ວັນທີ 15 ມິຖຸນາ 2017 ຜ່ານມາ ຄະນະໜ່ວຍພັກກຸ່ມລັດວິສາຫາກິດເມືອງຄຳ ໄດ້ເປີດກອງປະຊຸມແຍກໜ່ວຍພັກ ຂື້ນທີ່ຫ້ອງປະຊຸມທະນາຄານພັດທະນາລາວ ໜ່ວຍບໍລິການ ເມືອງຄຳ ແຂວງຊຽງຂວາງ ຢ່າງເປັນ ທາງການ.
ໂດຍພາຍໃຕ້ການເປັນປະທານຂອງ ທ່ານ ໃຈເພັດ ພີມວົງສາ ຄະນະປະຈຳ ພັກເມືອງ ຫົວໜ້າ ຫ້ອງການ-ການເງິນເມືອງຄຳ, ມີ ທ່ານ ຄຳແພງເພັດ ພີມວົງສາ ເລຂາໜ່ວຍພັກກຸ່ມລັດວິສາຫາກິດ, ຫົວໜ້າທະນາຄານພັດທະນາລາວ ໜ່ວຍບໍລິການ ເມືອງຄຳ ແລະ ທ່ານ ສົມຈິດ ສີດາລາ ກຳມະການພັກເມືອງ, ຫົວໜ້າ ຫ້ອງວ່າການປົກຄອງເມືອງ, ມີຄະນະເລຂາພັກໜ່ວຍອ້ອມຂ້າງເມືອງຕະຫຼອດຮອດ ສະມາຊິກພັກ ພາຍໃນໜ່ວຍ ພ້ອມດ້ວຍແຂກຖືກເຊີນເຂົ້າຮ່ວມທັງໝົດ 37 ທ່ານ, ຍິງ 6 ທ່ານ.
ຈາກນັ້ນ ທ່ານ ຄຳແພງເພັດ ພີມວົງສາ ເລຂາໜ່ວຍພັກກຸ່ມລັດວິສາຫາກິດ ຫົວໜ້າທະນາ ຄານພັດທະນາລາວ ໜ່ວຍບໍລິການເມືອງຄຳ ກໍ່ໄດ້ຂື້ນຜ່ານບົດສະຫຼຸບ ແລະ ທິດທາງແຜນການປີ 2020 ໃຫ້ຮູ້ວ່າ: ໜ່ວຍພັກກຸ່ມລັດວິສາຫາກິດ ໄດ້ຮັບການສ້າງຕັ້ງຂື້ນໃນວັນທີ່ 16 ພະຈິກ 2015 ໂດຍມີ 6 ຫ້ອງການ ເຊັ່ນ: ທະນາຄານພັດທະນາລາວ, ທະນາຄານການຄ້າຕ່າງປະເທດລາວມະຫາຊົນ, ທະນາຄານ ສົ່ງເສີມກະສິກຳ, ລັດວິສາຫາກິດໄຟຟ້າ, ລັດວິສາຫາກິດປະສົມລາວໂທລະຄົມ ແລະ ລັດວິສາຫາກິດໄປສະນີ ເຊິ່ງປະກອບມີສະມາຊິກພັກທັງໝົດ 16 ທ່ານ ແລະ ມີສະມາຊິກພັກສົມບູນ 11 ທ່ານ, ມີສະມາຊິກສຳຮອງ 5 ທ່ານ, ມີພະນັກງານທັງໝົດ 30 ທ່ານ, ຍິງ 7 ທ່ານ, ຜ່ານການຈັດຕັ້ງປະຕິບັດໜ້າທີ່ວຽກງານ ໃນໄລຍະຜ່ານມາ ໄດ້ຖືເອົາການເມືອງແນວຄິດເປັນບັນຫາສຳຄັນ ຕໍ່ກັບໜ້າທີ່ວຽກງານໃຫ້ແກ່ສະມາຊິກພັກ ພາຍໃນໜ່ວຍ, ພ້ອມທັງສ້າງທັດສະນະແນວຄິດຕາມອຸດົມການຂອງພັກ ປະຊາຊົນ ປະຕິ ວັດລາວ ພ້ອມນີ້ຍັງນຳເອົາແນວທາງນະໂຍບາຍຂອງພັກ, ກົດໝາຍຂອງລັດ, ມະຕິຄຳສັ່ງຕ່າງໆເຜີຍແຜ່ເຊື່ອມຊືມໃຫ້ແກ່ພະນັກງານ-ສະມາຊິກພັກ ມີຄວາມອຸ່ນອຽງ ທຸ່ນທ່ຽງ, ກຳແໜ້ນຫຼັກການ-ການເມືອງທີ່ສຳຄັນຂອງພັກ, ຂອງຊາດ ແລະ ເປັນການ ເຕົ້າໂຮມຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ ພ້ອມທັງ ຮັບຮູ້ເຖິງການປ່ຽນແປງ ໃໝ່ຂອງພັກ ແລະ ວຽກງານວິຊາສະເພາະເປັນຕົ້ນແມ່ນວຽກງານທະນາຄານ, ວຽກງານໄຟຟ້າ, ວຽກງານໂທລະຄົມມະນາຄົມ, ວຽກງານໄປສະນີ ແລະ ວຽກງານອື່ນໆ ເພື່ອໃຫ້ມີບາດກ້າວຂະຫຍາຍຕົວຂື້ນເລື່ອຍໆ.
