ໃນເມື່ບໍ່ດົນນີ້, ຢູ່ຫ້ອງຮັບແຂກກະຊວງປ້ອງກັນປະເທດ ທ່ານ ພົນໂທ ຈັນສະໝອນ ຈັນຍາລາດ ລັດຖະມົນຕີກະ ຊວງປ້ອງກັນປະເທດແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ບັດກາລະການ ລໍດອຍດຳບັງ ເອກອັກຄະລັດຖະທູດ ແຫ່ງ ມົງໂກລີ ປະຈໍາ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍຄະນະ ເພື່ອປຶກສາຫາລືການຮ່ວມມື ສອງຝ່າຍ.
ທ່ານລັດຖະມົນຕີກະຊວງປ້ອງກັນປະເທດແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ສະໜິດສະໜົມຕໍ່ທ່ານ ບັດກາລະການ ລໍດອຍດຳບັງ ທີ່ໄດ້ເຂົ້າພົບປະເພື່ອປຶກສາຫາລືການຮ່ວມມືຂອງ ສອງຝ່າຍໃນຂົງເຂດວຽກງານການພັດທະນາເສດຖະກິດ ໃນຄັ້ງນີ້ ພ້ອມນັ້ນກໍໄດ້ພົບທວນຄືນ ແລະ ຕີລາຄາຕໍ່ໝາກຜົນການຮ່ວມມືລະຫວ່າງສອງປະເທດ, ຕະຫຼອດໄລຍະຜ່ານມາ ເຊິ່ງສອງປະເທດມີການພັວພັນ ທີ່ມີມູນເຊື້ອອັນດີງາມມາແຕ່ ດົນນານ, ມີຄວາມເຂົ້າອົກເຂົ້າໃຈກັນ ໂດຍຜ່ານການແລກປ່ຽນຄະນະຜູ້ແທນຂະແໜງ ການ ຕ່າງໆລະຫວ່າງສອງປະເທດ ແລະ ໃຫ້ການສະໜັບສະໜູນເຊິ່ງກັນ ແລະ ກັນໃນຂອບສອງຝ່າຍ ແລະ ຫຼາຍຝ່າຍໃນເວທີພາກພື້ນ ແລະ ສາກົນ.
ໃນໂອກາດນີ້, ທ່ານເອກອັກຄະລັດຖະທູດ ມົງໂກລີ ກໍໄດ້ສະ ແດງຄວາມຂອບໃຈຕໍ່ທ່ານລັດຖະມົນຕີກະຊວງປ້ອງກັນປະເທດ ທີ່ໄດ້ໃຫ້ການຕ້ອນຮັບ ແລະ ຮ່ວມປຶກສາຫາລືວຽກງານໃນ ຄັ້ງນີ້ພ້ອມຢືນຢັນວ່າ: ຈະສຸມທຸກຄວາມສາມາດຂອງຕົນເພື່ອປະກອບສ່ວນເຂົ້າໃນການສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອລະຫວ່າງສອງຊາດທີ່ມີມາ ແຕ່ດົນນານແລ້ວນັ້ນໃຫ້ໄດ້ຮັບການພັດທະນາ ດີຍິ່ງໆຂຶ້ນເພື່ອ ນຳເອົາຜົນປະ ໂຫຍດຕົວຈິງມາ ສູ່ສອງປະເທດກໍຄືປະຊາຊົນ ສອງຊາດລາວ-ມົງໂກລີ ແລະ ຈະອອກແຮງຊຸກຍູ້ການພົວພັນ ແລະ ຮ່ວມມືສອງຝ່າຍທາງດ້ານເສດຖະກິດ, ການຄ້າ, ວິທະຍາສາດ ແລະ ເຕັກໂນໂລຊີຮ່ວມກັນ ໃນຕໍ່ໜ້າດ້ວຍຄຸນະພາບໃໝ່.

Editor: ດາວໄຊ ສີວິໄລ