ແຂວງບໍລິຄຳໄຊ ໄດ້ກໍານົດສອງຈຸດ ເປີດພິທີທາງການປູກຕົ້ນໄມ້ແຫ່ງຊາດ ວັນທີ 1 ມີຖຸນາ ໂດຍກຳນົດເອົາມັດທະຍົມສຶກສາສົມບູນໜອງບົວ ເປັນພິທີເປີດທາງການຂອງແຂວງ ໃນວັນທີ 1 ມີຖຸນາ 2017 ສ່ວນຈຸດທີ່ສອງໄດ້ຈັດຂຶ້ນຢ່າງເປັນທາງການ ຢູ່ທີ່ໂຮງຮຽນມັດທະຍົມສຶກສາສົມບູນສີທ່ານາໄຊ ເມືອງປາກຊັນແຂວງບໍລິຄຳໄຊ ໂດຍໃຫ້ກຽດເຂົ້າຮ່ວມ ແລະ ກ່າວເປີດພິທີຂອງ ທ່ານ ຄຳຜີວ ພີມມະທັດ ຫົວໜ້າພະແນກກະສິກຳ-ປ່າໄມ້ແຂວງບໍລິຄຳໄຊ ມີບັນດາຫົວໜ້າຂະແໜງການ ພະນັກງານວິຊາການພາຍໃນພະແນກກະສິກຳ-ປ່າໄມ້ແຂວງ ຮອງເຈົ້າເມືອງປາກຊັນ ຫ້ອງການກະສິກຳ-ປ່າໄມ້ເມືອງ ຕະຫຼອດຮອດອຳນາດການປົກຄອງບ້ານອ້ອມຂ້າງ ແລະ ຄູອາຈານນ້ອງນັກຮຽນພາຍໃນ ມໍສໍ ສີທ່ານາໄຊ ເຂົ້າຮ່ວມເປັນຈຳນວນຫຼວງຫຼາຍ ສໍາລັບການປູກຕົ້ນໄມ້ ໃນວັນປູກໄມ້ແຫ່ງຊາດ ໃນວັນທີ 1 ມີຖຸນາ 2017 ນີ້ ຢູ່ແຂວງບໍລິຄຳໄຊ ມີທັງໝົດ 33.000 ເບ້ຍ. ໃນນີ້, ເບ້ຍໄມ້ປະດັບ 3.000 ເບ້ຍ ໄມ້ອຸດສະຫະກຳ 30.000 ເບ້ຍ, ໃນເນື້ອທີ່ທັງໝົດທົ່ວແຂວງ ໃນນີ້ປູກຢູ່ທີ່ມໍສໍ ສີທ່ານາໄຊ 150 ເບ້ຍ, ປະເພດໄມ້ປະດັບ ຕົ້ນໄມ້ຄູນ ແລະ ຕົ້ນໄມ້ກະເລົາ ດັ່ງທີ່ຮູ້ນຳກັນແລ້ວວ່າ: ພັກ ແລະ ລັດຖະບານ ຍາມໃດກໍ່ເຫັນຄວາມ ສຳຄັນ ກຽ່ວກັບ ວຽກງານປ່າໄມ້ຕະຫຼອດມາ ເຊີ່ງສະແດງໃຫ້ເຫັນ ໃນການກຳນົດແນວທາງນະໂຍບາຍ ເຂົ້າໃນການປົກປັກຮັກສາປ່າໄມ້ ການປູກໄມ້ ແລະ ຟື້ນຟູປ່າ ຊະນິດຕ່າງໆຕາມຄວາມສາມາດ, ຕາມຄວາມເໝາະສົມຂອງທ້ອງຖິ່ນ ແນໃສ່ປູກຕົ້ນໄມ້ເພື່ອຮັກສາສະພາບແວດລອ້ມ ຫຼຸດຜ່ອນການນຳໃຊ້ໄມ້ຈາກປ່າທຳ ມະຊາດ ແລະ ປູກຕົ້ນໄມ້ເພື່ອເປັນສິນຄ້າ ເຊິ່ງເປັນເງື່ອນໄຂໜຶ່ງທີ່ຈະນຳລາຍໄດ້ມາສູ່ຄອບຄົວ ປະເທດຊາດ ແລະ ເຮັດໃຫ້ຊິວິດການເປັນຢູ່ຂອງປະຊາຊົນດີຂຶ້ນ ພ້ອມກັນນັ້ນແຂວງຍັງໄດ້ເອົາໃນໃສ່ ປົກປັກຮັກສາປ່າໄມ້ດ້ວຍການອອກນະໂຍບາຍປິດປ່າ ສະກັດກັ້ນ ການຖາງປ່າເຮັດໄຮ່ແບບເລື່ອນລອຍ ແລະ ປ້ອງກັນໄຟລາມປ່າ ເພື່ອເຮັດໃຫ້ເນື້ອທີ່ປ່າໄມ້ໄດ້ຮັບການຟຶ້ນຟູ ດ້ວຍທຳມະຊາດຂຶ້ນເທື່ອລະກ້າວ ສຳລັບການປູກຕົ້ນໄມ້ຢູ່ຕາມໂຮງຮຽນ ແມ່ນເພື່ອເປັນການປູກຈິກສຳນຶກໃຫ້ແກ່ນັກຮຽນ ແລະ ລູກຫຼານຜູ້ທີ່ເປັນເຍົາວະຊົນ ອານຸຊົນ ໄດ້ຮັບຮູ້ ແລະ ມີຄວາມເຂົ້າໃຈຢ່າງເລິກເຊີ່ງ ຕໍ່ກັບການຄຸ້ມຄອງ ປົກປັກຮັກສາ ຟື້ນຟູບູລະນະປ່າໄມ້ ແລະ ປົກປັກຮັກສາສິງແວດລອ້ມ ແນ່ໃສ່ໃຫ້ກາຍເປັນພະລັງແຮງ ຈາກຂະບວນການຂອງມະຫາຊົນຢ່າງແທ້ຈິງ ຍ້ອນວ່າປ່າໄມ້ໄດ້ມີຄວາສຳຄັນຕົ້ນຕໍ ໃນການພັດທະນາເສດຖະກິດ-ສັງຄົມ ເປັນຕົ້ນ ໃຫ້ຄວາມປົກຫຸ້ມດ້ານເນື້ອທີ່ປູກໄມ້ ເຮັດໃຫ້ທຳມະຊາດມີຄວາມອຸດົມສົມບູນ ມີສິ່ງແວດລອ້ມທີ່ດີ ປົກປັກຮັກສາແຫຼ່ງນໍ້າກິນ-ນໍ້າໃຊ້ ຫຼຸດຜ່ອນພາວະໂລກຮ້ອນ ຕ້ານໄພທຳມະຊາດ ເປັນຕົ້ນພະຍຸ ໄພແຫ້ງແລ້ງ ການເຊາະເຈື່ອນຂອງດິນ ນໍ້າຖ້ວມທີ່ຮາຍແຮງ ແລະ ອື່ນໆ ປ່າໄມ້ຍັງເຮັດໃຫ້ປະເທດຊາດ ມີຄວາມເປັນສີຂຽວທີ່ສວຍສົດງົດງາມ ເຮັດໃຫ້ຄົນເຮົາດຳລົງຊິວິດຢູ່ດີ ເພາະຕົ້ນໄມ້ເປັນບ່ອນຜະລິດອົກຊີແຊ່ນ ໃຫ້ພວກເຮົາຫາຍໃຈ ເປັນບ່ອນຮັກສານໍ້າໃຫ້ຄົນ ສັດສາວາສິງໄດ້ດື່ມໃຊ້ ດັ່ງນັ້ນຈົ່ງພ້ອມກັນເອົາໃຈໃສ່ ປົກປັກຮັກສາປ່າໄມ້ ປູກຕົ້ນໄມ້ ແລະ ຟື້ນຟູປ່າໄມ້ໃຫ້ເປັນປ່າອຸດົມສົມບນູນ ຮູ້ຈັກຄຸນປະໂຫຍດຂອງປ່າໄມ້ ແລະ ໃຫ້ຖືເອົາວຽກງານນີ້ ກາຍເປັນພັນທະໜ້າທີ່ດີຂອງປວງຊົນ ແລະ ພ້ອມກັນປະຕິບັດຄຳຂັວນທີ່ວ່າ ປູກໄມ້ໃນວັນນີ້ ເພື່ອຊິວິດທີ່ດີໃນວັນໜ້າ ປູກໄມ້ໃຫ້ເປັນປ່າ ເພື່ອພັດທະນາປະເທດຊາດ.
Editer: ກຳປານາດ ລັດຖະເຮົ້າ
