ທ່ານ ປະລິນຍາເອກ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ໄດ້ຊີ້ນຳວຽກງານແນວລາວສ້າງຊາດຢູ່ແຂວງບໍລິຄຳໄຊ,ເຂົ້າຮ່ວມຮັບຟັງ ມີບັນດາທ່ານການນຳຂັ້ນແຂວງ, ກຳມະການແນວລາວສ້າງຊາດແຂວງ,ເມືອງ, ຜູ້ຊົງຄຸນວຸດທິ ຕະຫຼອດຮອດຄະນະກຳມະການແນວລາວສ້າງຊາດແຂວງບໍລິຄຳໄຊເຂົ້າຮ່ວມ.
ທ່ານ ໄດ້ຍົກໃຫ້ເຫັນສະພາບຂໍ້ຂັດແຍ່ງ ລະຫວ່າງ ພາກພື້ນ ແລະ ສາກົນ, ທີ່ຍັງສືບຕໍ່ຜັນແປຢ່າງສະລັບຊັບຊ້ອນຢູ່ຫຼາຍບໍລິເວນຂອງໂລກ ພົ້ນເດັ່ນແມ່ນ ບັນຫາສົງຄາມຢູ່ຊີລີ່,ອີຣັກ, ອັບການິດສະຖານ ແລະ ບັນຫາຄວາມເຄັ່ງຕຶງຢູ່ແຫຼມເກົາຫຼີ,ບັນຫາກໍ່ການຮ້າຍທີ່ເປັນວົງກວ້າງ ອັນໄດ້ສົ່ງຜົນກະທົບຕໍ່ການດຳລົງຊີວິດ-ຊັບສິນຂອງປະຊາຊົນໂດຍກົງ. ພ້ອມຍົກໃຫ້ເຫັນປະຫວັດມູນເຊື້ອ, ພາລະບົດບາດ, ສິດ ແລະ ໜ້າທີ່ ຂອງແນວລາວສ້າງຊາດແຕ່ ລະຂັ້ນ. ແນວລາວສ້າງຊາດໄດ້ສືບທອດ ແລະ ຂະຫຍາຍມູນເຊື້ອອັນສະຫງ່າລາສີຂອງແນວລາວອິດສະຫຼະ, ແນວລາວຮັກຊາດ ຊຶ່ງໄດ້ເຕົ້າໂຮມຄວາມສາມັກຄີປະຊາຊົນບັນດາເຜົ່າ, ຊັ້ນຄົນ, ສາສະໜາ ເຂົ້າໃຈໃນການຕໍ່ສູ້ກູ້ຊາດໃນເມື່ອກ່ອນ ແລະ ປະຕິບັດສອງໜ້າທີ່ຍຸດ ທະສາດ ປົກປັກຮັກສາ ແລະ ສ້າງສາພັດທະນາປະເທດຊາດ.
