ເມື່ອບໍ່ດົນມານີ້, ທີ່ໂຮງແຮມ ຄຣາວພາຊາ, ນະຄອນຫລວງວຽງຈັນ, ສປປ ລາວ ສະຖານທູດອັງກິດ ແລະ ກະຊວງການຕ່າງປະເທດ ໄດ້ຈັດງານລ້ຽງສະເຫລີມສະຫລອງ ວັນຄ້າຍວັນປະສູດ ຂອງພະຣາຊະນີ ເອລິຊາເບັດ ທີ 2 ແຫ່ງປະເທດອັງກິດ ຄົບຮອບ 91 ປີ. ງານລ້ຽງຄັ້ງນີ້ ໂດຍການເຂົ້າຮ່ວມ ມີ ທ່ານນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ, ທ່ານ ແສງເພັດ ຮຸ່ງບຸນກວ້າງ ຮອງລັດຖະມົນຕີ ກະຊວງການຕ່າງປະເທດ. ພ້ອມນີ້ຍັງມີ ທ່ານລັດຖະມົນຕີ, ຮອງລັດຖະມົນຕີ, ບັນດາຜູ້ຕາງຫນ້າຈາກກະຊວງ, ຈາກສະພາແຫ່ງຊາດ, ທ່ານທູດ, ທຸຕານຸທູດ, ສະມາຊິກຊຸມຊົນຄົນອັງກິດ, ບັນດານັກສຶກສາທີ່ຈົບຈາກປະເທດອັງກິດ ເຂົ້າຮ່ວມ ຢ່າງພ້ອມພຽງ.
ອັງກິດ ຍັງຄົງເປັນປະເທດທີ່ສາກົນໃຫ້ຄວາມສົນໃຈ ແລະ ມີການພົວພັນກັບສາກົນຢ່າງຕໍ່ເນື່ອງ ນອກນັ້ນ ການພົວພັນ ຂອງອັງກິດ ເລີ່ມເຂົ້າມາມີສ່ວນຮ່ວມໃນຂົງເຂດອາຊຽນ ເຊິ່ງເປັນຂົງເຂດທີ່ພວມກຳລັງເຕີບໃຫຍ່ຢ່າງໄວວາ. ການເປີດໂຕຄືນໃຫມ່ຂອງສະຖານທູດອັງກິດ ໃນ ສປປ ລາວ ເມື່ອປີ 2012 ແມ່ນເປັນສວນຫນຶ່ງທີ່ສຳຄັນຂອງການຫັນປ່ຽນຈຸດສຸມ ນັບແຕ່ນັ້ນມາ ການຮ່ວມມືແບບສ້າງສັນ ລະຫວ່າງ ສປປ ລາວ ແລະ ອັງກິດ ໄດ້ເລີ່ມຂື້ນ ແລະ ເພີ່ມທະວີຢ່າງຕໍ່ເນື່ອງ
ໃນໄລຍະຜ່ານມາ ທ່ານ ເດວິດພັດນຳ ຜູ້ແທນການຄ້າ ອັງກິດ ໄດ້ຢ້ຽມຢາມນະຄອນຫລວງວຽງຈັນ ໃນຫລາຍຄັ້ງ, ແລະ ເມື່ອຕົ້ນປີ 2017 ເດືອນມັງກອນ ຜ່ານມາ ທ່ານລັດຖະມົນຕີ ກະຊວງສຶກສາທີການ ແລະ ກິລາ ຂອງ ສປປ ລາວ ຍັງໄດ້ເດີນທາງເຂົ້າຮ່ວມກອງປະຊຸມການສຶກສາໂລກ ທີ່ນະຄອນລອນດອນ ແລະ ໃນເດືອນເມສາ ທ່ານ ເຈົ້າຄອງນະຄອນຫລວງວຽງຈັນ ຍັງໄດ້ເດີນທາງຢ້ຽມຢາມ ປະເທດອັງກິດ ເປັນຄັ້ງທຳອິດ.
ນອກຈາກນັ້ນ ຍັງມີຫລາຍຂະແຫນງ ທີ່ທັງສອງປະເທດ ໄດ້ໃຫ້ການຮ່ວມມື ໂດຍສະເພາະ ດ້ານການສຶກສາ, ການຮ່ວມມືດ້ານສະຖາບັນການສຶກສາ ແລະ ວຽກງານອື່ນໆ.
Editor: ກຳປານາດ ລັດຖະເຮົ້າ
