ໃນວັນທີ 07 ມິຖຸນາ 2017 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ເດີນທາງໄປເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຈຳປາສັກ ເຊິ່ງມີ ທ່ານ ບຸນຖອງ ດີວິໄຊ ເຈົ້າແຂວງໆຈຳປາສັກ ພ້ອມດ້ວຍບັນດາຄະນະພັກ-ຄະນະນຳແຂວງ ແລະ ພະແນກການ ທີ່ກ່ຽວຂ້ອງ ໃຫ້ການຕ້ອນຮັບຢ່າງອົບອຸ່ນ. ໂອກາດນີ້, ທ່ານ ສອນໄຊ ສີພັນດອນ ໄດ້ສະແດງຄວາມຊົມເຊີຍ ຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ທີ່ມີການຂະຫຍາຍຕົວຢ່າງຕໍ່ເນື່ອງ. ພ້ອມນີ້, ທ່ານຮອງນາຍົກລັດຖະມົນຕີ ຍັງໄດ້ຍົກບາງບັນຫາ ທີ່ຈະໄດ້ພ້ອມກັນເອົາໃຈໃສ່ແກ້ໄຂ ຄື: ເອົາໃຈໃສ່ໃນການການກວດກາຕິດຕາມບັນຫາການລັກລອບ ແລະ ການສວຍໂອກາດຫາຊ່ອງວ່າງ ກ່ຽວກັບບັນຫາໄມ້, ກວດຄືນຂັ້ນຂອດບໍລິການ ທີ່ມີຫຼາຍຈຸດ-ຫຼາຍປ່ອງ ອັນເປັນການສ້າງຂໍ້ຫຍຸ້ງຍາກໃຫ້ແກ່ນັກລົງທຶນ, ສືບຕໍ່ເສີມຂະຫຍາຍສາຍພົວພັນ ໂດຍສະເພາະ ກັບບັນດາປະເທດອ້ອມຂ້າງ, ເຮັດໃຫ້ເສດຖະກິດ ສືບຕໍ່ຂະຫຍາຍຕົວບໍ່ຫຼຸດ 7 ສ່ວນຮ້ອຍ, ເອົາໃຈໃສ່ຄຸ້ມຄອງໂຄງການລົງທຶນຂອງລັດ, ເພີ່ມທະວີວຽກງານກວດສອບ ແລະ ມີມາດຕະການແກ້ໄຂ ຢ່າງເຂັ້ມງວດ, ສ້າງເງື່ອນໄຂສະພາບແວດລ້ອມ ເພື່ອເອື້ອອຳນວຍໃຫ້ແກ່ການດຳເນີນທຸລະກິດ, ສ້າງລະບົບປະຕູດຽວ ຕ້ອງເພີ່ມທະວີການປະສານງານໃຫ້ຫຼາຍຂຶ້ນ ເພື່ອການບໍລິການທີ່ວ່ອງໄວ, ກວດຄືນການຈັດຕັ້ງປະຕິບັດຄຳສັ່ງເລກທີ 474/ນຍ ວ່າດ້ວຍການຄຸ້ມຄອງລາຄາສິນຄ້າ, ສຸມໃສ່ຈັດຕັ້ງປະຕິບັດການເກັບຈາກຖານລາຍຮັບຕົວຈິງ, ຊຸກຍູ້ການບໍລິການການລົງທຶນ, ສືບຕໍ່ພັດທະນາດ້ານວັດທະນະທຳ-ສັງຄົມ ຕິດພັນກັບການສ້າງຮາກຖານການເມືອງ ມີຜູ້ນຳພາເຮັດ-ພາທຳ, ເບິ່ງຄືນການພັດທະນາໃນແຕ່ລະເຂດ ແລະ ບັນດາທ່າແຮງຂອງແຂວງ ໂດຍການມີສ່ວນຮ່ວມຂອງປະຊາຊົນ, ເອົາໃຈໃສ່ການຈັດສັນພູມລຳເນົາ ແລະ ອາຊີບໝັ້ນທ່ຽງ, ພ້ອມກັນຈັດຕັ້ງ ປະຕິບັດເປົ້າໝາຍແບບຍືນຍົງ ສືບຕໍ່ປັບປຸງກົງຈັກການຈັດຕັ້ງ, ກວດຄືນການຈັດຕັ້ງປະຕິບັດບັນດານິຕິກຳ ທີ່ສູນກາງວາງອອກໃນໄລຍະຜ່ານມາ, ສ້າງຂະບວນການສະເຫຼີມສະຫຼອງ 2 ວັນປະຫວັດສາດ ໃຫ້ມີຄວາມໝາຍຄວາມສຳຄັນອັນເລິກເຊິ່ງ ບົນຈິດໃຈປະຫຍັດ. ນອກຈາກນີ້, ທ່ານຮອງນາຍົກລັດຖະມົນຕີ ແລະ ຄະນະ ກໍ່ໄດ້ໄປຢ້ຽມຢາມຊຸກຍູ້ໂຄງການກໍ່ສ້າງ ເຂດນິຄົມອຸດສາຫະກຳ ຂະໜາດນ້ອຍຫາກາງ ປາກເຊ-ຍີ່ປຸ່ນ ທີ່ໄດ້ຮັບການສ້າງຕັ້ງຂຶ້ນ ໃນວັນທີ 05 ສິງຫາ 2015 ມີເນື້ອທີ່ທັງໝົດ 195 ເຮັກຕາ ໃນໄລຍະສຳປະທານ 50 ປີ, ໂດຍນຳໃຊ້ທຶນທັງໝົດ 62,5 ລ້ານໂດລາສະຫະລັດ ແລະ ທຶນຈົດທະບຽນ 1 ແສນໂດລາສະຫະລັດ, ເປັນນິຄົມອຸດສາຫະກຳ ທີ່ແນໃສ່ການສ້າງວຽກເຮັດງານທຳໃຫ້ແກ່ປະຊາຊົນ, ດຶງດູດການລົງທຶນຈາກປະເທດຍີ່ປຸ່ນ ແລະ ສ້າງໃຫ້ເປັນເຂດທີ່ເປັນມິດກັບສິ່ງແວດລ້ອມ.ພ້ອມນີ້, ຄະນະທ່ານຮອງນາຍົກລັດຖະມົນຕີ ກໍ່ໄດ້ໄປຢ້ຽມຢາມໂຄງການກໍ່ສ້າງເຂື່ອນໄຟຟ້າ ເຊນ້ຳນ້ອຍ 2 ເຊກະຕຳ 1 ທີ່ມີກຳລັງຕິດຕັ້ງ 20,1 ເມັກກາວັດ ເພື່ອເປັນການປະກອບສ່ວນ ການສະໜອງກະແສໄຟຟ້າໃຫ້ພໍ່ແມ່ປະຊາຊົນ ໃນບັນດາແຂວງພາກໃຕ້ ໄດ້ຊົມໃຊ້ຢ່າງທົ່ວເຖິງ; ພ້ອມດຽວກັນນີ້, ທ່ານ ສອນໄຊ ສີພັນດອນ ແລະ ຄະນະ ຍັງໄດ້ໄປຢ້ຽມຢາມການປູກໝາກ ໜອດເປັນສິນຄ້າ ຂອງບໍລິສັດ ດ້າຖັງ ໃນກຸ່ມບໍລິສັດ ຮວ່າງແອງຢາລາຍ ຈາກ ສສ ຫວຽດນາມ ໃນເນື້ອທີ່ບຸກເບີກປູກໝາກໜອດ 870 ກວ່າເຮັກຕາ ໂດຍໄດ້ນຳເຂົ້າແນວພັນຈາກໄຕ້ຫວັນ, ໄດ້ເກັບກ່ຽວຜົນຜະລິດແລ້ວ 12.900 ໂຕນ, ຄິດເປັນມູນຄ່າສົ່ງອອກ 120 ກວ່າຕື້ກີບ, ຊຶ່ງໄດ້ສົ່ງອອກໄປ ສປ ຈີນ, ຣາຊະອານາຈັກໄທ ແລະ ປະເທດສະວິດເຊີແລນ.
Editor: ກຳປານາດ ລັດຖະເຮົ້າ
