ໃນລະຫວ່າງວັນທີ 8-12 ມິຖຸນາ2017ຜ່ານມານີ້, ທ່ານ ຄໍາສອນ ກອນເຍີ ກໍາມະການພັກແຂວງ ເລຂາພັກເມືອງ ເຈົ້າເມືອງ ທ່າແຕງ ແຂວງ ເຊກອງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍຄະນະ ໄດ້ເດີນທາງເຂົ້າຮ່ວມກອງປະຊຸມປະຈໍາປີ 2017 ຢູ່ເມືອງ ຝູນິງ ແຂວງ ກ໋ວາງນາມ ສາທາລະນະລັດ ສັງຄົມນິຍົມຫວຽດນາມ ເພື່ອຕີລາຄາຜົນການເຄື່ອນໄຫວ, ການຮ່ວມມືໃນການພັດທະນາເສດຖະກິດ - ສັງຄົມຂອງສອງທ້ອງຖິ່ນ. ໂດຍເປັນກຽດຕ້ອນຮັບຂອງ ທ່ານ ຫງວຽນ ແກັງ ກໍາມະການພັກແຂວງ ເລຂາພັກເມືອງ ຝູນິງ ເປັນຫົວໜ້າຄະນະ,ມີທ່ານ ຫວຽນ ພີແທັງ ຮອງເລຂາພັກເມືອງ ປະທານຄະນະກໍາມະການປະຊາຊົນ ພ້ອມຄະນະເຂົ້າຮ່ວມ.
ບົນພື້ນຖານຄວາມສາມັກຄີມິດຕະພາບ, ເສລີພາບ ແລະ ໃຫ້ກຽດເຊິ່ງກັນ ແລະ ກັນ ຄະນະຜູ້ແທນທັງສອງຝ່າຍ ໄດ້ລາຍງານສະພາບດ້ານເສດຖະກິດ - ສັງຄົມໃນໄລຍະຜ່ານມາ, ວາງທິດທາງຮ່ວມມືໃນຕໍ່ໜ້າ, ຕີລາຄາບັນດາຜົນສໍາເລັດໃນການຮ່ວມມື ລະຫວ່າງສອງເມືອງ ທ່າແຕງ ແຂວງ ເຊກອງ ສາທາລະນະລັດ ປະຊາທິປະໄຕ ປະຊາຊົນກັບເມືອງ ຝູນິງ ແຂວງ ກວ໋າງນາມ ສາທາລະນະລັດ ສັງຄົມນິຍົມຫວຽດນາມ, ຫຼັງຈາກທັງສອງຝ່າຍໄດ້ແລກປ່ຽນຄຳຄິດ-ຄຳເຫັນ ກ່ຽວກັບ ການຮ່ວມມືຂອງ ສອງພັກ-ສອງລັດ ແລະ ຍັງໄດ້ເປັນເອກະພາບເອົາບາງເນື້ອໃນການຮ່ວມມືແຕ່ປີ 2017-2019 ໂດຍຈະສືບຕໍ່ຈັດຕັ້ງປະຕິບັດສຶກສາໂຄສະນາຢ່າງເລິກເຊິ່ງໃຫ້ແກ່ພະນັກງານ, ທະຫານ, ຕໍາຫຼວດພໍ່ແມ່ປະຊາຊົນຂອງສອງເມືອງ ວ່າດ້ວຍການຮ່ວມມືມິດຕະພາບພິ ເສດຫວຽດນາມ-ລາວ, ລາວ-ຫວຽດນາມ ເຂົ້າໃນການພັດທະນາຢ່າງບໍ່ຢຸດຢັ້ງ, ເຫັນດີໃຫ້ຄະນະຜູ້ແທນອາວຸໂສ,ການນໍາຂອງສອງເມືອງ ທີ່ກໍາລັງພັກຜ່ອນບໍານານ ມາຢ້ຽມຢາມ-ຜັກຜ່ອນ ໃນເວລາທີ່ເໝາະສົມ, ເຫັນດີໃຫ້ໂຮງຮຽນອະນຸບານບ້ານຫ້ວຍຊາຍ ເມືອງ ທ່າແຕງ ແຂວງ ເຊກອງ ສປປລາວ ແຮກສ່ຽວກັບໂຮງຮຽນອະນຸບານ ຮ້ວາມິ ເມືອງ ຝູນິງ ແຂວງ ກ໋ວາງນາມ ສາທາລະນະລັດ ສັງຄົມນິຍົມຫວຽດນາມ ແລະ ເມືອງ ຝູນິງ ໄດ້ຊ່ວຍ 2 ທືນຄື: ທືນການສຶກສາຂັ້ນອະນຸບານໄລຍະສັ້ນ, ທືນການສຶກສາວຽກງານສາທາລະນະສຸກ ລະດັບຊັ້ນສູງ,ລະດັບປະລິນຍາຕີ 1-2 ຄົນ, ພ້ອມທືນຝຶກອົບຮົມໄລຍະສັ້ນ, ສ່ວນເມືອງ ທ່າແຕງ ແຂວງ ເຊກອງ ສປປລາວ ໄດ້ມອບເງິນຈໍານວນ 80 ລ້ານກີບ ເຂົ້າໃນການພັດທະນາເມືອງ ຝູນິງ, ການສ້າງເງື່ອນໄຂໃຫ້ນັກທຸລະກິດ ໄດ້ຄົ້ນຄົ້ວາແລກປ່ຽນບົດຮຽນ ເພື່ອຊອກທ່າແຮງ ໃນການພັດທະນາເສດຖະກິດ -ສັງຄົມ, ການໂຄສະນາຈໍາໜ່າຍສິນຄ້າຂອງສອງເມືອງ, ການເຄື່ອນໄຫວທີ່ລະນຶກຄົບຮອບ 55 ປີ, ວັນສ້າງຕັ້ງສາຍພົວພັນການທູດ ວັນທີ 5 ກັນຍາ 1962 ເຖິງ ວັນທີ 5 ກັນຍາ 2017,ຄົບຮອບ 40 ປີ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ- ຫວຽດນາມ, ຫວຽດນາມ-ລາວ ວັນທີ 18 ກໍລະກົດ 1997 ເຖິງ ວັນທີ 18 ກໍລະກົດ 2017 ເພື່ອໃຫ້ມີຄວາມໝາຍສໍາຄັນ, ສືບຕໍ່ສາຍພົວພັນຮ່ວມມືພິເສດລະຫວ່າງ ປະຊາຊົນສອງຊາດພວກເຮົາໃນໄລຍະໃໝ່ ແລະ ເຫັນດີເປັນເອກະພາບແຕ່ປີ 2017 ກອງປະຊຸມປະຈໍາປີລະຫວ່າງສອງເມືອງ ຈະພັດປ່ຽນກັນຈັດກອງປະຊຸມຢູ່ສອງເມືອງ ພ້ອມກໍານົດໄລຍະເວລາດໍາເນີນກອງປະຊຸມຮອບວຽນແມ່ນ 2 ປີຕໍ່ຄັ້ງ, ໃນນີ້ປີ 2019 ຈະໄດ້ຈັດຢູ່ທີ່ເມືອງ ທ່າແຕງ ແຂວງ ເຊກອງ ສປປລາວ ເປັນເຈົ້າພາບ, ພາກສ່ວນຄະນະ, ວາລະການເຄື່ອນໄຫວຕົວຈິງຂອງກອງປະຊຸມຈະລາຍງານ ໂດຍຜ່ານພະແນກການຕ່າງປະເທດທັງສອງແຂວງ, ມອບໃຫ້ຫ້ອງວ່າການທັງສອງເມືອງເປັນຜູ້ປະສານສົມທົບ ແລະ ເປັນເສຍນາທິການໂດຍກົງ ໃນການຈັດຕັ້ງປະຕິບັດ, ສອງຝ່າຍຍືນຍັນຄວາມສາມັກຄີພິເສດ-ຮ່ວມມືຢ່າງຮອບດ້ານ ລະຫວ່າງ ສອງເມືອງ ທ່າແຕງ ແລະ ເມືອງ ຝູນິງ ໃຫ້ມີການຂະຫາຍຕົວຢ່າງກວ້າງຂວາງ ແລະ ໃຫ້ເຂົ້າສູ່ລວງເລິກຢ່າງແໜ້ນແຟ້ນໃນຕໍ່ໜ້າ.
ພ້ອມນີ້ ກໍ່ໄດ້ໄປຢ້ຽມຢາມໂຮງຮຽນອະນຸບານ ຮ້ວາມິ, ຫ້ອງການສາທາລະນະສຸກ, ໂຮງໝໍເມືອງ,ໂຮງງານຕັດຫຍິບ, ທ່ຽວອະນຸສາວະລີ ແມ່ໃຫ່ຍວິລະຊົນຂອງຫວຽດນາມ, ພົບປະໂອ້ລົມພະນັກງານປະຕິວັດ, ເຂົ້າຮ່ວມເປີດງານແຂ່ງຂັນຊ່ວງເຮືອປະຈໍາປີ ແລະ ຮ່ວມເປີດງານບຸນ ມໍລະດົກຂອງແຂວງ ກ໋ວາງນາມຄັ້ງທີ 6 ປີ 2017 ຕື່ມອີກ.
Editor: ສິງຫາ ເລືອງວັນ
