ປະເດັນໜຶ່ງທີ່ຫຼາຍພາກສ່ວນໃຫ້ຄວາມສຳຄັນ ແລະ ເປັນຫ່ວງກ່ຽວກັບແນວທາງໃນການແກ້ໄຂ ແຕ່ບັນຫານີ້, ທ່ານລັດຖະມົນຕີກະຊວງແຜນການກໍໄດ້ເຜີຍໃຫ້ຮູ້ວ່າດຽວນີ້ສາມາດແກ້ໄດ້ຫຼາຍກວ່າ 60% ແລ້ວ ແລະ ສ່ວນທີ່ເຫຼືອຈະຊຳລະໃຫ້ໝົດພາຍໃນ 3 ເດືອນ.ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະການລົງທຶນ ໄດ້ເປີດເຜີຍເຖິງການແກ້ໄຂບັນຫາໜີ້ສິນຂອງ ລັດຖະບານບ້ວງ 400 ຕື້ກີບ, ທີ່ພາກສ່ວນກ່ຽວຂ້ອງຍັງໃຫ້ຄວາມສົນໃຈ ທ່ານໄດ້ໃຫ້ຮູ້ວ່າ: ການຄົ້ນຄ້ວາການຈັດສັນໜີ້ສິນໂຄງການນີ້ ແມ່ນພາຍໃຕ້ການຊີ້ນຳຂອງລັດຖະບານພາຍຫຼັງທີ່ສະພາແຫ່ງຊາດໄດ້ຮັບຮອງສະເພາະບ້ວງ 400 ຕື້ກີບ ຊຶ່ງນອກຈາກການແກ້ໄຂໜີ້ສິນປົກກະຕິລັດຖະບານກໍໄດ້ວາງມາດຕະການໄວ້ ກ່ອນອື່ນໝົດຕ້ອງຊຳລະໜີ້ທີ່ໂຄງການສຳເລັດ 100% ແລະ ສິ້ນສຸດສັນຍາໄປແລ້ວ, ສໍາລັບໜີ້ເກົ່າກໍໃຫ້ກວດກາ ເບິ່ງໂຄງການນັບແຕ່ປີ 2012 ຄືນຫຼັງ ແມ່ນຈັດເຂົ້າໃນບູລິມະສິດທີ 1 ແລະ ອັນທີ 2 ແມ່ນໂຄງການທີ່ສຳເລັດແຕ່ປີ 2016 ຄືນຫຼັງເຖິງວ່າສັນຍາບໍ່ທັນສີ້ນສຸດກໍຕາມ ຖ້າໄດ້ສຳເລັດແລ້ວແມ່ນຈັດໃນບູລິມະສິດທີສອງ. ສ່ວນໂຄງການຊຳລະໜີ້ໄພພິບັດ ຊຶ່ງນັບແຕ່ພາຍຸນົກເຕັນ ແລະ ພາຍຸອື່ນໆເປັນຕົ້ນມາທີ່ຍັງບໍ່ທັນໄດ້ຊຳລະທັງໝົດແມ່ນ ຈະໄດ້ເອົາມາຈັດສັນ, ມອບໃຫ້ຂະແໜງການ ແລະ ທ້ອງຖິ່ນເປັນຜູ້ຈັດມ້າງ ຊຶ່ງລວມທັງໝົດມີ 2.675 ໂຄງການໃນ ມູນຄ່າ 400 ຕື້ກີບ ຊຶ່ງການຊຳລະໜີ້ ແມ່ນເປັນໄປຕາມລະບຽບຫຼັກການ ໂດຍມາຮອດປະຈຸບັນຊຳລະໄປແລ້ວຫຼາຍ ກວ່າ 60% ຂອງຈຳນວນ 400 ຕື້ນັ້ນ ແລະ ຄາດວ່າອີກ 3 ເດືອນ ການຊຳລະສະ ສາງໜີ້ສິນ 400 ຕື້ກີບຈະສຳເລັດເພາະວ່າພາກສ່ວນທີ່ກ່ຽວຂ້ອງໄດ້ກຽມເງິນໄວ້ໝົດແລ້ວ.
Editor: ຕະວັນ ແສງສະຫວັນ
