ໃນ​ເມື່ອບໍ່ດົນຜ່ານມານີ້.​ ຢູ່ທີເມືອງວັງວຽງ ແຂວງວຽງຈັນ, ໄດ້ມີພິທີເຊັນບົດບັນທຶກຮ່ວມມື ລະຫວ່າງ ແຂວງ ອຽນບາຍ ສາທາລະນະລັດ ສັງຄົມນິຍົມ ຫວຽດນາມ ກັບ ແຂວງວຽງຈັນ ສປປ ລາວ. ໂດຍການເຂົ້າຮ່ວມຂອງ ທ່ານນາງ ສິງຄຳ ຄົງສະຫວັນ ຮອງເຈົ້າແຂວງໆວຽງຈັນ ພ້ອມດ້ວຍຄະນະຜູ້ແທນການນຳແຂວງ - ພະແນກການທີ່ກ້ຽວຂ້ອງ ຝ່າຍ ສປປລາວ ແລະ ທ່ານ ຕະວັນ ລ່ອງ  ຮອງເຈົ້າແຂວງ ອຽນບາຍ ສສ ຫວຽດນາມ  ພ້ອມດ້ວຍຄະນະຜູ້ແທນການນຳ ແຂວງອຽນບາຍ ເຂົ້າຮ່ວມ.

      ໃນພິທີ ທ່ານນາງ ສິງຄໍາ ຄົງສະຫວັນ ຮອງເຈົ້າແຂວງໆວຽງຈັນ ກ່າວຕ້ອນຮັບຕໍ່ ຄະນະຜູ້ແທນການນຳແຂວງ ອຽນບາຍ ສສ ຫວຽດນາມ ວ່າ:  ຄະນະພັກ-ອົງການປົກຄອງ ແຂວງວຽງຈັນ ມີຄວາມປິຕິຊົມຊື່ນເປັນຢ່າງຍິ່ງ ທີ່ໄດ້ມີໂອກາດຕ້ອນຮັບຄະນະຜູ້ແທນຂັ້ນສູງຂອງແຂວງ ອຽນບາຍ ທີ່ເດີນທາງມາຢ້ຽມຢາມ ແລະ ເຮັດວຽກຢ່າງເປັນທາງການ. ເພື່ອເປັນການສຶບຕໍ່ຮັດແໜ້ນຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຂອງສອງພັກ - ສອງລັດ ແຮກສ່ຽວນຳກັນມາເປັນເວລາ 9 ປີແລ້ວ, ແລະ ເປັນການສ້າງຂະບວນການສະເຫຼີມສະຫຼອງສອງວັນປະຫວັດສາດລາວ-ຫວຽດນາມ ຄື: ວັນສ້າງຕັ້ງສາຍພົວພັນການທູດ ຄົບຮອບ 55 ປີ ແລະ ວັນເຊັນສົນທິສັນຍາ ສ້າງຕັ້ງສາຍພົວພັນຮ່ວມມື ລາວ-ຫວຽດ ຄົບຮອບ 40 ປີ.   

