 2017 ທີ່ ນະຄອນຫລວງວຽງຈັນ. ສຳລັບງານ ທຸລະກິດອາຊຽນດີເດັ່ນ 2017 ການແຂ່ງຂັນ ໃນລະດັບອາຊຽນ ແມ່ນຈະຈັດຂຶ້ນທີ່ ປະເທດ ຟີລິປິນ ການແຂ່ງຂັນແບ່ງເປັນ 3 ປະເພດ ຄື: ລາງວັນທຸລະກິດ ດີເດັ່ນເຊື່ອມໂຍງ ກັບອາຊຽນໃນ 12 ຂະແໜ່ງບູລິມະສິດ ປະກອບ ມີ ການປະມົງ, ເຄື່ອງໄຟຟ້າ, E-ASEAN/ICT, ຜ້າແພເຄື່ອງນຸ່ງຮົ່ມ, ການຂົນສົ່ງ, ຜະລິດຕະພັນໄມ້, ຢາງພາລາ, ອາຫານກະສິກຳ, ສຸຂະພາບ, ການທ່ອງທ່ຽວ, ລົດຍົນ ແລະ ຄ້າຂາຍຍ່ອຍ; ສ່ວນລາງວັນທຸລະກິດ ຂະໜາດນ້ອຍ ແລະ ຂະໜາດກາງດີເດັ່ນ ປະກອບ ມີ ລາງວັນໃນດ້ານ ການຂະຫຍາຍໂຕທຸລະກິດ, ການຈ້າງງານ, ການມີແນວຄິດປະດິດສ້າງ ແລະ ການມີຄວາມຮັບຜິດຊອບຕໍ່ສັງຄົມ ແລະ ລາງວັນພິເສດ ແມ່ນລາງວັນທຸລະກິດ ສົ່ງເສີມການພັດທະນາຊຸມຊົນ, ເພື່ອນຂອງປະເທດ ສະມາຊິກອາຊຽນ, ຜູ້ປະກອບການດີເດັ່ນ ແລະ ຜູ້ປະກອບການຍິງດີເດັ່ນ. ເປີດຮັບສະໝັກ ບໍ່ໃຫ້ກາຍວັນທີ 30 ມິຖຸນາ 2017 ແລະ ຈະປະກາດຜົນຊະນະ ໃນວັນທີ 6 ກັນ ຍາ 2017 ທີ່ ໂອກາດາ ມະນີລາ, ເມືອງ ພາຣານັກ ປະເທດຟີລິປິນ ສຳລັບຫົວໜ່ວຍທຸລະກິດໃດສົນໃຈ ສາມາດຕິດຕໍ່ສອບຖາມໄດ້ທີ່ www.aba2017.com/join-aba-2017
