ປະຊາຊົນບ້ານໂພນສະຫວາດ ເມືອງເຟືອງ, ແຂວງວຽງຈັນ ທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້ານ້ຳງື່ມ 2 ຈຳນວນ 1.052 ຄອບຄົວ ໄດ້ຮັບໃບຕາດິນປຸກສ້າງຖາວອນ ແລະ ຈຳນວນ 1.008 ຄອບຄົວ, ໄດ້ຮັບໃບແຈ້ງເນື້ອທີ່ດິນກະສິກຳ, ໃນນີ້ປະກອບມີ 3 ຄຸ້ມ ຄື: ຄຸ້ມແກ້ວມີໄຊ, ຄຸ້ມໄຊສຳພັນ ແລະ ຄຸ້ມໂພນສະຫວາດ, ເຊິ່ງມີພິທີມອບ-ຮັບຢ່າງເປັນທາງການ ໃນທ້າຍເດືອນພຶດສະພາ 2017 ນີ້, ທີ່ສະໂມສອນບ້ານດັ່ງກ່າວ, ໂດຍການມອບຂອງ ທ່ານ ວິດົງ ໄຊຍະສອນ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ, ຮັບໂດຍແມ່ນຕາງໜ້າທັງສາມຄຸ້ມບ້ານ, ເຂົ້າຮ່ວມໃນຄັ້ງນີ້  ມີ ທ່ານ ສີຕານ ສຸກປັນຍາ ກຳມະການພັກແຂວງ, ເລຂາພັກເມືອງ, ເຈົ້າເມືອງໆເຟືອງ, ທ່ານ ສຸກັນ ພົງສະຫວັດ ຕາງໜ້າ ບໍລິສັດ ພອນສະຫວັນພັດທະນາ ຈຳກັດ, ມີພາກສ່ວນທີ່ກ່ຽວຂ້ອງຈາກແຂວງ ແລະ ເມືອງ ພ້ອມດ້ວຍພໍ່ແມ່ປະຊາຊົນ ເຂົ້າຮ່ວມ.ທ່ານ ຄຳສອນ ສີວົງດາວ ກຳມະການພັກເມືອງ, ເລຂາຄະນະພັກຮາກຖານ,ຫົວໜ້າກຸ່ມບ້ານໂພນສະຫວາດ ເມືອງເຟືອງ ກ່າວວ່າ: ນັບແຕ່ປີ 2006 ເປັນຕົ້ນມາຄະນະຮັບຜິດຊອບຂັ້ນສູນກາງ, ຂັ້ນແຂວງ, ຂັ້ນເມືອງ, ບ້ານອ້ອມຂ້າງ ແລະ ຜູ້ພັດທະນາໂຄງການ ກໍ່ຄື ບໍລິສັດ ພອນສະຫວັນພັດທະນາ    ຈຳກັດ, ໄດ້ມີການສຳຫຼວດເນື້ອທີ່ດິນທັງໝົດເພື່ອຮັບໃຊ້ເຂົ້າໃນການຍົກຍ້າຍ ແລະ ຈັດສັນໃຫ້ປະຊາຊົນທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້ານ້ຳງື່ມ 2, ເຊິ່ງໄດ້ສຳຫຼວດຢູ່ 5 ກຸ່ມບ້ານ, ຜົນສຳຫຼວດ ມີ 8 ບ້ານ, ທີ່ສາມາດສະໜອງເນື້ອທີ່ໃຫ້ແກ່ໂຄງການ, ລວມມີເນື້ອທີ່ທັງໝົດ 648,5 ເຮັກຕາ, ໃນນີ້ເປັນດິນປຸກສ້າງ 122 ເຮັກຕາ ແລະ ເນື້ອທີ່ທຳການຜະລິດ 