ກອງປະຊຸມດໍາເນີນຊີວິດການເມືອງປັບປຸງປົວແປງພັກ ຂອງອົງຄະນະພັກ ຫ້ອງວ່າການສໍານັກງານນາຍົກລັດຖະມົນຕີ ປະຈໍາປີ 2017 ໄດ້ໄຂຂຶ້ນໃນຕອນເຊົ້າ ຂອງວັນທີ 29 ພຶດສະພາ 2017 ຢູ່ຫ້ອງວ່າການສໍານັກງານນາຍົກລັດຖະມົນຕີ. ພາຍໃຕ້ການເປັນປະທານຂອງ ທ່ານ ເພັດ ພົມພິພັກ  ກໍາມະການສູນກາງພັກ, ເລຂາຄະນະພັກ, ລັດຖະມົນຕີ, ທັງເປັນຫົວໜ້າຫ້ອງ ວ່າການສໍານັກງານນາຍົກລັດຖະມົນຕີ. ໂດຍໃຫ້ກຽດເຂົ້າຮ່ວມ ແລະ ໃຫ້ທິດຊີ້ນໍາຕໍ່ກອງປະຊຸມ ຂອງທ່ານ ທອງລຸນ ສີສຸລິດ ກໍາມະການກົມການເມືອງສູນກາງພັກ, ນາຍົກລັດຖະມົນຕີແຫ່ງ ສປປ ລາວ, ມີທ່ານ ຮອງນາຍົກ ລັດຖະມົນຕີ, ບັນດາ ລັດຖະມົນຕີປະຈໍາສຳນັກງານນາຍົກລັດຖະມົນຕີ, ຄະນະພັກ, ສະມາຊິກພັກອາວຸໂສບໍານານ, ສະມາຊິກພັກສົມບູນ-ສໍາຮອງ ພ້ອມດ້ວຍແຂກຖືກເຊີນ ເຂົ້າຮ່ວມ.  ໃນໂອກາດເປີດກອງປະຊຸມ ທ່ານ ເພັດ ພົມພິພັກ ລັດຖະມົນຕີ, ຫົວໜ້າຫ້ອງ ວ່າການສໍານັກງານນາຍົກລັດຖະມົນຕີ ໄດ້ກ່າວວ່າ: ກອງປະຊຸມດໍາເນີນຊີວິດການເມືອງຄັ້ງນີ້ ແມ່ນມີຄວາມໝາຍຄວາມສໍາຄັນ ເພາະແມ່ນຄວາມຮຽກຮ້ອງຕ້ອງການ ອັນຮີບດ່ວນ ເພື່ອປັບປຸງປົວແປງພາຍໃນພັກ ຂອງອົງຄະນະພັກ ຫສນຍ ຕາມຄໍາສັ່ງຂອງກົມການເມືອງສູນກາງພັກ ເລກທີ 01/ກມສພ, ລົງວັນທີ 01 ກຸມພາ 2017 ແນໃສ່ສ້າງພັກເຮົາ ມີຄວາມປອດໃສ ໜັກແໜ້ນ, ເຂັ້ມແຂງ, ມີການຫັນປ່ຽນຢ່າງຕັ້ງໜ້າ ແລະ ທັນກັບສະພາບການ ເພື່ອສືບຕໍ່ນໍາພາພາລະກິດ ປົກປັກຮັກສາ ແລະ ພັດທະນາປະເທດຊາດ ຕາມທິດທີ່ ມະຕິກອງປະຊຸມໃຫຍ່ ຄັ້ງທີ 10 ຂອງພັກກໍານົດໄວ້. ໃນໂອກາດດຽວກັນ, ທ່ານຍັງໄດ້ຮຽກຮ້ອງໃຫ້ບັນດາ ສະມາຊິກພັກ ຈົ່ງເຊີດຊູ ແລະ ຍົກສູງຄວາມຮັບຜິດຊອບຂອງຕົນ ດຳເນີນການສຳຫຼວດກວດກາ ດ້ວຍຄວາມກ້າຫານ, ເດັດດ່ຽວ, ບໍລິສຸດ, ຈິງໃຈ ແລະ ສ້າງສັນ ເພື່ອເຮັດໃຫ້ກອງປະຊຸມຄັ້ງນີ້ ບັນລຸຕາມຈຸດປະສົງ ແລະ ລະດັບຄາດໝາຍ ເຮັດໃຫ້ພາຍໃນພັກ ປອດໃສ, ເຂັ້ມແຂງ ແລະ ໜັກແໜ້ນ ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ກ້າວສູ່ຈຸດໝາຍປາຍທາງຕາມທີ່ພັກເຮົາກຳນົດໄວ້.   ໃນໂອກາດທີ່ມີຄວາມໝາຍສຳຄັນນີ້, ກອງປະຊຸມໄດ້ຮັບຟັງການໂອ້ລົມ ແລະ ໃຫ້ທິດຊີ້ນຳ ຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ  ກ່ອນອື່ນທ່ານໄດ້ຍົກໃຫ້ເຫັນຄວາມໝາຍ, ຄວາມສຳຄັນ ຕໍ່ການດຳເນີນຊີວິດການເມືອງປັບປຸງປົວແປງພັກ ລວມທັງ ມູນເຊື້ອ, ການເຕີບໃຫຍ່ຂະຫຍາຍຕົວ ແລະ ຜົນສຳເລັດອັນພົ້ນເດັ່ນ ພາຍໃຕ້ການນຳພາຊີ້ນຳຂອງພັກ ໃນແຕ່ລະໄລຍະ ເຊິ່ງໄດ້ກາຍເປັນ ພື້ນຖານອັນໜັກແໜ້ນ ໃຫ້ແກ່ພັດທະນາເສດຖະກິດ-ສັງຄົມ ກໍ່ຄື ການປົກປັກຮັກສາ ແລະ ສ້າງສາພັດທະນາປະເທດຊາດ, ເຮັດໃຫ້ປະເທດເຮົາ ສືບຕໍ່ມີຄວາມໜັກແໜ້ນ ທາງດ້ານການເມືອງ, ສັງຄົມມີຄວາມສະຫງົບ ແລະ   ເປັນລະບຽບຮຽບຮ້ອຍໂດຍພື້ນຖານ, ເສດຖະກິດຂະຫຍາຍຕົວຢ່າງຕໍ່ເນື່ອງ ແລະ ໝັ້ນທ່ຽງ, ຊີວິດການເປັນຢູ່ ຂອງປະຊາຊົນລາວບັນດາເຜົ່າ ນັບມື້ດີຂຶ້ນ, ການເຊື່ອມໂຍງກັບພາກພື້ນ ແລະ ສາກົນ ນັບມື້ຄ່ອງຕົວເປັນຢ່າງດີ. ກອງປະຊຸມຄັ້ງນີ້ ຈະໄດ້ດໍາເນີນແຕ່ວັນທີ 29 ພຶດສະພາ ຫາ ວັນທີ 6 ມິຖຸນາ 2017.  ຈິ່ງຈະສຳເລັດລົງ.