ນອກຈາກນີ້ ຍັງຈະໄດ້ແກ້ໄຂຂໍ້ຄົງຄ້າງເຊັ່ນ: ການເຊື່ອມຊືມແນວຄິດການເມືອງ ໃຫ້ແກ່ສະມາຊິກພັກ ໃຫ້ຮັບຮູ້ ແລະ ເຂົ້າໃຈ ເລິກເຊິ່ງຂື້ນກ່ວາເກົ່າ ຕິດຕາມກວດກາ ປະເມີນຜົນວຽກງານຕ່າງໆ ເພື່ອໃຫ້ບັນລຸຕາມຄາດໝາຍທີ່ໄດ້ວາງໄວ້ ໃຫ້ໄດ້ຮັບຜົນ ດີພ້ອມກັນນັ້ນກໍ່ຍັງໄດ້ຜ່ານທິດທາງແຜນການ ໃນປີ 2020 ຕື່ມອີກ.
ຈາກນັ້ນ ທ່ານ ອານຸພອນ ດີວົງທອງ ຜູ້ຮັກສາການຄະນະຈັກຕັ້ງເມືອງ ກໍ່ໄດ້ຂື້ນຜ່ານມະຕິຕົກ ລົງຄະນະປະຈຳພັກເມືອງເລກທີ່ 97/ຄປພມ ລົງວັນທີ່ 13 ມິຖຸນາ 2017 ວ່າດ້ວຍການແບ່ງໜ່ວຍພັກ ອອກເປັນ 2 ໜ່ວຍພັກ ຄື: ໜ່ວຍພັກກຸ່ມ ລັດວິສາຫາກິດ ແລະ ໜ່ວຍພັກທະນາຄານສົ່ງເສີມກະສິກຳ ໜ່ວຍບໍລິການເມືອງຄຳ ຈາກນັ້ນ, ກໍ່ໄດ້ມອບມະຕິຕົກລົງຂອງຄະນະປະຈຳພັກເມືອງ ແລະ ມະຕິຕົກລົງຕ່າງໆຂອງ ອົງການທີ່ກ່ຽວຂ້ອງຂັ້ນເມືອງໃຫ້ຄະນະໜ່ວຍພັກໃໝ່ໂດຍເປັນກຽດຂື້ນມອບຂອງ ທ່ານ ໃຈເພັດ ພີມວົງສາ ຄະນະປະຈຳພັກເມືອງຫົວໜ້າຫ້ອງການ-ການເງິນເມືອງ ກ່າວຮັບໂດຍ ທ່ານ ໄທຫາ ຫວັງເນັ່ງ ຕາງໜ້າໜ່ວຍພັກທະນາຄານສົ່ງເສີມກະສິກຳ.
ຕອນທ້າຍ ທ່ານ ໃຈເພັດ ພີມວົງສາ ຄະນະປະຈຳພັກເມືອງຫົວໜ້າ ຫ້ອງການ-ການເງິນ ກໍ່ໄດ້ໃຫ້ກຽດຂື້ນໂອ້ລົມໃຫ້ຄຳຄິດຄຳເຫັນກ່ອນອື່ນໝົດສະຫາຍໄດ້ກ່າວຍ້ອງຍໍ ຊົມເຊີຍຕໍ່ຜົນງານໃນໄລຍະຜ່ານມາທີ່ໄດ້ຈັດຕັ້ງປະຕິບັດພ້ອມທັງຍົກໃຫ້ເຫັນເຖິງການປ່ຽນ ແປງໃໝ່ຂອງພັກ ແລະ ໃຫ້ທິດຊີ້ນຳແກ່ຄະນະ ໜ່ວຍພັກເກົ່າ ແລະ ໃໝ່ຈົ່ງພ້ອມກັນ ນຳເອົາການເມືອງແນວຄິດເຂົ້າໃນການຈັດຕັ້ງປະຕິບັດໜ້າທີ່ວຽກງານ ຂອງຕົນເອງ ແລະ ເຕົ້າໂຮມຄວາມສາມັກຄີໃຫ້ໜັກແໜ້ນ ແລະ ເປັນປຶກແຜ່ນຕໍ່ວຽກງານສານສົມ ທົບພ້ອມທັງຍົກສູງວິຊາສະເພາະໃຫ້ດີຂື້ນເທື່ອລະກ້າວໆ.
Editor: ກຳປານາດ ລັດຖະເຮົ້າ