526 ກວ່າເຮັກຕາ. ທ່ານກ່າວອີກວ່າ: ເພື່ອເຮັດໃຫ້ປະຊາຊົນຜູ້ຖືກຜົນກະທົບໄດ້ມີດິນປຸກສ້າງ, ດິນທຳການຜະລິດມີການຄຸ້ມຄອງ ແລະ ນຳໃຊ້ຢ່າງຖືກຕ້ອງຕາມລະບຽບກົດ ໝາຍທີ່ວາງອອກທາງໂຄງການ ແລະ ຄະນະຮັບຜິດຊອບໄດ້ອອກເອກະສານສິດນຳໃຊ້ທີ່ດິນໃຫ້ປະຊາຊົນ ຜູ້ທີ່ຖືກຜົນກະທົບ ຄື: ອອກໃບຕາດິນປຸກສ້າງຖາວອນ ມີທັງໝົດ 1.052 ຕອນ ຫຼື ຄອບຄົວ, ໃນນີ້ຄຸ້ມແກ້ວມີໄຊ,  ມີຈຳນວນ 345 ຕອນ, ມີເນື້ອທີ່ 20,7ເຮັກຕາ; ຄຸ້ມໄຊສຳພັນ, ມີຈຳນວນ 373 ຕອນ, ມີເນື້ອທີ່ 22,38 ເຮັກຕາ; ຄຸ້ມໂພນສະຫວາດ, ມີຈຳນວນ 334 ຕອນ, ມີເນື້ອທີ່ 20 ກວ່າເຮັກຕາ; ອອກໃບແຈ້ງເນື້ອທີ່ດິນກຳສິກຳ ມີທັງໝົດ 1.008 ຕອນ ຫຼື ຄອບຄົວ, ໃນນີ້ຄຸ້ມແກ້ວມີໄຊ, ມີຈຳນວນ 333 ຕອນ,     ມີເນື້ອທີ່ 166 ກວ່າເຮັກຕາ; ຄຸ້ມໄຊສຳພັນ, ມີຈຳນວນ 356 ຕອນ, ມີເນື້ອທີ່ 178 ເຮັກຕາ; ຄຸ້ມໂພນສະຫວາດ, ມີຈຳນວນ 319 ຕອນ, ມີເນື້ອທີ່ 159 ກວ່າເຮັກຕາ.ທ່ານ ວິດົງ ໄຊຍະສອນ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ ຍັງໄດ້ເນັ້ນໃຫ້ອຳນາດການປົກຄອງເມືອງ, ຄະນະກຸ່ມບ້ານ, ອຳນາດການປົກຄອງບ້ານ, ຕະຫຼອດຮອດປະຊາຊົນຜູ້ທີ່ໃຊ້ດິນດັ່ງກ່າວເອົາໃຈໃສ່ແຈກຢາຍໃຫ້ປະຊາຊົນໄດ້ຮັບຕາມຄາດໝາຍທີ່ວາງໄວ້, ສະເພາະພໍ່ແມ່ປະຊາຊົນ ຈົ່ງໄດ້ເອົາໃຈໃສ່ຄຸ້ມຄອງ, ບົວລະບັດ ແລະ ຮູ້ນຳໃຊ້ດິນດັ່ງກ່າວໃຫ້ມີໝາກຜົນສາມາດຕອບສະໜອງກັບ ຄວາມຕ້ອງການພວກທ່ານໃຫ້ຍືນຍົງ, ທ່ານຍັງໄດ້ເນັ້ນໃຫ້ພໍ່ແມ່ປະຊາຊົນ ຮ່ວມແຮງໃຈພ້ອມກັນພັດທະນາບ້ານກໍ່ຄືຄອບຄົວຂອງຕົນ ໃຫ້ມີການພັດທະນາດີຂຶ້ນເລື່ອຍໆ. ໃນໂອກາດນີ້ທ່ານເຈົ້າແຂວງໆວຽງຈັນ ຍັງໄດ້ລົງໄປຢ້ຽມຊົມຄອບຄົວຕົວແບບໃນການຜະລິດກະສິກຳຂອງບ້ານດັ່ງກ່າວຕື່ມອີກ.