ໃນນັ້ນ 5 ພາລະບົດບາດ ແລະ 10 ສິດ ,ໜ້າທີ່ຂອງແນວລາວສ້າງຊາດ ແຕ່ລະຂັ້ນ ໄດ້ກຳນົດແຈ້ງໃນການຈັດຕັ້ງປະຕິບັດຜັນຂະຫຍາຍເນື້ອໃນແນວທາງນະໂຍບາຍຂອງພັກ-ລັດວາງອອກ. ທ່ານ ປະທານສູນກາງແນວລາວສ້າງຊາດ ຍັງໄດ້ເນັ້ນໃຫ້ອົງຄະນະພັກປົກຄອງແຂວງແຕ່ລະຂັ້ນ ຈົ່ງໄດ້ຖືສຳຄັນ ແລະ ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ ຖັນແຖວພະນັກງານຫຼັກແຫຼ່ງ, ສະມາຊິກພັກໃຫ້ກຳແໜ້ນ ແລະ ເຊື່ອມຊຶມແນວທາງຂອງພັກຢ່າງເລິກເຊິ່ງ. ຕ້ານ, ສະກັດກັ້ນ ທຸກປະກົດການຫຍໍ້ທໍ້ໃນສັງຄົມໃຫ້ໄດ້ຢ່າງຂາດຕົວ,ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ, ມີສະຕິລະວັງຕົວຕໍ່ການເຄື່ອນໄຫວຂອງກູ່ມຄົນທີ່ບໍ່ຫວັງດີຈະສວຍໃຊ້ວຽກງານຊົນເຜົ່າ, ສາສະໝາເພື່ອເຄື່ອນໄຫວແຍກຄວາມສາມັກຄີພາຍໃນ, ເອົາໃຈໃສ່ ແລະ ຖືສໍາຄັນການສຶກສາອົບຮົມ, ເຕົ້າໂຮມຄວາມສາມັກຄີບັນດາສາສະນິກາຊົນຂອງສາສະໜາຕ່າງໆ ເຂົ້າຮ່ວມການປະຕິບັດແນວທາງນະໂຍບາຍ ຂອງພັກ, ປະຕິບັດຫຼັກທຳຄຳສອນທີ່ກ້າວໜ້າ, ທີ່ບໍ່ຝືນວິທະຍາສາດ, ເພີ່ມທະວີ ແລະ ເຊີດຊູຄວາມອາດສາມາດຂອງການຈັດຕັ້ງແນວໂຮມ ໃນການເຕົ້າໂຮມຄວາມສາມັກຄີ ແລະ ສິດເປັນເຈົ້າຂອງປະຊາຊົນບັນດາເຜົ່າ ແລະ ບັນດາຊັ້ນຄົນ ໃນເງື່ອນໄຂໃໝ່ແຫ່ງການເຊື່ອມໂຍງສາກົນ ແລະ ພາກພື້ນ ເພື່ອຮັບປະກັນສະຖຽນລະພາບທາງດ້ານການເມືອງ, ຄວາມປອດໄພໃຫ້ໜັກແໜ້ນ ແລະ ເພີ່ມທະວີຄວາມເຊື່ອໝັ້ນຂອງມະຫາຊົນຕໍ່ການນຳພາຂອງພັກ ແລະ ຕໍ່ອົງການປົກຄອງທ້ອງຖິ່ນເຂົ້າໃນທຸກຂະບວນການວຽກງານພັດທະນາທ້ອງຖິ່ນຢ່າງດຸໝັ່ນ,ຫ້າວຫັນ ແລະ ມີຜົນສຳເລັດຢ່າງຈົບງາມ. ໂອກາດທີ່ທ່ານໄດ້ລົງມາເຄື່ອນໄຫວຊີ້ນຳວຽກງານຢູ່ແຂວງບໍລິຄຳໄຊ ໃນຄັ້ງນີ້ຍັງໄດ້ນຳເອົາເຄື່ອງອຸປະໂພກ-ບໍລິໂພກ ຈຳນວນໜື່ງມາມອບໃຫ້ແນວລາວສ້າງຊາດແຂວງບໍລິຄຳໄຊ ເປັນຕົ້ນແມ່ນໝີ່ກິນໄວ, ປາກະປອງ ແລະ ຄອມພິວເຕີຕັ້ງໂຕະຈຳນວນ 07 ຊຸດ, ກ່າວຮັບໂດຍ ທ່ານ ບຸນມາ ບຸຈະເລີນ ຮອງເລຂາພັກແຂວງ ຮອງເຈົ້າແຂວງບໍລິຄຳໄຊ. ຈຸດປະສົງກໍ່ເພື່ອນຳໃຊ້ເຄື່ອງເອເລັກໂຕນິກເຂົ້າໃນວຽກງານແນວລາວສ້າງຊາດຂັ້ນແຂວງ, ຂັ້ນເມືອງ ໃຫ້ມີຄວາມສະດວກວ່ອງໄວຂື້ນກວ່າເກົ່າ.
Editor: ກຳປານາດ ລັດຖະເຮົ້າ
