ເມື່ອບໍ່ດົນມານີ້ ຢູ່ທີ່ໂຮງຮຽນ ອະນຸບານ-ປະຖົມ ແລະ ມັດທະຍົມສົມບູນ ຮຸ່ງເຮືອງ ບ້ານຫນອງບົວທອງ, ເມືອງສີໂຄດຕະບອງ, ນະຄອນຫລວງວຽງຈັນ. ໄດ້ຈັດກິດຈະກຳສະເຫລີມສະຫລອງວັນເດັກນ້ອຍ ສາກົນ 1 ມີຖຸນາ ຂື້ນ ໂດຍການມີສ່ວນຮ່ວມ ແລະ ເປັນສ່ວນຫນຶ່ງໃນການສ້າງກິດຈະກຳ ຄັ້ງນີ້ ຂອງບໍລິສັດ ວຽງທອງການຢາ ( ຜູ້ຈັດຈຳຫນ່າຍນົມອາເປຕັນ).ໃນການຈັດກິດຈະກຳສະເຫລີມສະຫລອງວັນເດັກຄັ້ງນີ້ ເຂົ້າຮ່ວມມີຄະນະອຳນວຍການໂຮງຮຽນຮຸ່ງເຮືອງ, ຜູ້ຕາງຫນ້າຈາກຫ້ອງການສຶກສາທິການ ແລະ ກິລາເມືອງສີໂຄດ, ຕາງຫນ້າຈາກພະແນກສຶກສາທິການ ແລະ ກິລາ ນະຄອນຫລວງ, ຕາງຫນ້າຈາກ ບໍລິສັດວຽງທອງການຢາ, ຕາງຫນ້າຈາກສະມາຄົມຜູ້ປົກຄອງພໍ່ແມ່ນັກຮຽນ, ພ້ອມດ້ວຍຜູ້ປົກຄອງ ແລະ ຫລານນ້ອຍນັກຮຽນ ເຂົ້າຮ່ວມກິດຈະກຳຄັ້ງນີ້ ເປັນຈຳນວນຫລວງຫລາຍ ແລະ ເຕັມໄປດ້ວຍຄວາມເບີກບານມ່ວນຊື່ນ. ການສະເຫລີມສະຫລອງວັນເດັກ ທີ່ໂຮງຮຽນອະນຸບານ-ປະຖົມ ແລະ ມັດທະຍົມສົມບູນ ດັ່ງກ່າວ ແມ່ນປະກອບການສະແດງສິລະປະວັນນະຄະດີ ( ຟ້ອນຂອງຫລາຍນ້ອຍ ໂຮງຮຽນອະນຸບານ ແລະ ປະຖົມ, ການສະແດງລະຄອນເວທີ, ການເຕັ້ນ, ການເດີນແບບ, ກິດຈະກຳແຕ້ມຮູບລະບາຍສີກະຕູນ, ການແຈກຂອງລາງວັນ ແລະ ອື່ນໆ. ສຳລັບ ບໍລິສັດ ວຽງທອງການຢາ ( ອາເປຕັນ) ແມ່ນໄດ້ມາຕັ້ງບູດ ວາງສະແດງ ແລະ ຈຳຫນ່າຍສິນຄ້າ, ພ້ອມທັງຈັດກິດຈະກຳຮ່ວມ ໂດຍການແຕ້ມຮູບລະບາຍສີ ສຳລັບເດັກ, ການແຈກຍ່າຍຂອງຂວັນ, ເຂົ້າຫນົມ ແລະ ນ້ຳດື່ມແກ່ເດັກນ້ອຍ ເພື່ອສ້າງບັນຍາກາດ ແລະ ເປັນສ່ວນຫນຶ່ງ ໃນການສະເຫລີມສະຫລອງວັນເດັກນ້ອຍສາກົນ ປະຈຳປີນີ້. ຕະຫລອດໄລຍະຜ່ານມາ ອາເປຕັນ ແມ່ນໄດ້ມີການຈັດກິດຈະກຳຮ່ວມກັບສັງຄົມມາເລື້ອຍໆ.
