ຕອນບ່າຍວັນທີ 8 ມິຖຸນາ 2017 ທີ່ສຳນັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ Wouter Van Wersch ປະທານ ບໍລິສັດ General Electric for Asean ແລະ ທ່ານ ເອກອັກຄະລັດຖະທູດ ອາເມລິກາ ປະຈຳ ສປປ ລາວ ພ້ອມຄະນະ. ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ພ້ອມທັງ ຕີລາຄາສູງ ຕໍ່ສາຍພົວພັນການທູດລະຫວ່າງ ສປປ ລາວ ແລະ ສະຫະລັດອາເມລິກາ ໃນໄລຍະຫຼາຍປີທີ່ຜ່ານມາ ທັງການໃຫ້ການຊ່ວຍເຫຼືອໃນວຽກງານເກັບກູ້ລະເບີດ ແລະ ດ້ານການສຶກສາຂອງລາວ ເຊິ່ງການເດີນທາງມາຂອງບໍລິສັດ General Electric for Asean ຈາກສະຫະລັດອາເມລິກາ ເທື່ອນີ້, ເປັນການເສີມຂະຫຍາຍການຮ່ວມມື ລະຫວ່າງ ສອງປະເທດ ລາວ-ອາເມລິກາ ທີ່ການນຳສອງປະເທດ ໄດ້ເຊັນບົດບັນທຶກການຮ່ວມມື ໃນໄລຍະການເດີນທາງມາຮ່ວມກອງປະຊຸມສຸດຍອດອາຊຽນ ຄັ້ງທີ 28-29 ຂອງອະດີດປະທານນາທິບໍດີ ປີ 2016 ຊຶ່ງບໍລິສັດດັ່ງກ່າວ ກໍ່ເປັນບໍລິສັດໜຶ່ງທີ່ມີຊື່ສຽງ ດ້ານພະລັງງານ ແລະ ດ້ານສາທາລະນະສຸກ ກໍ່ເປັນເງື່ອນໄຂອັນດີ ເພື່ອການຮ່ວມມືກັບ ສປປ ລາວ ທີ່ພວມປັບປຸງຍົກລະດັບ ໃນຂະແໜງການພະລັງງານ ໂດຍສະເພາະ ກໍ່ເພື່ອເຮັດໃຫ້ປະຊາຊົນບັນດາເຜົ່າ ໄດ້ຊົມໃຊ້ໄຟຟ້າຢ່າງທົ່ວເຖິງ, ປະກອບສ່ວນຍົກລະດັບທາງດ້ານການບໍລິຫານ, ການຈັດການ ແລະ ການຄຸ້ມຄອງລະບົບພະລັງງານຂອງລາວ ໃຫ້ນັບມື້ນັບດີຂຶ້ນ. ສ່ວນດ້ານສາທາລະນະສຸກ ກໍ່ແມ່ນອີກດ້ານໜຶ່ງ ທີ່ລັດຖະບານລາວ ໃຫ້ຄວາມສຳຄັນ ແລະ ຊຸກຍູ້ສົ່ງເສີມ ອັນເປັນໂອກາດອັນດີ ເພື່ອໃຫ້ບໍລິສັດ ສາມາດສຶກສາຄວາມເປັນໄປໄດ້ ເພື່ອຈະລົງທຶນ ແລະ ຮ່ວມມືກັບຂະແໜງສາທາລະນະສຸກ ບໍ່ວ່າຈະເປັນການສ້າງໂຮງໝໍທີ່ທັນສະໄໝ ຫຼື ການສະໜອງເຄື່ອງມື ແລະ ເຕັກໂນໂລຊີອັນໃໝ່ ໃຫ້ແກ່ ສປປ ລາວ. ໃນໂອກາດດຽວກັນ, ທ່ານ Wouter Van Wersch ປະທານ ບໍລິສັດ General Electric for Asean ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບຢ່າງອົບອຸ່ນຂອງທ່ານ ຮອງນາຍົກລັດຖະມົນຕີ ແລະ ພ້ອມທີ່ຈະໃຫ້ການຮ່ວມມືໃນທຸກດ້ານ ໂດຍຜ່ານຫ້ອງການຜູ້ຕາງໜ້າ ໃນ ສປປ ລາວ, ການສຶກສາຄວາມເປັນໄປໄດ້ຂອງການລົງທຶນ ໃນຂະແໜງອຸດສາຫະກຳ ພະລັງງານໄຟຟ້າ ແລະ ການຮ່ວມມືແບບສອງຝ່າຍ ລວມເຖິງການລົງທຶນໃນການບໍລິການດ້ານສຸຂະພາບ ເພື່ອປະກອບສ່ວນເຂົ້າໃນການພັດທະນາ ເສດຖະກິດ-ສັງຄົມ ຂອງ ສປປ ລາວ.
Editor: ກຳປານາດ ລັດຖະເຮົ້າ
