ເມື່ອບໍດົນມານີ້ ທີ່ໂຮງແຮມຄຣາວພາຊາ, ນະຄອນຫລວງວຽງຈັນ   ທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະທ່ອງທ່ຽວ, ພ້ອມດ້ວຍ ທ່ານ ບຸນທຽນ ແກ້ວສີພາ  ຫົວຫນ້າກົມການຄ້າພາຍໃນ, ກະຊວງອຸດສາຫະກຳ ແລະ ການຄ້າ ແລະ ທ່ານ ສະຣັນ ຣັງຄະສີຣິ ປະທານເຈົ້າຫນ້າທີ່ປະຕິບັດການ ກຸ່ມທຸລະກິດ ປີໂຕຣລຽມຂັ້ນປາຍ ບໍລິສັດ ປຕທ ຈຳກັດ(ມະຫາຊົນ) ໄດ້ຮ່ວມເປັນປະທານພິທີລົງນາມສັນຍາມອບສິດ ມາສເຕີແຟຣນໄຊ ກາເຟອາເມຊອນ ທີ່ ສປປ ລາວ ໃຫ້ແກ່ ບໍລິສັດ ພີທີທີ ລາວ ຈຳກັດ, ຢ່າງເປັນທາງການ.    ໃນພິທີ ທ່ານ ສະຣັນ ຣັງຄະສີຣິ ກ່າວວ່າ: ບໍລິສັດ ປຕທ ຈຳກັດ(ມະຫາຊົນ) ມີນະໂຍບາຍໃນການດຳເນີນທຸລະກິດ ມີເປົ້າຫມາຍສູ່ຍີ່ຫໍ້ຊັ້ນນຳ ຣິຈີນໍ ທອບແບຣນ (Regional Top Brand) ໃນພາກພື້ນອີນດູຈີນ ເຊິ່ງກະເຟອາເມຊອນ ໄດ້ບຸກຕະຫລາດໃຫມ່ ໃນຂົງເຂດອາຊີຕາເວັນອອກສ່ຽງໃຕ້ ຄວບຄູ່ກັບສະຖານີບໍລິການ ປຕທ. ແລະ ໃນກ່ອນຫນ້ານີ້ ໄດ້ມອບສິດໃນການຈຳຫນ່າຍ ມາສເຕີແຟຣນໄຊ ກາເຟອາເມຊອນ ໃນປະເທດກຳປູເຈຍ ໃຫ້ແກ່ບໍລະສັດ ປຕທ (ກຳປູເຈຍ) ແລະ ໃນຄັ້ງນີ້ ໄດ້ໃຊ້ຮູບແບບການມອບສິດ ໃນ ສປປ ລາວ. ແລະ ມີແຜນມອບສິດໄປຍັງປະເທດອື່ນໆ ໃກ້ຄຽງໃນອະນາຄົດອີກດ້ວຍ.   ການມອບສິດໃນການຈຳຫນ່າຍ ແຟຣນໄຊກາເຟອາເມຊອນ ແກ່ ພິທີທີລາວ ຄັ້ງນີ້ ນອກຈາກເປັນການເພີ່ມໂອກາດໃນການຂະຫຍາຍທຸລະກິດ ຂອງ ປຕທ ໃນພາກພື້ນອາຊີຕາເວັນອອກ  ແລ້ວ, ປະຊາຊົນລາວ ຍັງໄດ້ມີສ່ວນຮ່ວມໃນການດຳເນີນທຸລະກິດ ຮ່ວມກັນ ເປັນການສ້າງໂອກາດ, ສ້າງວຽກເຮັດງານທຳ, ສ້າງອາຊີບ ແລະ ສ້າງລາຍຮັບໄດ້. ສຳລັບປີ 2017 ສປປ ລາວ ມີຮ້ານກາເຟອາເມຊອນ ທີ່ດຳເນີນງານ ໂດຍ ພີທີທີລາວ ຈຳນວນ 38 ສາຂາ ແລະ ມີແຜນເພີ່ມຂື້ນ ເປັນ 75 ສາຂາ ພາຍໃນ ປີ 2021.     ໃນພິທີລົງນາມມອບສິດແຟຣນໄຊ ກາເຟອາເມຊອນ ໃຫ້ແກ່ນັກທຸລະກິດລາວ ທັງໃນ ແລະ ນອກ ຄັ້ງນີ້, ມີ  ຈຳນວນ 13 ທ່ານ, ພ້ອມກັນນັ້ນ ໃນຕອນທ້າຍ ຂອງງານ ທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ພ້ອມດ້ວຍ ທ່ານ ບຸນທຽນ ແກ້ວສີພາ ຫົວຫນ້າກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ, ລວມທັງຄະນະປະທານ ຍັງໄດ້ພ້ອມກັນຕັດແຖບຝ້າ ເປີດ ຢ່າງເປັນທາງການ.