ກຸ່ມຄຳໄພຊະນະກໍ່ສ້າງ ຈຳກັດ ໄດ້ຮັບອະນຸຍາດໃຫ້ເປັນຜູ້ສຶກສາ-ສຳຫຼວດຄວາມເປັນໄປໄດ້ ໂຄງການກໍ່ສ້າງເຂື່ອນໄຟຟ້ານ້ຳຕົກນ້ຳງື່ມຕອນລຸ່ມຢູ່ 2 ຈຸດຄື: ຈຸດທີ 1 ເຂດບ້ານຈຸ້ມ ເມືອງທຸລະຄົມ, ແລະ ຈຸດທີ 2 ເຂດບ້ານນານິນ ເມືອງວຽງຄຳ, ແຂວງວຽງຈັນ ໂດຍຈະໃຊ້ເວລາໃນການສຶກສາ-ສຳຫຼວດ 18 ເດືອນ ແລະ ຄາດວ່າທັງ 2 ເຂື່ອນ ຈະມີກຳລັງຕິດຕັ້ງໄຟຟ້າຕ່ຳສຸດ 128 ເມກາວັດ ມູນຄ່າການລົງທຶນ 250 ລ້ານໂດລາສະຫະລັດ ຫຼື ປະມານ 2.000 ຕື້ກີບ. ( ສອງພັນ ຕື້ກີບ)ພິທີລົງນາມບົດບັນທຶກຄວາມເຂົ້າໃຈ (MOU) ໂຄງການດັ່ງກ່າວ ໄດ້ຈັດຂຶ້ນ.ໃນທ້າຍເດືອນພຶດສະພາ 2017 ນີ້, ຢູ່ທີ່ກະຊວງແຜນການ ແລະ ການລົງທຶນ ລະຫວ່າງ ທ່ານ ຄຳລຽນ ພົນເສນາ ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ຄຳໄພ ສົມຊະນະ ປະທານບໍລິສັດ ກຸ່ມຄຳໄພຊະນະກໍ່ສ້າງ ຈຳກັດ, ໂດຍຊ້ອງໜ້າ ທ່ານ ວີດົງ ໄຊຍະສອນ ເຈົ້າແຂວງວຽງຈັນ ພ້ອມດ້ວຍພາກສ່ວນກ່ຽວຂ້ອງ ທັງ 3 ຝ່າຍເຂົ້າຮ່ວມ.
