ອີງຕາມຂໍ້ຕົກລົງສະບັບເລກທີ 91/ນຍ ວ່າດ້ວຍ ການແຕ່ງຕັ້ງຄະນະກຳມະການ ຫັນການຄຸ້ມຄອງ ບັນດາບໍລິສັດ ສ້າງກອງທຶນພັກ ໄປຂຶ້ນກັບການຄຸ້ມຄອງຂອງລັດຖະບານ ຕາມລະບຽບ ກົດໝາຍ ໂດຍແມ່ນ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ເປັນຫົວໜ້າຄະນະ ແລະ ໃນໂອກາດ   ທີ່ເດີນທາງໄປເຄື່ອນໄຫວຢ້ຽມຢາມ ແລະ ເຮັດວຽກ ຢູ່ບັນດາແຂວງພາກໃຕ້. ດັ່ງນັ້ນ, ໃນວັນທີ 06 ມິຖຸນາ 2017 ທ່ານ ຮອງນາຍົກລັດຖະມົນຕີ ແລະ ຄະນະ ກໍ່ໄດ້ເດີນທາງໄປຢ້ຽມຢາມ ແລະ ຕິດຕາມຊຸກຍູ້ ການຈັດຕັ້ງປະຕິບັດໂຄງການຊອກຄົ້ນ-ສຳຫຼວດຂຸດຄົ້ນ-ປຸງແຕ່ງແຮ່ຄຳ ທີ່ເຂດວັງຕັດໃຫຍ່, ເມືອງຊານໄຊ, ແຂວງອັດຕະປື ເຊິ່ງມີ ຮອງເຈົ້າແຂວງໆອັດຕະປື, ພະແນກການ  ທີ່ກ່ຽວຂ້ອງ ແລະ ຄະນະອຳນວຍການຜູ້ຮັບຜິດຊອບໂຄງການ ໃຫ້ການຕ້ອນຮັບ.  ໃນການຢ້ຽມຢາມຄັ້ງນີ້, ທ່ານ ພົງໄຊ ໄຊຊະນະເສນາ ອຳນວຍການ ກຸ່ມບໍລິສັດລັດ ພັດທະນາຊົນນະບົດໃໝ່ ໄດ້ລາຍງານວ່າ ໂຄງການດັ່ງກ່າວ ເປັນການດຳເນີນທຸລະກິດຮ່ວມກັນ ລະຫວ່າງ ກຸ່ມບໍລິສັດ ລັດ ພັດທະນາຊົນນະບົດໃໝ່, ກະຊວງປ້ອງກັນປະເທດ ກັບ ບໍລິສັດຫຸ້ນສ່ວນ ຫວຽດນາມ-ລາວ ແຫ່ງ ສສ ຫວຽດນາມ ນັບແຕ່ເດືອນພະຈິກ 2006 ເປັນຕົ້ນມາ ໃນເນື້ອທີ່ ການຊອກຄົ້ນ ແລະ ສຳຫຼວດກວ່າ 399 ກິໂລຕາແມັດ ກວມເອົາເມືອງດາກຈຶງ, ແຂວງເຊກອງ ແລະ ເມືອງຊານໄຊ, ແຂວງອັດຕະປື ລວມມູນຄ່າການລົງທຶນ 50 ລ້ານໂດລາສະຫະລັດ, ໄດ້ມອບພັນທະເຂົ້າກອງທຶນພັກ ຫ້ອງວ່າການສູນກາງພັກ ລວມນ້ຳໜັກຄຳ 600 ກວ່າກິໂລກຣາມ ແລະ ມອບພັນທະຄ່າເຊົ່າສຳປະທານເນື້ອທີ່ດິນ ແລະ ອາກອນເງິນເດືອນ ໃຫ້ແກ່ລັດຖະບານ ໄປແລ້ວກວ່າ 290 ພັນໂດລາສະຫະລັດ. ນອກຈາກນີ້, ບໍລິສັດ ຍັງໄດ້ເອົາໃຈໃສ່ໃນການຄຸ້ມຄອງສິ່ງແວດລ້ອມ, ສັງຄົມ ແລະ ທຳມະຊາດ, ການຊ່ວຍເຫຼືອສັງຄົມ ແລະ ການປະກອບສ່ວນພັດທະນາທ້ອງຖິ່ນ ເປັນຕົ້ນ ປະກອບສ່ວນທຶນຮອນ ມູນຄ່າ 1 ແສນໂດລາສະຫະລັດຕໍ່ປີ ເຂົ້າໃນການພັດທະນາເຂດວັງຕັດ ເມືອງຊານໄຊ, ປິ່ນປົວພະຍາດ, ແຈກຢາຍຢາ ແລະ ເຂົ້າສານ ໃຫ້ແກ່ປະຊາຊົນ ໃນບ້ານອ້ອມຂ້າງ ໂດຍບໍ່ເສຍຄ່າ, ປະກອບ ສ່ວນຊ່ວຍເຫຼືອ ໃນເວລາເກີດໄພພິບັດທຳມະຊາດ, ນຳພາຕົວແທນປະຊາຊົນໃນບ້ານອ້ອມຂ້າງ ໄປທັດສະນະສຶກສາກ່ຽວກັບການພັດທະນາບ້ານ ແລະ ບ້ານວັດທະນະທຳ ຢູ່ ສສ ຫວຽດນາມ, ລວມເຖິງການສົ່ງເສີມ ການຜະລິດກະສິກຳ ເປັນຕົ້ນ ການປູກກາເຟ, ໝາກພິກໄທ ແລະ ມີການເກັບຊື້ນຳປະຊາຊົນ ເພື່ອຮັບປະກັນລາຍໄດ້ໃຫ້ແກ່ປະຊາຊົນ.

Editor: ກຳປານາດ ລັດຖະເຮົ້າ