ຕາມການເປີດເຜີຍຂອງທ່ານ ຄຳບອນ ທຳມະວົງສາ, ຮອງຜູ້ຈັດການພາກສະໜາມ ບໍລິສັດ ຕັງຈະເລີນ ໃຫ້ຮູ້ວ່າ: ການຈັດຕັ້ງປະຕິບັດ ໂຄງການກໍ່ສ້າງທາງເບຕົງ ແຕ່ 4 ແຍກຕານມີໄຊຫາສາມແຍກສີເກີດ, ນະຄອນຫຼວງວຽງຈັນມາຮອດປັດຈຸບັນຄືບໜ້າ 16% ໜ້າວຽກສ່ວນໃຫຍ່ແມ່ນວາງທໍ່ລະບາຍນ້ຳ ສອງຂ້າງທາງ ແລະ ກຳລັງກໍ່ສ້າງທໍ່ຫຼ່ຽມ(box) ຢູ່ບ້ານຕານມີໄຊ ຕໍ່ກັບ ບ້ານໜອງພະຍາ, ການຈັດຕັ້ງປະຕິບັດແມ່ນຈະກໍ່ສ້າງເທື່ອລະເຄິ່ງຂອງເສັ້ນທາງ ແລະ ປ່ອຍອີກເຄິ່ງທາງໄວ້ສັນຈອນ. ສະນັ້ນ, ຈະເຮັດໃຫ້ທາງແຄບ ການສັນຈອນອາດພົບຄວາມຫຍຸ້ງຍາກ ໂດຍໄລຍະທີ່ມີຝົນຕົກ ເຮັດໃຫ້ທາງບາງບ່ອນເປເພ. ແຕ່ເຖິງຢ່າງໃດກໍ່ຕາມ, ທາງບໍລິສັດ ຕັງຈະເລີນ ໃນນາມຜູ້ຮັບເໜົາໂຄງການ ກໍ່ໄດ້ເອົາໃຈໃສ່ຮີບຮ້ອນສ້ອມແປງ ທາງບ່ອນທີ່ເປເພດ້ວຍການເກດຫນ້າທາງ ແລະ ໃຊ້ຫີນຂົບຖົມບ່ອນທີ່ເປັນຂຸມ ຄາດວ່າຈະສຳເລັດໃນວັນທີ່ 26 ພຶດສະພາ 2017. ສະນັ້ນ ທາງບໍລິສັດ ຈຶ່ງຂໍອະໄພມາຍັງທ່ານ ຜູ້ໃຊ້ລົດໃຊ້ຖະໜົນຜ່ານເສັ້ນທາງດັ່ງກ່າວທີ່ບໍ່ສະດວກເທົ່າທີ່ຄວນ. ພ້ອມດຽວກັນນັ້ນ ຫາກສາມາດຫຼີກເວັ້ນເສັ້ນທາງດັ່ງກ່າວໃນໄລຍະການກໍ່ສ້າງກໍ່ຈະເປັນການດີ ເຊັ່ນ: ທ່ານທີ່ເດີນທາງມາແຕ່ເສັ້ນທາງເລກທີ 13 ເໜື່ອ ມີຈຸດປະສົ່ງໄປເສັ້ນທາງ ເລກ ທີ່ 13 ໃຕ້ ໃຫ້ເວັ້ນມາທາງຕັດໄໝ່ນາຄູນ ມຸ່ງໜ້າສູ່ ທ່າງ່ອນ ທາງເລກ 10 ລົງມາວົງວຽນດອນໜູນ ເຂົ້າສູ່ທາງເລກທີ 13. ຖ້າມາແຕ່ 13 ເໜື່ອມີຈຸດປະສົງເຂົ້າສູ່ຕົວເມືອງໃຫ້ເຂົ້າມາດົງນາທອງ ລົງມາດົງນາໂສກ ລ້ຽວຊ້າຍມາທາງໜອງບົວທອງ ຫຼື ລົງມາສູ່ທົ່ງຂັນຄຳ, ທັ່ງນີ້, ກໍ່ເພື່ອຄວາມສະດວກໃນການເດີນທາງ ທັງເປັນການອຳນວຍຄວາມສະດວກ ໃນແກ່ການກໍ່ສ້າງດຳເນີນໄປດ້ວຍຜົນສຳເລັດ ເຊິ່ງຄາດວ່າໃນເດືອນກັນຍາ 1018 ຈະໄດ້ນຳໃນເສັ້ນທາງດັ່ງກ່າວເປັນທາງການ.
Editor: ຕະວັນ ແສງສະຫວັນ
