ໃນວັນທີ 22 ມິຖຸນາ 2017 ທີ່ຜ່ານມາ ຢູ່ທີ່ສະມາຄົມນັກຂ່າວ ແຫ່ງ ສປປ ລາວ, ໄດ້ມີງານຖະແຫລງຂ່າວ ກະກຽມຈັດວາງສະແດງສິນຄ້າ ລາວ-ຫວຽດນາມ 2017 ຈັດໂດຍ ກົມສົ່ງເສີມການຄ້າ, ກະຊວງອຸດສະຫະກໍາ ແລະ ການຄ້າ ຂອງ ສ ປປ ລາວ ຮ່ວມກັບ ກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ ສສ ຫວຽດນາມ, ພ້ອມດ້ວຍ ກົມເສດຖະກິດ, ກະຊວງປ້ອງກັນປະເທດ ສສ ຫວຽດນາມ ແລະ ກົມເສດເສດຖະກິດ ກະຊວງປ້ອງກັນປະເທດ ຂອງ ສປປ ລາວ.
ການຖະແຫລງຂ່າວດັ່ງກ່າວໂດຍການເປັນປະທານ ຂອງ ທ່ານ ສົມຫວັງ ນິນທະວົງ ຫົວໜ້າກົມ ສົ່ງເສີມການຄ້າ, ກະຊວງອຸດສາຫະກຳ ແລະ ການຄ້າ,ທ່ານ ພົນຕັດຕະວາ ຄຳມີ ຫລ້າບຸນທັນ ຫົວຫນ້າກົມເສດຖະກິດ ກະຊວງປ້ອງກັນປະເທດ, ທ່ານ ພັນໂທ ຫງວຽນ ແທ໋ງ ເຊີນ ຕາງຫນ້າກົມເສດຖະກິດ ກະຊວງປ້ອງກັນປະເທດ ສສ ຫວຽດນາມ ມີບັນດາ ຜູ້ຕາງໜ້າ ຈາກສະຖານທູດຫວຽດນາມ ປະຈໍາ ລາວ, ພ້ອມດ້ວຍພາກສ່ວນ ທີ່ກ່ຽວຂ້ອງ ລວມທັງ ສື່ມວນຊົນລາວເຂົ້າຮ່ວມ.
ຈຸດປະສົງ ຂອງການຈັດວາງສະແດງສິນຄ້າ ລາວ-ຫວຽດນາມ 2017 ໃນຄັ້ງນີ້, ເພື່ອເປັນການ ສະເຫລີມສະຫລອງ 2 ວັນ ປະຫວັດສາດ ລາວ-ຫວຽດນາມ ຄື: ວັນເຊັນສົນທິສັນຍາ ມິດຕະພາບ ແລະ ການຮ່ວມມື ຄົບຮອບ 40 ປີ ແລະ ວັນສ້າງຕັ້ງ ສາຍພົວພັນການທູດ ລາວ-ຫວຽດນາມ ຄົບຮອບ 55 ປີ.
ພາຍໃນງານຈະໄດ້ພົບກັບສິນຄ້າ ຫລາກຫລາຍປະເພດ ຈາກຫົວໜ່ວຍທຸລະກິດ ລາວ ແລະ ຫວຽດນາມ ຫລາຍກວ່າ 100 ບໍລິສັດ, ໂດຍມີປະເພດສິນຄ້າ ເຄື່ອງຫັດຖະກໍາ, ຢາພຶ້ນເມືອງ, ເຄື່ອງໃຊ້ຊີວິດປະຈໍາວັນ, ເຄື່ອງມືຮັບໃຊ້ການຜະລິດ, ເຄື່ອງໃຊ້ຄົວເຮືອນ, ເຟີເນິເຈີ ແລະ ອື່ນໆ.
ພິເສດ ຕະຫລອດໄລຍະໃນງານ ຈະມີການສະແດງ ສິນລະປະຂອງສອງຊາດ, ການແຂ່ງຂັນຮ້ອງເພງ ລາວ-ຫວຽດ ແລະ ການສຳມະນາ ລວມທັງກິດຈະກໍາ ບໍລິການກວດສຸຂະພາບ ໂດຍບໍ່ເສຍຄ່າຕື່ມອີກ.
ງານວາງສະແດງສິນຄ້າດັ່ງກ່າວ, ມີຫ້ອງວາງສະແດງສິນຄ້າ ທັງໝົດຫລາຍກວ່າ 300 ຫ້ອງ. ໃນນັ້ນ, ມີທຸລະກິດຈາກ ສສ ຫວຽດນາມ 120 ຫ້ອງ, ພາກທຸລະກິດ ຈາກລາວ ຈຳນວນ 200 ກວ່າຫ້ອງ ແລະ ງານວາງສະແດງສິນຄ້າ ຄັ້ງນີ້ ຈະຈັດຂຶ້ນໃນ ລະຫວ່າງ ວັນທີ 29 ມິຖຸນາ ຫາ ວັນທີ 3 ກໍລະກົດ 2017 ທີ່ ສູນການຄ້າລາວໄອເຕັກ (ຕຶກເກົ່າ).
Editor: ກຳປານາດ ລັດຖະເຮົ້າ
