ຫໍສະພາແຫ່ງຊາດທີ່ນຳໃຊ້ຢູ່ໃນປັດຈຸບັນ ໄດ້ກໍ່ສ້າງສຳເລັດໃນປີ 1990 ໂດຍນຳໃຊ້ທຶນຮອນຂອງລັດຖະບານ, ເປັນອາຄານ 3 ຊັ້ນ ເຊິ່ງອອກແບໂດຍສະຖາປານິກລາວເຮົາ. ສະພາແຫ່ງຊາດ ຈຶ່ງໄດ້ວາງແຜນຢ່າງຮັດກຸມນັບແຕ່ສະຖານທີ່ປຸກສ້າງ, ຮູບແບບຂອງອາຄານ, ທຶນຮອນໃນການກໍ່ສ້າງ ອັນທີ່ຂາດບໍ່ໄດ້ແມ່ນລັກສະນະ ແລະ ຄຸນນະພາບຂອງຕົວອາຄານຕ້ອງທົນທານສາມາດໃຊ້ງານໄດ້ ຫລາຍກວ່າ 100 ປີ. ຕາມການເປີດເຜຍຂອງ ທ່ານນາງ ສວນສະຫັວນ ວິຍະເກດ ກຳມະການ ຄະນະປະຈຳສະພາແຫ່ງຊາດ, ຮອງຫົວໜ້າຄະນະຊີ້ນຳລະດັບຊາດ ເພື່ອການກໍ່ສ້າງຫໍສະພາແຫ່ງຊາດຫຼັງໃໝ່ ກ່ຽວກັບການຮື້ຖອນຫໍສະພາແຫ່ງຊາດຫຼັງເກົ່າ ເພື່ອກໍ່ສ້າງຫໍສະພາແຫ່ງຊາດຫຼັງໃໝ່ ກ່າວຕໍ່ສື່ມວນຊົນໃນເມື່ອບໍ່ດົນມານີ້ ຜ່ານການນຳໃຊ້ຫໍສະພາແຫ່ງຊາດເຂົ້າໃນການປະຕິບັດໜ້າທີ່ວຽກງານຂອງສະພາແຫ່ງຊາດໃນໄລຍະ 26 ປີ ຜ່ານມາ ມີຫຼາຍຈຸດເກີດການເພພັງ ຊຸດໂຊມ, ຮົ່ວຊຶມ ເຊິ່ງແຕ່ລະປີຕ້ອງໃຊ້ງົບປະມານເຂົ້າໃນການສ້ອມແປງ.ຜ່ານການຄົ້ນຄວ້າປຶກສາຫາລືກ່ຽວກັບການສ້າງຫໍສະພາແຫ່ງຊາດຫຼັງໃໝ່ ໄດ້ເລີ່ມມາແຕ່ກອງປະຊູມສະພາແຫ່ງຊາດ ຊຸດ 6 ແລະ 7 ໂດຍໄດ້ຄົ້ນຄວ້າກ່ຽວກັບສະຖານທີ່ປຸກສ້າງ, ຮູບແບບຂອງອາຄານ, ທຶນຮອນໃນການກໍ່ສ້າງ, ເພື່ອສືບຕໍ່ຜັນຂະຫຍາຍທິດທາງ, ແຜນການດັ່ງກ່າວ ໂດຍໄດ້ຮັບການຕົກລົງຈາກສູນກາງພັກ, ສະພາແຫ່ງຊາດຊຸດ ທີ 8 ໄດ້ມີຄວາມກຽມພ້ອມໃນການປຸກສ້າງຫໍສະພາແຫ່ງຊາດຫຼັງໃໝ່ ແທນຫໍສະພາແຫ່ງຊາດຫຼັງເກົ່າປັດຈຸບັນທີ່ຈະຖືກຮື້ຖອນ. ທ່ານນາງ ສວນສະຫັວນ ກ່າວຕື່ມວ່າ: ຫໍສະພາແຫ່ງຊາດຕຶກໃໝ່ແມ່ນໄດ້ມີການອອກແບບຢ່າງເປີດກ້ວາງໃຫ້ ບໍລິສັດທີ່ມີຄວາມຊຳນານ, ມີປະສົບການດ້ານສະຖາປານິກເປັນຜູ້ອອກແບບ ເພື່ອໃຫ້ຄະນະກຳມະການກວດກາຄັດເລືອກ ພ້ອມກັນນັ້ນ ຄະນະຮັບຜິດຊອບໄດ້ວ່າຈ້າງບໍລິສັດຕ່າງປະເທດເປັນຜູ້ກວດກາແບບໃຫ້ມີຄວາມຮັບປະກັນດ້ານຄຸນນະພາບ. ຫໍສະພາແຫ່ງຊາດຫຼັງໃໝ່ ໄດ້ອອກແບບມາໃຫ້ເປັນອາຄານ 5 ຊັ້ນ ທີ່ມີລັກສະນະວັດທະນະທຳຂອງຊາດ, ສະຫງ່າງາມ ແລະ ທັນສະໄໝ, ແຂງແຮງທົນທານ ມີອາຍຸການໃຊ້ງານໄດ້ຫຼາຍກວ່າ 100 ປີ ແລະ ສະແດງເຖີງອົງການອານາດສູງສຸດແຫງລັດ, ມີຄວາມສອດຄ່ອງກັບລັກສະນະຂອງສະພາ, ສະດວກໃຫ້ແກ່ການຮອງຮັບການປະຕິບັດໜ້າທີ່ຂອງສະພາແຫ່ງຊາດ. ໃນນັ້ນ ປະກອບມີຫ້ອງປະຊຸມໃຫຍ່ຂອງສະພາແຫ່ງຊາດ, ຫ້ອງໂຖງໃຫຍ່, ຫ້ອງກຽດຕິຍົດ, ຫ້ອງປະຊຸມຂະໜາດກາງ ແລະ ນ້ອຍ, ຫ້ອງເຮັດວຽກຂອງຄະນະປະຈຳສະພາແຫ່ງຊາດ ແລະ ບັນດາຫ້ອງກະກຽມຮອງຮັບວຽກກອງປະຊຸມອື່ນໆ. ສຳລັບທຶນຮອນໃນການກໍ່ສ້າງຫໍສະພາຫຼັງໃໝ່ນີ້ແມ່ນໄດ້ຮັບການຊ່ວຍເຫຼືອຈາກພັກ-ລັດ ແລະ ປະຊາຊົນຫວຽດນາມ ອ້າຍ-ນ້ອງ ເປັນການປະກອບສ່ວນສຳຄັນໃນການເສີມສ້າງສາຍພົວພັນອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ.
Editor: ກຳປານາດ ລັດຖະເຮົ້າ
