ໃນວັນທີ 21 ມີຖຸນາ 2017 ນີ້, ທີ່ສຳນັກງານນາຍົກລັດຖະມົນຕີ ແຫ່ງ ສປປ ລາວ ໄດ້ມີພິທີພົບປະ ລະຫວ່າງ ບັນດາອາສາສະຫມັກຍີ່ປຸ່ນ ປະຈຳສປປ ລາວ ກັບ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ເຊີ່ງການເຂົ້າພົບປະ ຂອງບັນດາອາສາສະຫມັກຍີ່ປຸ່ນ ຄັ້ງນີ້ ນຳໂດຍ ທ່ານ ຕະເກຊິ ຮິກິຮາຣະ ເອກອັກຄະຣາຊະທູດ ແຫ່ງປະເທດຍີ່ປຸ່ນ ປະຈຳ ສປປ ລາວ, ແລະ ທ່ານ ໂຢຊີຮາຣຸ ໂຢເນຢະມະ ຫົວຫນ້າອົງການໄຈກ່າ ພ້ອມດ້ວຍຄະນະ.
ການພົບປະຄັ້ງນີ້ ທ່ານນາຍົກລັດຖະມົນຕີ ໄດ້ຍ້ອງຍໍຊົມເຊີຍອາສາສະຫມັກຍີ່ປຸ່ນ ທີ່ໄດ້ອຸທິດເຫື່ອແຮງ ແລະ ສະຕິປັນຍາປະກອບສ່ວນເຂົ້າໃນວຽກງານສ້າງສາ ພັດທະນາບຸກຄະລາກອນ ແລະ ຊຸມຊົນໃນທ້ອງຖິ່ນຕ່າງໆໃນ ສປປ ລາວ, ວຽກດັ່ງກ່າວ ຍັງໄດ້ເຮັດໃຫ້ໄດ້ມີການພົບປະ ຢ່າງໃກ້ຊິດຕິດແທດກັບພະນັກງານໃນທ້ອງຖິ່ນຕ່າງໆ ແລະ ຍັງມີບົດບາດສຳຄັນໃນການພັດທະນາເສດຖະກິດ-ສັງຄົມ ໃນ ສ ປປ ລາວ ອີກດ້ວຍ.
ນັບແຕ່ປີ 1965 ມາຮອດປະຈຸບັນ ມີອາສາສະຫມັກຍີ່ປຸ່ນ ທັງໝົດ 953 ທ່ານ ທີ່ໄດ້ມາປະຈຳ ທີ່ ສປປ ລາວ ເຊີ່ງເຮັດວຽກໃນຫລາຍຂະແຫນງ ເຊັ່ນ: ດ້ານສາທາລະນະສຸກ, ດ້ານວຽກງານການສຶກສາ, ກິລາ, ກະສິກຳ, ວັດທະນະທຳ, ສະພາບແວດລ້ອມ, ວິສາວະກຳ ແລະ ການພັດທະນາຊຸມຊົນ. ແລະ ໃນປະຈຸບັນ ມີອາສາສະຫມັກຍີ່ປຸ່ນ 60 ທ່ານ ທີ່ພວມເຮັດວຽກໃນ 13 ແຂວງ ໃນ ສປປ ລາວ ເຊັ່ນ: ນະຄອນຫລວງວຽງຈັນ, ແຂວງວຽງຈັນ, ຫລວງພະບາງ, ອຸດົມໄຊ, ຊຽງຂວາງ, ໄຊຍະບູລີ, ບໍລິຄຳໄຊ, ຄຳມ່ວນ, ສະຫວັນນະເຂດ, ຈຳປາສັກ, ສາລະວັນ, ເຊກອງ ແລະ ອັດຕະປື, ນອກຈາກນີ້ ໃນປີ 2017 ບັນດາອາສາສະຫມັກ ຍີ່ປຸ່ນ ຫລາຍກວ່າ 48 ພັນກວ່າຄົນ ໄດ້ຖືກສົ່ງໄປ 88 ປະເທດໃນທົ່ວໂລກ ໃນນັ້ນ ມີໃນນາມໂຄງການອາສາສະຫມັກຫນູ່ມ ຈີໂອຊີວີ ແລະ ອາສາສະຫມັກອາວຸໂສ ເອັສວີ.
Editor: ກຳປານາດ ລັດຖະເຮົ້າ
