ເປີດສາກຂື້ນຢ່າງເປັນທາງການ ສຳລັບ ງານວາງສະແດງ ແລະ ຈຳຫນ່າຍສິນຄ້າ ຫນຶ່ງເມືອງ ຫນຶ່ງຜະລິດຕະພັນ ແລະ ສິນຄ້າຄອບຄົວຕົວແບບ ຂອງນະຄອນຫລວງວຽງຈັນ ຄັ້ງທີ IV ປະຈໍາປີ 2017 ໂດຍມີ 115 ຫ້ອງຂາຍ, ຄາດວ່າມູນຄ່າການຊື້-ຂາຍທັງໜົດເກືອບ 2 ຕື້ກີບ ແລະ ຈະມີປະຊາຊົນເຂົ້າຮ່ວມຊົມປະມານ 17 ພັນກວ່າຄົນຕໍ່ມື້. ພິທີເປີດງານຢ່າງເປັນທາງການໄດ້ຈັດຂື້ນໃນວັນທີ 29 ພຶດສະພາ 2017 ຜ່ານມາ ທີ່ສູນການຄ່້າລາວ-ໄອເຕັກ ຫຼັງເກົ່າ ໂດຍການໃຫ້ກຽດເຂົ້າຮ່ວມຂອງທ່ານນາງ ເຂັມມະນີ ພົນເສນາ, ລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ສິນລະວົງ ຄຸດໄພທູນ, ເຈົ້າຄອງນະຄອນຫລວງວຽງຈັນ, ພ້ອມນັ້ນ ຍັງມີພາກສ່ວນທີ່ກ່ຽວຂ້ອງ, ແຂກຖຶກເຊີນ, ຫົວຫນ່ວຍທຸລະກິດ, ຜູ້ປະກອບການ ແລະ ຄອບຄົວຕົວແບບເຂົ້າຮ່ວມ.ທ່ານ ເບີລິນ ເພັດຈັນທະລາດ, ຫົວໜ້າພະແນກອຸດສາຫະກຳ ແລະ ການຄ້າ ກ່າວວ່າ: ງານດັ່ງກ່າວຈັດຂື້ນ ເພື່ອແນ່ໃສ່ເປັນການສົ່ງເສີມຜະລິດຕະພັນພູມປັນຍາທ້ອງຖິ່ນໃຫ້ມີມູນຄ່າສູງ ແລະ ເປັນທີ່ສົນໃຈຂອງສັງຄົມ ທັງເປັນການນຳໃຊ້ ກາໜາຍ ໜຶ່ງເມືອງ ໜຶ່ງຜະລິດຕະພັນ ແລະ ສິນຄ້າຄອບຄົວຕົວແບບຂອງນະຄອນຫຼວງວຽງຈັນ ໃຫ້ມີການຂະຫຍາຍຕົວ ແລະ ມີຄວາມຍືນຍົງ ໂດຍຜ່ານຂະບວນການປຸງແຕ່ງຫຸ້ມຫໍ່ ທີ່ສອດຄ່ອງກັບຕະຫຼາດ ໃນຍຸກເຊື່ອມໂຍງກັບພາກພື້ນ ແລະ ສາກົນ ດັ່ງນັ້ນ, ງານວາງສະແດງ ແລະ ຈໍາຫນ່າຍສິນຄ້າ ຫນຶ່ງເມືອງ ຫນຶ່ງຜະລິດຕະພັນ ແລະ ສິນຄ້າຄອບຄົວຕົວແບບ ຈຶ່ງຈະເປັນອີກງານຫນຶ່ງ ທີ່ເຮັດໃຫ້ສິນຄ້າດັ່ງກ່າວເປັນທີ່ຮູ້ຈັກຂອງສັງຄົມ ແລະ ເຂົ້າເຖິງຕະຫລາດຫລາຍຂື້ນ ແລະ ກວ້າງຂວາງ.ສຳລັບ ໃນປີນີ້ ມີຫ້ອງວາງສະແດງທັງໜົດ 115 ຫ້ອງ, ມາຈາກຕ່າງແຂວງ 12 ແຂວງເຂົ້າຮ່ວມ ແລະ ສິນຄ້າໂອດ໊ອບມີ 37 ຫົວໜ່ວຍ, ສິນຄ້າຄອບຄົວຕົວແບບ 50 ຫົວໜ່ວຍ; ຄາດວ່າຈະມີມູູນຄ່າການຊື້-ຂາຍໃນງານຫລາຍກວ່າ 2 ຕື້ກີບ ແລະ ຈະມີຜູ້ເຂົ້າທ່ຽວຊົມປະມານ 17 ພັນກວ່າຄົນ. ນອກຈາກນັ້ນພາຍໃນງານດັ່ງກ່າວຍັງໄດ້ມອບ - ຮັບການນຳໃຊ້ກາໜາຍໂອດ໊ອບແຫ່ງຊາດໃຫ້ແກ່ 3 ຫົວໜ່ວຍທຸລະກິດ ຄື: ໂຮງສີເຂົ້ານາງ ບຸນຮຽງ ຈາກເມືອງ ໄຊທານີ, ໂຮງສີເຂົ້າສຸທັດ ຈາກເມືອງໄຊທານີ, ຫັດຖະກໍາຕໍາຫູກ ບ້ານ ຜາຊ້າງ, ເມືອງ ປາກງື່ມ. ເຊິ່ງງານໄດ້ເປີດໃຫ້ທຸກທ່ານໄດ້ໄປທ່ຽວຊົມ ແລະ ເລືອກຊື້ສິນຄ້າທີ່ມີຄຸນນະພາບ ຈາກສີມືຄົນລາວ ນັບຕັ້ງວັນທີ 26 ພຶດສະພາ ຈົນເຖິງ ວັນທີ 1 ມີຖຸນາ 2017.
Editor: ຕະວັນ ແສງສະຫວັນ
