ໃນວັນທີ 16 ມິຖຸນາ ທີ່ຜ່ານມາ ກົມໃຫຍ່ເສນາທິການກອງທັບ ໄດ້ສະຫຼຸບຖອດຖອນບົດຮຽນກໍ່ສ້າງກອງຮາກຖານເຂັ້ມແຂງຮູ້ນຳພາຮອບດ້ານ ທົ່ວອົງການກົມໃຫຍ່ເສນາທິການກອງທັບ ສົກປີ 2016-2017 ໂດຍການເປັນປະທານຂອງທ່ານ ພົນຕີ ສຸວອນ ເລືອງບຸນມີ, ກໍາມະການສູນກາງພັກ ຮອງລັດຖະມົນຕີກະຊວງປ້ອງກັນປະເທດ ຫົວໜ້າກົມໃຫຍ່ເສນາທິການກອງທັບ, ມີຄະນະພັກຄະນະບັນຊາ, ພະນັກງານຫຼັກແຫຼງ ແລະ ສະມາຊິກພັກທົ່ວອົງການກົມໃຫຍ່ເສນາທິການກອງທັບເຂົ້າຮ່ວມ. ທ່ານ ພັນເອກ ກອງແກ້ວ ວໍລະຈິດ ຫົວໜ້າຫ້ອງການເມືອງກົມໃຫຍເສນາທິການກອງທັບ ໄດ້ຂຶ້ນຜ່ານບົດສະຫຼຸບຫວນຄືນການຊີ້ນຳ-ນຳພາຂອງຄະນະພັກ ຕໍ່ຂະບວນການກໍ່ສ້າງກອງຮາກຖານເຂັ້ມແຂງຮູ້ນຳພາຮອບດ້ານ ໃນໄລຍະຜ່ານມາ ເຊິ່ງຄະນະພັກໄດ້ຖືເອົາວຽກງານການສຶກສາອົບຮົມການເມືອງແນວຄິດເປັນວຽກງານສຳຄັນສອດຫ້ອຍໃນທຸກຂົງເຂດວຽກງານຢ່າງຕໍ່ເນື່ອງ ແລະ ສອດຄ່ອງກັບສະພາບຄວາມເປັນຈິງ ຕາມທິດທາງການປ່ຽນແປງໃໝ່ຂອງພັກຢ່າງເລິກເຊິ່ງ ເອົາໃຈໃສ່ປັບປຸງກໍ່ສ້າງພັກ, ພະນັກງານ ແລະ ກໍ່ສ້າງກອງຮາກຖານເຂັ້ມແຂງຮູ້ນຳພາຮອບດ້ານ ບົນພື້ນ ຖານການປະຕິບັດທິດນຳ 5 ຫຼັກການ ຂອງພັກຢ່າງເຂັ້ມງວດ ແລະ ເອົາໃຈໃສ່ຊີ້ນຳ ຢ່າງໃກ້ຊິດຕິດແທດໃນຂົງເຂດວຽກງານຂອງແຕ່ລະກົມກອງ ເພື່ອປັບປຸງຕົນເອງໃນ 4 ດ້ານ ພ້ອມທັງຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານຂອງຄະນະພັກກະຊວງປ້ອງກັນປະເທດ ວາງອອກ ໃຫ້ເປັນມາດຖານໄມ້ຫຼາວັດແທກ ຄຸນນະພາບທາງດ້ານການຊີ້ນຳແບບ ແຜນການນຳພາຂອງຄະນະພັກ ແລະ ຕິດພັນກັບການກໍ່ສ້າງກອງສາມປອດ, ກອງວັດທະນະທຳ ແລະ ນັກຮົບວັດທະນະທຳເທື່ອລະກ້າວ ຜ່ານການສັງເກດຕີລາຄາດ້ານຄຸນນະພາບ ຜົນໄດ້ຮັບຖ້າທຽບໃສ່ໄລຍຜ່ານມາ ການປັບປຸງກໍ່ສ້າງກອງຮາກຖານເຂັ້ມແຂງຮູ້ນຳພາຮອບດ້ານ ທົ່ວກົມໃຫຍ່ເສນາທິການກອງທັບ ມີ 122 ກົມກອງຮາກຖານພັກ ທົ່ວກົມໃຫຍ່ເສນາທິການກອງທັບ, ມີສະມາຊິພັກເຂັ້ມແຂງຮູ້ນຳພາຮອບດ້ານ 2332 ທ່ານ, ແຂງ 505 ທ່ານ, ກາງ 40 ທ່ານ. ກອງປະຊຸມທ່ານ ພັນໂທ ຄໍາພັນ ເຊໃຫຍ່ທຸມມະແສງ ຮອງຫົວໜ້າຫ້ອງການເມືອງກົມໃຫຍ່ເສນາທິການກອງທັບ ໄດ້ຜ່ານຂໍ້ແຂ່ງຂັນ ແລະ ຜ່ານມະຕິຕົກລົງຂອງຄະນະພັກກະຊວງປ້ອງກັນປະເທດ ວ່າດ້ວຍການຮັບຮອງເອົາກອງຮາກຖານເຂັ້ມແຂງຮູ້ນຳພາຮອບດ້ານ ຂຶ້ນກັບຄະນະພັກກົມໃຫຍ່ເສນາທິການກອງທັບ ສົກປີ 2016-2017 ຈຳນວນ 121 ກົມກອງໜ່ວຍພັກ, ມະຕິຕົກລົງຂອງຄະນະພັກກະຊວງປ້ອງກັນປະເທດ ວ່າດ້ວຍການມອບທຸງໄຊໃຫ້ບັນດາກົມກອງແຂງຮູ້ນຳພາຮອບດ້ານ 10 ຄັ້ງຕິດຕໍ່ກັນ ແລະ 5 ຄັ້ງຕິດຕໍ່ກັນ ສົກປີ 2016-2017 ຈໍານວນ 21 ກົມກອງໜ່ວຍພັກ, ຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການຍ້ອງຍໍສັນລະເສີນຜົນງານໃຫ້ບັນດາກົມກອງຮາກຖານເຂັ້ມແຂງຮູ້ນຳພາຮອບດ້ານ ສົກປີ 2016-2017 ຈໍານວນ 9 ກົມກອງໜ່ວຍພັກ ຍ້ອງຍໍສັນລະເສີນຜົນງານໃຫ້ບັນດາກົມກອງຮາກຖານເຂັ້ມແຂງຮູ້ນຳພາຮອບດ້ານ ຂັ້ນກົມໃຫຍ່ການເມືອງກອງທັບ ສົກປີ 2016-2017 ຈໍານວນ 38 ກົມກອງໜ່ວຍພັກ ໂດຍໃຫ້ກຽດຂຶ້ນມອບນາມມະຍຸດ ເຂັ້ມແຂງຮູ້ນໍາພາຮອບດ້ານ ທຸງໄຊກອງແຂງ ແລະ ຍ້ອງຍໍຕ່າງຕ່າງໆ ໂດຍທ່ານ ພົນຕີ ສຸວອນ ເລືອງບຸນມີ ກຳມະການສູນກາງພັກ ຮອງລັດຖະມົນຕີກະຊວງປ້ອງກັນປະເທດ ຫົວໜ້າກົມໃຫຍ່ເສນາທິການກອງທັບ. ຂອບໃຈຂໍ້ມູນຈາກ: ລາຍການໂທລະພາບ ກອງທັບ
Editor: ດາວໄຊ ສີວິໄລ
