ເມື່ອບໍ່ດົນມາ ຄະນະທິມງານຕ້ານ ແລະ ສະກັດກັ້ນ, ກວດກາເກັບກຳຂໍ້ມູນອັດສາຍະກຳຂັ້ນເມືອງ-ເມືອງຄຳ ໄດ້ຈັດພິທີເຜີຍແຜ່ເຊື່ອມຊືມກົດໝາຍອາດຍາ, ກົດໝາຍຢາເສບຕິດ. ມາດຕາ 75-76 ແລະ ມາດຕາ 146 ໃຫ້ແກ່ບ້ານຈອມທອງ ຂື້ນທີ່ສະໂມສອນປົກຄອງເມືອງຄໍາ, ແຂວງຊຽງຂວາງຢ່າງເປັນທາງການ. ໂດຍພາຍໃຕ້ການເປັນປະທານຂອງ ທ່ານ ພັນໂທ ຄຳພຸດ ສີພອນໄຊ ຮອງຫົວໜ້າກອງບັນຊາການການປ້ອງການຄວາມສະຫງົບ, ມີທ່ານ ຄຳຜາຍ ໄມມາລີ ເລຂາພັກບ້ານນາຍບ້ານໆຈອມທອງ, ມີຄະນະທິມງານ, ມີຄະນະພັກອຳນາດການປົກຄອງບ້ານ, ພໍ່ຄ້າຊາວຂາຍພ້ອມດ້ວຍພໍ່ແມ່ປະຊາຊົນບ້ານຈອມທອງເຂົ້າຮ່ວມທັງໝົດ 130 ຄົນ, ຍີງ 55 ຄົນ. ຈາກນັ້ນ ທ່ານ ເປ ມະລັດວັນ ຮອງຫົວໜ້າຫ້ອງການຍຸດຕິທຳເມືອງຄຳ ກໍ່ໄດ້ຂື້ນເຜີຍແຜ່ເຊື່ອມຊືມກົດໝາຍອາດຍາບາງມາດຕາເຊັ່ນ: ມາດຕາ 90 ທຳລາຍຮ່າງກາຍ, ມາດຕາ 119 ການລັກ, ການຍາດຊີງຊັບຂອງພົນລະເມືອງ, ມາດຕາ 128 ການຂົ່ມຂືນທຳຊຳເລົາ, ມາດຕາ 142 ການຫາປາ ຫຼື ສັດນ້ຳອື່ນໆໂດຍບໍ່ຖືກຕ້ອງຕາມກົດໝາຍພ້ອມທັງຜ່ານຂໍ້ຕົກລົງຂອງຄະນະກຳມະການກອງບັນຊາການປ້ອງກັນຄວາມສະຫງົບສຸກ, ປ້ອງກັນຊາດຂັ້ນແຂວງວ່າດ້ວຍການຄອບຄອງຄ້າຂາຍອາວຸດເສິກ. ຫຼັງຈາກນັ້ນທ່ານ ພັນໂທ ຄຳພຸດ ສີພອນໄຊ ຮອງຫົວໜ້າກອງບັນຊາການປ້ອງກັນຄວາມສະຫງົບ ກໍ່ຍັງໄດ້ຂື້ນເຜີຍແຜ່ເຊື່ອມຊືມກົດໝາຍຢາເສບຕິດມາດຕາ 75-76 ແລະ ມາດຕາ 146. ຈາກນັ້ນກໍ່ໄດ້ມີການປ່ອຍບັດລັບໃນການເກັບກຳຂໍ້ມູນຜູ້ເສບຢາເສບຕິດຄ້າຂາຍ, ຂີ້ລັກຫງັດແງະຢູ່ພາຍໃນບ້ານຈອມທອງຕື່ມອີກ. ຈຸດປະສົງ ກໍ່ເພື່ອເຮັດໃຫ້ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈເຖິງລະບຽບກົດໝາຍຕ່າງໆຢ່າງເລິກເຊິ່ງໃນການປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບສຸກຢູ່ພາຍໃນເມືອງ. ພ້ອມທັງຊອກວິທີແກ້ໄຂປະກົດການຫຍໍ້ທໍ້ໃນສັງຄົມໃຫ້ນັບມື້ຖອຍລົງເລື່ອຍໆ.
Editor: ກຳປານາດ ລັດຖະເຮົ້າ
