ເພື່ອເປັນການປະກອບສ່ວນ ແລະ ຊຸກຍູ້ສົ່ງເສີມດ້ານວຽກງານສີລະປະວັນນະຄະດີ ໃຫ້ແກ່ຫ້ອງການ ຖວທ ເມືອງທ່າພະບາດ ກໍ່ຄືສູນວັດທະນະທຳເດັກ ຂອງເມືອງ ດັ່ງນັ້ນ, ໃນວັນທີ 22 ພຶດສະພາ 2017 ຜ່ານມານີ້ ຢູ່ທີ່ຫ້ອງປະຊຸມຫ້ອງວ່າການປົກຄອງເມືອງທ່າພະບາດ, ພະແນກ ຖະແຫລງຂ່າວ-ວັດທະນະທຳ ແລະ ທ່ອງທ່ຽວ ແຂວງບໍລິຄຳໄຊ ກໍ່ຄືຂະ ແໜງວັດທະນະທຳ ໄດ້ນຳເອົາເຄື່ອງ ດົນຕີພື້ນເມືອງລາວ ຈຳນວນ 1 ຊຸດ: ໃນນັ້ນປະກອບມີ ຄື: ກອງທັດໜ້າ, ຊໍອີ້, ກອງສອງໜ້າ, ລະນາດເອກ, ລະນາດທຸ້ມ, ສາບ, ຊີ່ງ, ຂີມ, ຊໍອູ້, ແຄນ ແລະ ກອງຫາງ, ລວມມູນຄ່າ 17 ລ້ານກ່ວາກີບ ມາມອບໃຫ້ຫ້ອງການຖະແຫລງຂ່າວ-ວັດທະນະທຳ ແລະ ທ່ອງທ່ຽວເມືອງທ່າພະບາດ, ເປັນກຽດມອບໂດຍ ທ່ານນາງ ຄຳຍອງ ຈອມມະນີວົງ ຮອງຫົວໜ້າພະແນກ ຖະແຫລຂ່າວ,ວັດທະນະທຳ ແລະ ທ່ອງທ່ຽວແຂວງບໍລິຄຳໄຊ, ຕາງໜ້າຮັບໂດຍ ທ່ານ ບົວສອນ ບຸດຊາວດອນຮອງເຈົ້າເມືອງທ່າພະບາດ, ຜູ້ຊີ້ນຳວຽກງານວັດທະນະທຳ-ສັງຄົມ ໂດຍຊ່ອງໜ້າພະນັກງານທັງສອງຝ່າຍ ເຂົ້າຮ່ວມເປັນສັກຂີພິຍານ ໂອກາດນີ້, ທ່ານຮອງເຈົ້າເມືອງທ່າພະບາດ ກໍ່ໄດ້ສະແດງຄວາມຂອບໃຈຕໍ່ພະແນກ ຖວທ ແຂວງ ບໍລິຄຳໄຊ ທີ່ໄດ້ນຳເອົາເຄື່ອງອຸປະກອນດົນຕີພື້ນເມືອງລາວ ມາມອບໃຫ້ ຫ້ອງການ ຖວທ ເມືອງ ໃນຄັ້ງນີ້ ແລະ ຈະນຳໃຊ້ເຄື່ອງຈຳນວນດັ່ງກ່າວ ເຂົ້າໃນວຽກງານຕົວຈິງ ແລະໃຫ້ເກີດມີຜົນປະໂຫຍດ ສູງສຸດ ຫວັງຢ່າງຍິ່ງວ່າໃນໂອກາດໜ້າ ຫ້ອງການ ຖວທ ເມືອງທ່າພະບາດ ຈະໄດ້ຮັບການຊ່ວຍເຫຼືອ ຈາກພາກສ່ວນທີ່ກ່ຽວຂ້ອງ ເພື່ອສົ່ງເສີມວັດທະນະທຳຂອງລາວ ໃຫ້ໄດ້ຮັບການພັດທະນາສຶບຕໍ່ໄປເລື້ອຍໆ.
