ເນື່ອງໃນໂອກາດວັນປູກຕົ້ນໄມ້ແຫ່ງຊາດ 1 ມີຖຸນາ, ຢູ່ທີ່ປ່າສະຫງວນ ດົງຫົວຊ້າງ, ເມືອງໄຊເສດຖາ ແຂວງອັດຕະປື ໄດ້ມີພິທີປູກຕົ້ນໄມ້ແຫ່ງຊາດ 1 ມີຖຸນາ ຢ່າງເປັນຂະບວນການພົດພື້ນ. ເຂົ້າຮ່ວມໃນພິທີ ມີ ທ່ານ ປະລິນຍາເອກ ນາມ ວິຍະເກດ ເລຂາພັກແຂວງ, ເຈົ້າແຂວງອັດຕະປື, ມີ ທ່ານ ບຸນເສີດ ເສດທິລາດ ເລຂາພັກເມືອງ, ເຈົ້າເມືອງໄຊເສດຖາ, ມີບັນດາຄະນະນຳແຂວງ , ຄະນະນຳເມືອງ, ຫົວຫນ້າພະແນກ, ຮອງພະແນກ, ພະນັກງານວິຊາການ ຈາກຫ້ອງການອ້ອມຂ້າງເມືອງ, ອຳນາດການປົກຄອງບ້ານ ທີ່ກ່ຽວຂ້ອງເຂົ້າຮ່ວມ ໃນພິທີ ທ່ານ ບຸນເສີດ ເສດທິລາດ ເຈົ້າເມືອງໄຊເສດຖາ ຂື້ນກ່າວເປີດພິທີ ແລະ ໄດ້ກ່າວວ່າ: ການປູກຕົ້ນໄມ້ໃນຄັ້ງນີ້ ແມ່ນການປະກອບສ່ວນໃນການຈັດຕັ້ງປະຕິບັດ ຄາດຫມາຍດ້ານສິ່ງແວດລ້ອມ ທີ່ກອງປະຊຸມໃຫຍ່ຂອງພັກ ຄັ້ງທີ 10 ວາງອອກ ແລະ ຍຸດທະສາດປ່າໄມ້ ແຕ່ນີ້ຮອດປີ 2020 ເພື່ອປົກປັກຮັກສາ ຊັບພະຍາກອນທຳມະຊາດ ສິ່ງເວດລ້ອມ ແລະ ການນຳໃຊ້ ຢ່າງມີປະສິດທິພາບ ຕາມທິດສີຂຽວ ແລະ ຍືນຍົງ. ນອກນີ້ ວັນດັ່ງກ່າວ ຍັງມີຄວາມສຳຄັນ ເປັນວັນປູກຕົ້ນໄມ້ແຫ່ງຊາດ ເປັນວັນຄືນຄວາມອຸດົມສູ່ທຳມະຊາດ ແລະ ຍັງເປັນການປູກຈິດສຳນຶກໃຫ້ຄົນທົ່ວສັງຄົມ ແລະ ລູກຫລານທີ່ເກີດໃຫມ່-ໃຫຍ່ລຸນ ຮູ້ຈັກຮັກ ແລະ ປົກປັກຮັກສາປ່າໄມ້ ແລະ ຄວາມອຸດົມສົມບູນຂອງປ່າທີ່ມີຢູ່. ທ່ານ ຍັງໄດ້ຮຽກຮ້ອງມາຍັງພາກສ່ວນຕ່າງໆ ໃນສັງຄົມ ຮ່ວມກັນປູກ ຕົ້ນໄມ້ ຄົນລະ 2 ຕົ້ນ ແລະ ສິ່ງສຳຄັນປູກແລ້ວຕ້ອງຮູ້ຈັກຮັກສາ, ບົວລະບັດ ເຮັດຮົ້ວອ້ອມ ໃສ່ຝຸ່ນ ແລະ ຫົດນ້ຳໃຫ້ເປັນຕົ້ນໄມ້ທີ່ເຕີບໃຫຍ່ ຂະຫຍາຍຕົວ ແລະ ຍື້ນຍົງ. ໃນພິທີ ການນຳແຂວງ ໂດຍມີ ທ່ານ ປະລິນຍາເອກ ນາມ ວິຍະເກດ ເຈົ້າແຂວງອັດຕະປື, ພ້ອມດ້ວຍການນຳເມືອງ, ການນຳພະແນກ, ຫ້ອງການ ແລະ ພາກສ່ວນຕ່າງໆ ໄດ້ພ້ອມກັນນຳເອົາຕົ້ນໄມ້ໄປປູກ ໃນເຂດປ່າສະຫງວນ ດົງຫົວຊ້າງ ເຊິ່ງເບ້ຍໄມ້ທີ່ນຳມາປູກທັງມົດ ຈຳນວນ 1 ພັນ 4 ຮ້ອຍຕົ້ນ ປູກໃນເນື້ອທີ່ 10 ກວ່າເຮັກຕາ ໃນນັ້ນປະກອບມີ ເບ້ຍໄມ້ຄະຍຸງ, ເບ້ຍໄມ້ດູ່, ເບ້ຍໄມ້ແຕ້ ແລະ ເບ້ຍໄມ້ປະດັບອື່ນໆ.
