ກອງປະຊຸມຄົບຄະນະສະມາຊິກສະພາປະຊາຊົນເພດຍິງ ສະພາປະຊາຊົນ ແຂວງວຽງຈັນ ໄດ້ໄຂຂຶ້ນ ໃນທ້າຍອາທິດຜ່ານມາ ໂດຍການເປັນກຽດເຂົ້າຮ່ວມຂອງ ທ່ານ ບຸນເພັງ ສາຍນໍລະດີ ຮອງເລຂາພັກແຂວງ, ປະທານສະພາປະຊາຊົນແຂວງວຽງຈັນ, ມີບັນດາສະມາຊິກສະພາປະຊາຊົນແຂວງວຽງຈັນຊຸດທີ1 ແລະ ບັນດາພະແນການກ່ຽວ ຂ້ອງຂອງແຂວງເຂົ້າຮ່ວມ. ທ່ານນາງ ບົວວັນ ທຳມະວົງ ຮອງປະທານສະພາປະຊາຊົນແຂວງວຽງຈັນ, ປະທານຄະນະສະມາຊິກສະພາປະຊາຊົນເພດຍິງ ໃນນາມປະທານກອງປະຊຸມ ໄດ້ກ່າວໄຂກອງປະຊຸມວ່າ: ໃນກອງປະຊຸມຄັ້ງນີ້ບັນດາຜູ້ແທນກອງປະຊຸມ ຈະໄດ້ພ້ອມກັນຮັບຟັງ ແລະ ຄົ້ນຄວ້າປະກອບຄໍາຄິດເຫັນ ໃສ່ຮ່າງບົດສະຫຼູບ ການເຄື່ອນໄຫວວຽກງານປະຈຳປີ 2016 ແລະ ທິດທາງແຜນການປີ 2017 ຂອງຄະນະສະມາຊິກສະພາປະຊາຊົນເພດຍິງ ສະພາປະຊາຊົນແຂວງວຽງຈັນ, ມະຕິຂອງຄະນະປະຈຳສະພາປະຊາຊົນແຂວງວຽງຈັນ ວ່າດ້ວຍ ກົນໄກການພົວພັນ ແລະ ການປະສານງານລະຫວ່າງຄະນະສະມາຊິກສະພາປະຊາຊົນເພດຍິງ ກັບບັນດາ ພາກສ່ວນທີ່ກ່ຽວຂ້ອງຢູ່ຂັ້ນແຂວງ ແລະ ເມືອງ, ທ່ານນາງ ແສງເດືອນ ພຸດສະຫວັດ ຮອງປະທານຄະນະສະມາຊິກ ສະພາປະຊາຊົນເພດຍິງ ໄດ້ກ່າວໃນຮ່າງບົດສະຫຼູບການເຄື່ອນໄຫວວຽກງານ ແຕ່ກອງປະຊຸມຄັ້ງປະຖົມມະລຶກຂອງສະພາປະຊາຊົນແຂວງວຽງຈັນ ຊຸດທີ 1ເຖິງປະຈຸບັນ ແລະ ທິດທາງແຜນການ ປີ 2017 ຂອງຄະນະສະມາຊິກສະພາປະຊາຊົນເພດຍິງວ່າ: ຜ່ານມາໄດ້ເປັນເຈົ້າການເຄື່ອນໄຫວຕາມພາລະບົດບາດ ໂດຍສະເພາະແມ່ນການຄົ້ນຄ້ວາ, ເກັບກຳຂໍ້ມູນ, ນຳສະເໜີຄຳຄິດເຫັນກ່ຽວກັບບັນຫາທີ່ສຳຄັນຕ່າງໆຂອງຊາດ, ຂອງແຂວງ ບັນຫາ ທີ່ ຕິດພັນກັບວຽກງານແມ່ຍິງ ເພຶ່ອພິຈາລະນາ ແລະ ຕົກລົງບັນຫາສຳຄັນທີ່ຖືກຮັບຮອງເອົາໃນກອງປະຊຸມສະພາແຫ່ງຊາດ, ສະພາປະຊາຊົນແຂວງ ແລະ ກອງປະຊຸມຄົບຄະນະປະຈຳສະພາປະຊາຊົນແຂວງ, ບັນດາຄະນະສະມາຊິກສະພາປະຊາຊົນເພດຍິງ ທີ່ປະຈຳຢູ່ເຂດເລືອກຕັ້ງເມືອງທົ່ວແຂວງ ກໍ່ໄດ້ມີຄວາມຕັ້ງໜ້າ, ຫ້າວຫັນ ແລະ ມີຄວາມຮັບຜິດຊອບສູງໃນການຄົ້ນຄວ້າ ມີຂໍ້ມູນທີ່ດີ ຕິດພັນກັບຕົວຈິງ ສາມາດປະກອບຄຳຄິດຄຳເຫັນ ຕໍ່ວຽກງານສຳຄັນຂອງແຂວງ, ເປັນເຈົ້າການປະສານສົມທົບກັບ ຄະນະກຳມະການກ່ຽວຂ້ອງ ຂອງສະພາປະຊາຊົນແຂວງ ລົງເຄື່ອນໄຫວຕິດຕາມກວດກາ ການປະຕິບັດກົດໝາຍວ່າດ້ວຍ ສະຫະພັນແມ່ຍິງລາວ, ກົດໝາຍວ່າດ້ວຍ ການພັດທະນາ ແລະ ບົດບາດແມ່ຍິງ, ກົດໝາຍວ່າດ້ວຍການຕ້ານ ແລະ ສະກັດກັ້ນ ການໃຊ້ຄວາມຮຸນແຮງຕໍ່ ແມ່ຍິງ ແລະ ເດັກນ້ອຍ ແລະ ກົດໝາຍອື່ນໆທີ່ພົວພັນຕໍ່ວຽກແມ່ ແລະ ເດັກ, ຄວາມສະເໝີພາບຍິງ-ຊາຍ,ບັນດາຫາງສຽງຂອງສັງຄົມ ແລະ ອື່ນໆ.

Editor: ສິງຫາ ເລືອງວັນ