ທ້າຍເດືອນ ພຶດສະພາ 2017 ຜ່ານມານີ້, ຢູ່ທີ່ ສະໂມສອນຊັ້ນ 2 ຂອງເມືອງວັງວຽງ, ແຂວງວຽງຈັນ. ໄດ້ມີກອງປະຊຸມວິສາມັນ ຄັ້ງທີ່ 1 ສະໄຫມທີ 6 ຂອງສະມາຄົມບຳນານ ແລະ ຜູ້ອາຍຸສູງເມືອງວັງວຽງ ຂຶ້ນຢ່າງເປັນທາງການ. ໂດຍການເປັນກຽດເຂົ້າຮ່ວມຂອງ ທ່ານ ຄຳຜອງ ດວງວິໄລ ກຳມະການພັກແຂວງ, ເລຂາພັກເມືອງ ເຈົ້າເມືອງໆວັງວຽງ. ມີ ທ່ານ ຄຳນາມ ພິມມະສອນ ປະທານສະມາຄົມບຳນານ ແລະ ຜູ້ອາຍຸສູງເມືອງວັງວຽງ, ມີບັນດາທ່ານຫົວຫນ້າຫ້ອງການ, ຫົວຫນ້າກຸ່ມບ້ານ, ນາຍບ້ານ ແລະ ຫົວຫນ້າໜ່ວຍຈຸຂອງສະມາຄົມທົ່ວເມືອງວັງວຽງເຂົ້າຮ່ວມ. ໃນພິທີ ທ່ານ ຄຳນາມ ພິມມະສອນ ປະທານສະມາຄົມບຳນານ ແລະ ຜູ້ອາຍຸສູງເມືອງວັງວຽງ ຂຶ້ນຜ່ານບົດສະຫລຸບ 3 ເດືອນ ວ່າ: ສະມາຊິກສະມາຄົມບຳນານ ແລະ ຜູ້ອາຍຸສູງເມືອງ ທຸກຄົນມີແນວຄິດໝັກແໝ້ນ ເຊື່ອໝັ້ນຕໍ່ແນວທາງນະໂຍບາຍຂອງພັກ - ລັດ ວາງອອກ ເປັນຕົ້ນ ສະມາຊິກ ມີຄວາມເຂົ້າໃຈຕໍ່ການຈັດຕັ້ງປະຕິບັດ ຕາມລະບຽບຂອງກອງທຶນ, ພາຍຫຼັງການມອບ-ຮັບໜ້າທີ່ ຈາກຄະນະຊຸດເກົ່າແລ້ວ, ກໍ່ໄດ້ມີການຈັດຕັ້ງເປີດກອງປະຊຸມຄັ້ງທີ 1 ຂຶ້ນໃນວັນທີ 10/2/2017 ແລະ ໄດ້ຮັບຮອງເອົາລະບຽບຂອງສະມາຄົມ, ຂໍ້ຕົກລົງຂອງທ່ານເຈົ້າເມືອງ, ການແບ່ງຄວາມຮັບຜິດຊອບ, ການກຳນົດການນຳໃຊ້ເງິນເຂົ້າໃນວຽກງານ ແລະ ເນື້ອໃນຂອງປື້ມສະມາຊິກກອງທຶນຫົວໃໝ່. ສຳເລັດການປັບປຸງການຈັດຕັ້ງຂັ້ນຮາກຖານ ບ້ານທີ່ຂຶ້ນກັບເມືອງມີ 8 ບ້ານ ຈັດເປັນ 8 ໜ່ວຍ, ກຸ່ມບ້ານທີ່ຂຶ້ນກັບເມືອງ ຈຳນວນ 5 ກຸ່ມບ້ານ ແລະ ອີກ 1 ກຸ່ມບ້ານ ຂອງແຂວງໄຊສົມບູນ (ກຸ່ມບ້ານໂພນພະ). ທົ່ວເມືອງວັງວຽງ ມີສະມາຊິກທັງໝົດ 632 ຄົນ, ຍິງ 236 ຄົນ ແລະ ໃນ 3 ເດືອນຜ່ານມີສະມາຊິກເສຍຊີວິດທັງໝົດ 5 ຄົນ, ຍິງ 1 ຄົນປະຕິບັດນະໂຍບາຍ ເປັນເງິນ 6 ລ້ານ 9 ແສນກີບ. ປະຈຸບັນກອງທຶນສະມາຄົມບຳນານ ແລະ ຜູ້ອາຍຸສູງເມືອງວັງວຽງ ມີເງິນທັງໝົດ 91 ລ້ານກວ່າກີບ. ສ່ວນທິດທາງແຜນການ 3 ເດືອນຕໍ່ໜ້າ ແມ່ນຈະໄດ້ສຶບຕໍ່ເອົາໃຈໃສ່ເຕົ້່ໂຮມຄວາມສາມັກຄີ, ປັບປຸງການຈັດຕັ້ງຂັ້ນຮາກຖານ, ຊອກຫາທຸກແຫຼ່ງລາຍຮັບເຂົ້າກອງທຶນ ແລະ ປຸກລະດົມຂະຫຍາຍສະມາຊິກໃຫ້ນັບມື້ນັບຂະຫຍາຍຕົວ. ຮ່ຳຮຽນ ແລະ ເຜີຍແຜ່ລະບຽບຂອງສະມາຄົມໃຫ້ສະມາຊິກເຂົ້າໃຈ ແລະ ທົ່ວເຖິງ, ທາບທາມເພື່ອສ້າງກອງທຶນທານຸເຄາະເວລາເສຍຊີວິດຂັ້ນເມືອງ ຜູ້ລະ 10.000 ກີບ. ຕອນທ້າຍ, ທ່ານ ຄຳຜອງ ດວງວິໄລ ກຳມະການພັກແຂວງ, ເລຂາພັກເມືອງ ເຈົ້າເມືອງໆວັງວຽງ ກໍ່ໄດ້ໃຫ້ກຽດໂອ້ລົມຕໍ່ກອງປະຊຸມ ແລະ ສະມາຊິກທຸກຕື່ມອີກ.( ແຫລງຂ່າວຈາກທີມຂ່າວວັງວຽງ).