      ທ່ານ ຕະວັນ ລ່ອງ  ຮອງເຈົ້າແຂວງອຽນບາຍ ສສ ຫວຽດນາມ ຍັງໄດ້ກ່າວວ່າ : ສອງປະເທດລາວ - ຫວຽດນາມ ໄດ້ຊື່ວ່າ ອ້າຍ-ນ້ອງ ຮ່ວມສາຍພູໃຊ້ສາຍນ້ຳນຳກັນ ສາຍພົວພັນອ້າຍ-ນ້ອງ ລະຫວ່າງ ປະຊາຊົນສອງຊາດໄດ້ຮັບການສ້າງຕັ້ງ ແລະ ເສີມຂະຫຍາຍ ໃນປະຫວັດສາດການກໍ່ສ້າງ ແລະ ປົກປັກຮັກສາປະເທດຊາດ ມາແຕ່ດົນນານເປັນພັນໆປີ, ພິເສດແມ່ນໃນ 8 ກວ່າທົດສະຫວັດ    ທີ່ຜ່ານມາ, ສາຍພົວພັນການຮ່ວມມືອັນເປັນມູນເຊື້ອ, ສາຍພົວພັນອັນຈິງໃຈຂອງປະຊາຊົນບັນດາເຜົ່າ ສອງຊາດລາວ-ຫວຽດນາມ ໄດ້ຮັບການເຕີມເຕັມໂດຍ ປະທານ ໂຮ ຈີ ມິນ ແລະ ປະທານ ໄກສອນ ພົມວິຫານ , ໄດ້ຮັບການເສີມຂະຫຍາຍໃຫ້ກາຍເປັນຊັບສົມບັດອັນລໍ້າຄ່າ ໂດຍບັນດາການນຳພັກລັດຂອງສອງຊາດ ໃນແຕ່ລະຍຸກແຕ່ລະສະໄໝ ແລະ ໄດ້ກາຍເປັນກົດເກນພັດທະນາຂອງສອງຊາດ ສ້າງໃຫ້ເປັນປະເທດຊາດມັງຄັ່ງ, ປະຊາຊົນຢູ່ເຢັນເປັນສຸກ.

     ໃຫ້ກຽດເຊັ່ນບົດບັນທຶກການຈັດຕັ້ງຜັນຂະຫຍາຍບັນດາເນື້ອໃນຮ່ວມມື ລະຫວ່າງ ຝ່າຍລາວມີ ທ່ານນາງ ສິງຄໍາ ຄົງສະຫວັນ ຮອງເຈົ້າແຂວງໆວຽງຈັນ ແລະ ຝ່າຍຫວຽດນາມແມ່ນ  ທ່ານ ຕະວັນ ລ່ອງ  ຮອງເຈົ້າແຂວງອຽນບາຍ ໂດຍສ່ອງໜ້າໂດຍ ທ່ານ ວິດົງ ໄຊຍະສອນ ກຳມະການສູນກາງພັກ, ເລຂາພັກແຂວງ ເຈົ້າແຂວງໆວຽງຈັນ ພ້ອມດ້ວຍຄະນະທັງສອງຝ່າຍ.

      ໃນຕອນແລງຂອງວັນດັ່ງກ່າວ ຢູ່ທີ່ ໂຮງຮຽນສາມັນຊົນເຜົ່າ ເມືອງວັງວຽງ ແຂວງວຽງຈັນ ຍັງມີການ ມອບ - ຮັບຫ້ອງທົດລອງ ວິຊາຊີວະສາດຟີຊິກສາດ ແລະ ເຄມີສາດ              ເນື້ອທີ 283 ຕາແມັດ, ປະກອບມີ 2 ຫ້ອງທົດລອງ ແລະ 1 ຫ້ອງທິດສະດີ ແຕ່ລະຫ້ອງມີລະບົບໄຟຟ້າ, ນ້ຳປະປາ, ແອເຢັນ ຄົບຊຸດ ລວມມູນຄ່າ 819 ລ້ານກວ່າກີບ ໃນນັ້ນມີທຶນຊ່ວຍເຫລືອຈາກການນຳແຂວງ ອຽນບາຍ ຈຳນວນ 2 ຕື້ດົງ  ( 740 ລ້ານກີບ ) ໃນພິທີຍັງໄດ້ມີການ ຕັດແຖມຜ້າ ໂດຍ ຄະນະຜູ້ແທນ ທັງສອງຝ່າຍ ແລະ ໄດ້ທ່ຽວຊົມສະຖານທີ່ທ່ອງທ່ຽວທໍາມະຊາດ ຖໍ້າຈັງ ແລະ ຖໍ້າປູຄໍາ ທີ່ ເມືອງວັງວຽງ  ຕື່ມອີກ.

Editor: ສິງຫາ ເລືອງວັນ