ວັນທີ 19 ມິຖຸນາ 2017 ນີ້, ຢູ່ນະຄອນຫຼວງວຽງຈັນ ໄດ້ມີພິທີ ອັນເຊີນຮູບຫຼໍ່ໝົດຕົວຂອງ ທ່ານ ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປະຊາຊົນລາວ, ຂຶ້ນລົດຂະບວນແຫ່ ເພື່ອໄປສະຖິດໄວ້ທີ່ເດີ່ນ ໂຮງຮຽນທະຫານຮາບທີ II ວຽງໄຊ ເມືອງ ບາຈຽງ ແຂວງຈຳປາສັກ ເພື່ອໃຫ້ພະນັກງານນັກຮົບ ແລະ ປະຊາຊົນລາວບັນດາເຜົ່າໄດ້ຊາກະລະບູຊາ ແລະ ສຶກສາຮໍ່າຮຽນເອົາມູນເຊື້ອອັນດີງາມຂອງເພີ່ນ.
ໃນພິທີ ໂດຍເປັນກຽດເຂົ້າຮ່ວມຂອງ ສະຫາຍ ພົນຈັດຕະວາ ວັນທອງ ກອງມະນີ ຄະນະພັກກະຊວງ ຮອງຫົວໜ້າກົມໃຫຍ່ການເມືອງກອງທັບ ມີທ່ານປ້າ ທອງວິນ ພົມວິຫານ ພັນລະຍາຂອງອະດີດ ປະທານ ໄກສອນ ພົມວິຫານ ແລະ ຜູ້ຕາງໜ້າຈາກບັນດາກົມໃຫຍ່ຫ້ອງວ່າການ, ພາກສ່ວນບໍລິສັດ ແລະ ເຈົ້າຂອງໂຄງການກໍ່ສ້າງມີ ກົມວິທະຍາສາດ-ປະຫວັດສາດການທະຫານ, ໂຮງຮຽນທະຫານຮາບເລກ II ວຽງໄຊ ເຂົ້າຮ່ວມ.
ພິທີທາງການຈັດຕັ້ງບໍລິສັດ ຜະລິດຕະພັນວັດທະນະທໍາ ຈໍາກັດ ໄດ້ລາຍງານໃຫ້ຮູ້ວ່າ: ບໍລິສັດເປັນຜູ້ຜະລິດໂດຍໄດ້ລົງມືສ້າງແຕ່ເດືອນມີນາ 2016 ເປັນຕົ້ນມາ ຮອດປະຈຸບັນສຳເລັດຮ້ອຍສ່ວນຮ້ອຍ ໂດຍມີຮູບຮ່າງລັກສະນະ ປະທານ ໄກສອນ ໃນໄວ 48 ປີ ທ່າທາງຍິ້ມແຍ້ມແຈ່ມໃສ ນຸ່ງເຄື່ອງແບບນາຍທະຫານ ມືຂວາຍົກຂຶ້ນ ມື້ຊ້າຍຈັບປື້ມ ພ້ອມໃສ່ເກີບໃສ່ໝວກ ມີຂະໜາດລວງສູງ 4,20 m, ລຳໂຕໃຫຍ່ 62 cm, ນ້ຳໜັກ 5,7 ໂຕນ, ຜະລິດດ້ວຍທອງສຳລິດ, ໃນມູນຄ່າ 2,839,000,000 ກີບ.
ສະຫາຍ ພັນເອກ ອິນຫວນ ວໍລະສານ ຫົວໜ້າອໍານວຍການໂຮງຮຽນທະຫານຮາບເລກ II ວຽງໄຊ ໃຫ້ຄຳເຫັນວ່າໂຮງຮຽນກໍ່ສ້າງເລກ II ວຽງໄຊ ເປັນໂຮງຮຽນວັດທະນະທຳຂອງກອງທັບ, ວຽງໄຊ ໃນເມື່ອກ່ອນທີ່ ປະທານໄກສອນ ພົມວິຫານ ເປັນຜູ້ປະກາດສ້າງຕັ້ງຂຶ້ນໃນວັນທີ 22 ມິຖຸນາ 1962 ທີ່ບ້ານຊວນແທ້ງ ເມືອງ ກຸຍເຮີບ ແຂວງ ເງະອານ ສສ ຫວຽດນາມ ຈາກຜົນງານດັ່ງກ່າວຈິ່ງມີຄວາມຈຳເປັນໄດ້ສ້າງຮູບຫຼໍ່ຂອງເພິ່ນ ເພື່ອໄປສະຖິດໄວ້ທີ່ໂຮງຮຽນວຽງໄຊ ເພື່ອໃຫ້ພະນັກງານນັກຮົບ ແລະ ປະຊາຊົນລາວບັນດາເຜົ່າໃນແຂວງພາກໃຕ້ ໂດຍສະເພາະໂຮງຮຽນວຽງໄຊ ຈະສືບຕໍ່ພາລະກິດປະຕິວັດ ແລະ ຮໍ່າຮຽນເອົາຄຸນສົມບັດສິນທຳປະຕິວັດຂອງ ທ່ານ ປະທານ ໄກສອນ ພົມວິຫານ ໃຫ້ຍືນຍົງຄົງຕົວ ແລະ ຈະປົກປັກຮັກສາໃຫ້ສະອາດຈົບງານຕະຫຼອດໄປ.
ຂອບໃຈຂໍ້ມູນຈາກ ຫນັງສືພິມກອງທັບ
Editor: ຕະວັນ ແສງສະຫວັນ
